Circle IPO-сы: әлемдегі басты стейблкоиндардың бірінің жасаушысы биржаға шықты
Circle Internet Group компаниясының акциялары — әлемдегі ең танымал криптовалюталардың бірі USDC-нің жасаушысы — енді Freedom сауда жүйесінде инвесторларға қолжетімді. Компания биылғы жылдың ең ірі IPO-ларының бірін өткізді, соңғы сәтте ұсыныс көлемі мен бағасын арттырды. Акциялар CRCL тикерімен белгіленді. Нью-Йорк қор биржасында акциялармен сауда бірнеше сағат ішінде басталады.
Егжей-тегжейлі
Circle және оның қазіргі акционерлері жалпы саны 34 млн A класты қарапайым акцияларды бір данасы үшін $31 бағамен орналастырды. Бұл көлемнің 14,8 миллионын компанияның өзі, ал қалған 19,2 миллионын акционерлер сатты. Осы деректерге сүйенсек, Circle IPO арқылы жалпы $1,1 млрд-қа жуық қаражат тартты, ал бүкіл компанияның құны $6,9 млрд шамасында деп бағаланды, деп жазады Bloomberg. Қызметкерлердің акцияларына берілген опциондарды, шектеулі акцияларды және варранттарды есепке алғанда, компанияның жалпы бағалауы $8,1 млрд-қа жетеді, деп қосты агенттік.
Circle-дің листингі биылғы ең ірі орналастырулардың бірі болды, деп атап өтті Reuters. Компания алғашқыда 9,6 млн акция ұсынғысы келді, ал акционерлер — 14,4 млн акцияны $24–26 бағалық диапазонында сатуды жоспарлаған болатын. Алайда, 2 маусым, дүйсенбіде бұл параметрлер 12,8 млн және 19,2 млн акцияға дейін өсіп, бағасы $27–28 аралығында белгіленді. Сөйтіп, компания $7,2 млрд көлемінде бағалануға ұмтылып, өзі мен инвесторлары $896 млн-ға дейін қаражат тартуды мақсат етті.
IPO ұйымдастырушылары қатарында JPMorgan, Citigroup, Goldman Sachs, Barclays және Deutsche Bank Securities болды. Bloomberg деректеріне сүйенсек, BlackRock инвестициялық компаниясы акциялардың шамамен 10%-ын сатып алуды жоспарлаған. Сондай-ақ, Кэти Вуд басқаратын Ark Investment Management қоры $150 млн-ға дейінгі сомаға акция сатып алуға қызығушылық білдірген, бұл Circle-дің IPO өтінімінен белгілі болды. Bloomberg-тің жазуынша Circle IPO-сы сұраныстың ұсыныстан бірнеше есе көп болуымен ерекшеленді.
Компания несімен қызықты
Circle компаниясы — әлемдегі ең ірі стейблкоиндардың бірі саналатын USDC жасаушысы. Стейблкоин — құны нақты (фиаттық) валютаға (әдетте 1:1) байланған криптовалюта. USDC АҚШ долларына байланған және капитализациясы бойынша әлемде екінші орында тұр, деп жазды Reuters.
Circle-дің негізгі табыс көзі — USDC-ті қамтамасыз ететін АҚШ қазынашылық облигацияларына салымдардан алынатын пайыздық кіріс. Reuters хабарлауынша бұл табыс 2025 жылдың бірінші тоқсанында (31 наурызда аяқталған) 55,1%-ға өсіп, $557,9 млн-ға жетті. Жалпы табыс — $578,6 млн. Алайда, дистрибуция мен транзакцияға кететін шығындар 68,2%-ға артып, табыс өсімінен озып түсті. Circle негізінен стейблкоиндарды Coinbase криптобиржасымен және басқа да үшінші тарап қызметтерімен серіктестікте таратады. Сонымен қатар, компания 2024 жылдың осы кезеңімен салыстырғанда таза табысын үштен бірге арттырып, $64,8 млн-ға жеткізді. 29 мамырдағы жағдай бойынша резервтер көлемі — $61,3 млрд.
