HSBC акциялары 6%-ға құлдырады: инвесторлар неге риза емес?
Еуропаның ең ірі банкі — HSBC акциялары Лондон қор биржасында 7%-ға төмендеді. Инвесторлар банктің Гонконгтағы еншілес компаниясы Hang Seng Bank-ты жеке меншікке айналдыру туралы ұсынысына оң көзқарас білдірмеді, деп жазады CNBC. Ал Hang Seng акциялары керісінше 26%-ға дейін шарықтады.
Егжей-тегжейлі
HSBC акционерлеріне Hang Seng Bank акцияларын жеке меншікке беру ұсынысын жасады. Осы арқылы HSBC Asia Pacific еншілес компаниядағы миноритарлық акционерлерге тиесілі акцияларды сатып алады, ал кейін Hang Seng Гонконг қор биржасынан шығарылады. Қазір HSBC компания капиталының 63%-ына ие.
Ұсыныс бойынша Hang Seng бағасы 290 млрд Гонконг доллары ($37 млрд)-дан асады. Акциялар әрқайсысына 155 Гонконг доллары мөлшерінде өтеледі, бұл соңғы 30 күндегі орташа бағадан шамамен 33%-ға жоғары. HSBC еншілес компаниядағы үлесін есепке алсақ, мәміленің жалпы құны шамамен 106 млрд Гонконг доллары ($13,6 млрд) болып отыр.
HSBC акцияларының құлдырауы бүкіл еуропалық банк секторына қысым жасады: Stoxx 600 Optimised Banks индексі бейсенбіде 0,7%-ға төмендеді.
Мәміленің артықшылығы мен кемшілігі
Кейбір аналитиктер Hang Seng Bank акциялары үшін HSBC ұсынған премияға күмәнмен қарауда.
«Мәміленің стратегиялық мәні айқын және капиталды тиімді пайдалану сияқты көрінеді, бірақ инвесторлар «неге дәл қазір және осындай бағамен?» деп сұрауы мүмкін», — дейді Citi аналитигі Эндрю Кумбс (Reuters-ке сілтеме).
Акцияларға шамамен 30% премия қосылады, бұл соңғы 12 айдағы Hang Seng акцияларының 24%-дық өсіміне қосымша болып отыр. Barclays аналитиктері мәмілені «Гонконгқа үлкен ставка» деп атаған.
HSBC Гонконгты Ұлыбританиямен бірге «үй нарығы» деп санайды, алайда Қытай мен батыс елдері арасындағы шиеленістің артуынан қысым сезінеді, деп жазады Financial Times. HSBC-дің ең ірі акционері — Қытайлық Ping An қаржы холдингі, ол 2022 жылы HSBC-дің азиялық және батыстық бизнесін бөлуге шақырған кампаниясын бастаған.
Соған қарамастан, Morningstar аналитигі мәмілені оң қадам деп бағалады: «Бас компания мен еншілес компанияның қосарланған листингі корпоративтік басқару тұрғысынан қиындық тудырады, сондықтан бұл оң және ұзақ күткен қадам», — дейді компанияның аға аналитигі Майкл Макдад.
