Gemini криптобиржасының акциялары IPO бағасынан төмендеді. Бағасы тым жоғары ма?
Кэмерон және Тайлер Уинклвосс есімді миллиардер ағайындылар негізін қалаған криптовалюталық алаң Gemini Space Station акциялары 17 қыркүйекте IPO бағасынан төмен түсті. Сауданың бұл құлдырауы криптовалютамен байланысты басқа компаниялардың бағаларының да төмендеуімен сәйкес келді. Бірақ сарапшылардың айтуынша, Gemini қағаздары бұған қоса тым жоғары бағаланған.
Егжей-тегжейі
Gemini криптобиржасының акциялары сәрсенбі күні 12,8%-ға арзандап, сауда жабылғанда $24,5 болды. Күн ішінде баға тіпті $23,6-ға дейін түскен.
Нәтижесінде акциялар 12 қыркүйектегі IPO бағасынан төмен қалды: ол кезде компания қағаздарын $28 бағамен ұсынған. Сауданың алғашқы күнінде акциялар $45,89-ға дейін көтеріліп, кейін $32 деңгейінде жабылды — бұл бастапқы бағадан 14% жоғары еді. Бірақ содан бері акциялар 23%-ға төмендеді.
IPO кезінде Gemini $425 млн тартып, компания $3,3 млрд деп бағаланған еді. Қазір нарықтық капитализациясы шамамен $2,9 млрд.
Сәрсенбіде АҚШ-тағы басты бәсекелес Coinbase Global акциялары да 2,2%-ға төмендеді. Сонымен қатар биткоин бағасы 1%-ға арзандады. Ал криптовалюта саудасын ұсынатын Robinhood Markets акциялары керісінше, 1,1%-ға көтерілді.
Акциялар бағасы тым жоғары ма?
2025 жылдың алғашқы жартысында Gemini $283 млн таза шығын көрсетті. Бұл 2024 жылғы $159 млн шығыннан да көп. Табыстың өсу қарқыны баяулағандықтан, компанияға жоғары нарықтық құнын ұстап тұру қиынға соғуда, деп жазады Cryptorank.
Compass Point сарапшысы Эд Энгелдің пікірінше, Gemini қағаздары артық бағаланған. Акциялар компания капитализациясының жылдық табысқа қатынасы бойынша (P/S коэффициенті) 26 деңгейінде саудалануда. Яғни инвесторлар әр $1 табыс үшін $26 төлеп отыр. Бұл көрсеткіш бәсекелестердің орташа деңгейінен (3,2) және бүкіл салалық көрсеткіштен (4) әлдеқайда жоғары.
Мұндай коэффициент әдетте жылдам өсім мен тұрақтылық күтетін компанияларға тән. Бірақ әлі шығынды және нақты бизнес базасы қалыптаспаған Gemini үшін мұндай баға қысқа мерзімде ақталмауы мүмкін. Cryptorank есептеуінше, акциялардың әділ бағасы $32,52. Бұл ағымдағы бағадан жоғары, бірақ бастапқы шарықтау деңгейінен төмен.
Freedom Broker IPO-ға дейін жасаған бағалауында Gemini акцияларының әділ құны $33,6 деп көрсеткен — бұл қазіргі бағадан 37% жоғары. Freedom қағаздарды сатып алуды ұсынды, бірақ тәуекелдерді де ескерткен. Компания табысы платформадағы цифрлық активтермен жасалатын транзакциялар көлеміне қатты тәуелді. Ал бұл көлем актив бағаларына байланысты. Бағаның немесе транзакциялар көлемінің төмендеуі Gemini-дің бизнесіне, операциялық нәтижелеріне және қаржылық жағдайына кері әсер етеді, деп ескертті Freedom сарапшысы Алем Бектеміров. Бұған қоса, Gemini-дің бәсекелестері де көп: децентрализденген биржалар (DEX), автономды ұйымдар (DAO), сондай-ақ Robinhood пен Coinbase сияқты ойыншылар.
