Криптобиржа Gemini IPO-ға шығады. Криптосекторда «жылымық» басталды ма?
Миллиардер егіздер Тайлер мен Кэмерон Уинклвосс негізін қалаған Gemini криптобиржасы АҚШ-та бастапқы жария акция орналастыру (IPO) өткізу үшін конфиденциалды өтінім бергенін хабарлады. Криптокомпаниялар инвесторлардың тәуекелді активтерге деген қызығушылығының қайта жандануын пайдалануға асығуда, ал криптовалютаға қатысты IPO толқыны сала үшін бетбұрыс сәтіне айналуы мүмкін, деп хабарлайды Reuters.
Егжей-тегжейлі
Клиенттеріне 70-тен астам криптовалюта бойынша мәмілелер ұсынатын Gemini Space Station әзірге ұсыныстың көлемі мен акциялардың баға диапазонын анықтамағанын, бірақ IPO-ны дәл АҚШ-та өткізуді жоспарлап отырғанын мәлімдеді. Компания өкілдерінің айтуынша, орналастыру АҚШ-тың ҚҚА (SEC) өтінімді қарау процесін аяқтағаннан кейін ғана мүмкін болады.
2014 жылы құрылған Gemini пайдаланушыларға биткоин секілді криптовалюта активтерін сақтау және айырбастау платформасын ұсынады. Оның негізін қалаушылар — егіз бауырлар Уинклвосс, көпшілікке Facebook пен оның бас директоры Марк Цукербергке қарсы сотқа шағым түсіргеннен кейін танымал болды. Олар Цукербергті әлеуметтік желі идеясын ұрлады деп айыптаған. 2008 жылы бұл дау реттеліп, егіздер ақшалай өтемақы мен Facebook акцияларын алған.
Жылымық басталды ма?
Gemini көпшілік компания болуды жоспарлап отырғанын Circle стейблкоин шығарушы компаниясының биржаға шыққан келесі күні жариялады. Дебюттік саудада Circle акциялары шамамен 170% өсті. Мұндай жетістік криптоиндустриядағы басқа компанияларды да листинг өткізуге ынталандыруы мүмкін, деп жазады Bloomberg.
«Бұл — IPO өткізуді жоспарлап отырған криптокомпаниялар үшін Circle-дің саудаға қалай шыққанын көре отырып, алғашқы қадам жасамаса — нағыз ессіздік болар еді», — деді Reuters-ке Renaissance Capital аға стратегi Мэтт Кеннеди. «Криптонарық — болжанбайтын сала, сондықтан мұндай мүмкіндік туған кезде оны міндетті түрде пайдалану керек», — деп қосты ол.
2022 жылы FTX криптобиржасының күйреуінен кейін көптеген институционалдық инвесторлар цифрлық активтер нарығынан бойын аулақ ұстай бастады, деп жазады агенттік. Алайда секторға серпін АҚШ-та криптовалютаға жақтас президенттің сайлануы мен актив бағасының қалпына келуінен туды. CoinMarketCap дерегінше, әлемдік криптонарықтың жиынтық капитализациясы шамамен $3,3 трлн, ал биткоин бағасы тұрақты $100 мыңнан жоғары деңгейде сақталып тұр.
Криптовалютаға қатысты IPO толқыны сала үшін бетбұрыс сәтіне айналуы мүмкін, деп жазады Reuters. Бұл — нарықтың кең инвесторлар аудиториясын тартуға қабілетті екеніне сенімі артып, ашықтыққа, реттеудің күшеюіне және капиталға қолжетімділікке қарай жылжып жатқанын білдіреді. Мұның бәрі цифрлық активтердің дәстүрлі қаржы жүйесінен өз орнын алуына жол ашады, деп атап өтеді Reuters.
«Биржаға сәтті шығу — криптосектордағы «жылымықтың» шынайы екенін дәлелдер еді. Егер андеррайтерлер жаңа комиссиялардың ағынын сезінсе, финтехтен бастап ЖИ-чиптерге дейін орналастыру толқынын күтуге болады», — деп есептейді Running Point Capital Advisors инвестициялар жөніндегі директоры Майкл Эшли Шульман.