Circle бас директоры — кәсіпкер әрі инвестор ретінде танылған Джереми Аллэйр (Barron’s дерегі). Компания 2021 жылы SPAC арқылы биржаға шығуға тырысқан, бірақ мәміледен бас тартқан.
Өткен жылы АҚШ-тың Қаржы нарығын реттеу және бағалы қағаздар жөніндегі комиссиясы (SEC) Circle-дің инвестициялық компания ретінде тіркелуі керек пе және USDC-нің бағалы қағаз ретінде қаралуы тиіс пе деген сұрақтар көтерген. Алайда Дональд Трамп Ақ үйге қайта оралғаннан кейін SEC басшылығына криптовалютаға мейірімдірек жаңа тұлғалар келді, деп жазды Barron’s.
Freedom сарапшыларының ұстанымы
Криптовалюта секторы қазір айқын реттеу мен цифрлық активтердің кеңінен қолданылуы аясында қарқынды өсімге дайын. Мұндай жағдайда стейблкоиндарға сұраныс артып, бұл Circle компаниясының табысын арттыруы мүмкін, дейді Freedom Broker сарапшысы Әлем Бектеміров. Оның есептеуінше 2034 жылы Circle-дің таза пайдасы $1,12 млрд-қа жетуі мүмкін — бұл 2024 жылғы $155,7 млн-нан жеті есе көп.
Freedom бағалауы бойынша Circle акциясының мақсатты бағасы — $37,9. Бұл IPO бағасынан ($31) 22%-ға жоғары. Алайда Бектеміровтың айтуынша Circle үшін негізгі қауіп — орталық банктердің цифрлық валюталарды енгізуі. Бұл стейблкоиндарға деген сұранысты төмендетуі мүмкін. Бұдан бөлек, сарапшы бәсекелестікті де басты қауіп ретінде атады.
Басқалар не дейді
Circle-дің ұсынысты ұлғайтуы стейблкоиндар нарығының болашағының кең екенін және криптокомпанияларға деген инвесторлық қызығушылықтың жоғары екенін көрсетеді, дейді Reuters.
«Ұсыныстың ұлғаюы — реттеушілік өзгерістерді болжаудан гөрі, Circle алға тартып отырған жаһандық төлем жүйесіне тіпті баяу ілгерілеп жатқан заң жобасының да кедергі бола алмайтынын есепке алған шешім секілді», — деп атап өтті Running Point Capital инвестициялық директоры Майкл Эшли Шульман (Reuters арқылы).
Криптовалюталардағы жаңа бум, биткоин бағасының өсуі, криптокомпания акцияларының көтерілуі және eToro секілді қатысушылардың сәтті IPO-лары — мұның бәрі Circle үшін оң әсерін тигізіп отыр, деп жазды Barron’s. Дегенмен Circle мен USDC Tether-мен бәсекеге түсуі керек — ол ең танымал долларлық стейблкоин USDT шығарушысы. CoinMarketCap деректері бойынша айналымдағы токендер көлемі USDC-ге қарағанда екі есе көп: $153 млрд қарсы $61 млрд. Дегенмен инвесторлар әзірге бұл туралы алаңдамауына болады: ұсыныс көлемінің және IPO бағасының жоғарылауы Circle акцияларына сауда басталғаннан кейін де тұрақты сұраныс болатынын көрсетеді, дейді Barron’s.
Долларға байланған стейблкоиндар ұсыну нарығындағы мүмкіндіктер ауқымды және доллардың ғаламдық сұранысы сақталғанша өсе түсуі ықтимал, деп атап өтті Seeking Alpha-да IPO сарапшысы Донован Джонс. Алайда, ол Circle-дің енді жария компания ретінде комплаенс, реттеу және кибершабуылдар секілді тәуекелдермен бетпе-бет келетінін ескертті.
Freedom Broker клиенттері Circle Internet Corp акцияларын негізгі биржа сессиясы басталғанға дейін саудалай алады. Сауда АҚШ биржалары ашылғанға дейін 2–3 сағат бұрын, яғни Астана уақытымен 15:30–16:30 аралығында ерте премаркет форматында өтеді. Қатысу үшін CRCL.US тикеріне өтіңіз.
