Илон Маск алдағы бес жылда Tesla басшысы болып қалатынын мәлімдеді
Tesla компаниясының бас директоры Илон Маск алдағы бес жыл ішінде компанияны басқаруды жалғастыру ниетін білдіріп, саяси мақсаттарға жұмсайтын шығындарын едәуір қысқартуды жоспарлап отырғанын айтты. Бұл мәлімдемелер оның саяси белсенділігіне байланысты туындаған алаңдаушылықтардан кейін инвесторларды сабасына түсірді. 20 мамырдағы саудада Tesla акциялары соңғы үш айдағы ең жоғары бағаға жетті.
Егжей-тегжейі
20 мамыр күні Катарда өткен Bloomberg форумында Илон Маск видеобайланыс арқылы сөз сөйледі. MarketWatch мәліметінше, «Алдағы бес жыл өміріңізді Tesla-ға арнай аласыз ба?» деген сұраққа ол: «Иә, бұған тек өлімім ғана кедергі келтіруі мүмкін», — деп жауап берді. Бұл пікірін CNBC те келтірді.
Маск компанияны басқаруды жалғастыру үшін Tesla-ның бас директоры қызметінде қалғысы келетінін айтты. Ол инвестор-активистердің өзін қызметтен босатуына жол бермейтін «шешуші дауыс беру құқығын» сақтап қалуды көздеп отыр.
«Бұл ақша туралы емес. Бұл — компания болашағын бақылау туралы», — деді Маск.
Ол сондай-ақ саяси бастамаларға жұмсалатын қаражатын едәуір азайтатынын хабарлады. Bloomberg хабарлауынша, Маск: «Мен бұл бағытта жеткілікті жұмыс істедім деп ойлаймын», — деді. Миллиардердің айтуынша, оның саяси белсенділігі солшыл көзқарастағы тұтынушылар арасында Tesla сатылымына кері әсер етуі мүмкін болған, алайда компания оңшыл электорат арасынан жаңа сатып алушылар тапқан.
Масктың сөзінше, бірінші тоқсандағы қысқарудан кейін Tesla сатылымы қайта өсе бастаған: «Бүгінде сатылымымыз жақсы жүріп жатыр. Біз сұраныс тапшылығы болады деп күтпейміз», — деді ол.
Сол күні CNBC-ге берген сұхбатында Маск Tesla маусымның соңына дейін Техас штатының Остин қаласында пилотсыз такси қызметін іске қосатынын, кейін бұл бастама Лос-Анджелес пен Сан-Францискода жалғасатынын растады.
Инвесторлар үшін маңыздылығы неде?
MarketWatch басылымының жазуынша, Масктың бұл мәлімдемелері оның АҚШ саясатынан біртіндеп алыстап, бизнеске көбірек назар аудара бастағанын көрсетті. Бұған дейін Дональд Трамп президент болып сайланған соң, Маск мемлекеттік тиімділік департаменті — DOGE басшылығына келген еді. Осыдан кейін көптеген сарапшы мен инвестор одан Вашингтондағы саясаттан гөрі Tesla-ға көңіл бөлуін талап еткен.
CNBC хабарлауынша, кейбір инвесторлар Масктың Tesla-ға деген адалдығына күмән келтірген.
CFRA сарапшысы Гарретт Нельсон: «Масктың бес жылдық уәдесі — оң қадам. Бұл оның онжылдықтың соңына дейін компаниямен бірге болатынын білдіреді. Ал біз бұл кезеңді автономды көлік, робототехника және энергия сақтау технологияларының өркендейтін уақыты деп есептейміз», — деді MarketWatch келтірген пікірінде.
Barron’s басылымы Tesla бас директорының бизнесті басқаруға көңіл бөлуін нарық әдетте оң қабылдайтынын жазады. Маск бұрын да DOGE-ге азырақ уақыт бөлетінін айтқан болатын.
20 мамыр күні Tesla акциялары 3,8 пайызға дейін көтеріліп, үш ай ішіндегі ең жоғарғы шекке жетті. Алайда сауда соңында өсім 0,5 пайызбен шектелді. Бұл нәтиже S&P 500 индексінен жақсырақ: сол күні индекс 0,39 пайызға төмендеген.
Сарапшылар не дейді?
2025 жылдың басынан бері Tesla акциялары шамамен 15 пайызға арзандады. Бірақ кейінгі бір ай ішінде олардың бағасы 45 пайызға өскен.
MarketWatch мәліметінше, Tesla-ның акцияларына 57 сарапшы баға берген. Олардың 30-ы сатып алуға кеңес береді (Buy және Overweight), 15-і — ұстауға (Hold), ал 12-сі — сатуға (Underweight және Sell) кеңес берген.
Wall Street-тің орташа мақсатты бағасы — бір акция үшін 308 доллар. Бұл — 19 мамырдағы жабылу бағасынан 10 пайызға төмен.
