Инвесторлар қажыды: нарық төмендеуде
18 қарашада әлемдік нарықтардағы жаппай түзету жалғасты: инвесторлар Nvidia есебін күтіп алаңдап отырғанда, акциялар да, биткоин де төмендеп барады. Бұл құлдырау Bank of America жүргізген қараша айындағы сауалнама нәтижелерімен дәл келді: қоржындардағы қолма-қол қаражат үлесі азайып, бұл активтерді сатуға итермелейтін белгіге айналды.
Егжей-тегжейлі
MSCI World индексі — дамыған нарықтардың ірі және орта компанияларының акцияларын қамтитын, жаһандық инвесторлар үшін негізгі бенчмарк — 18 қарашада 0,4% төмендеді. Жапонияны есепке алмағанда, Азия акциялары 1,9% құлдырап, қазанның ортасынан бергі ең төмен деңгейге түсті. Жапондық Nikkei 225 индексі бір сауда күнінде 3,2% жоғалтты — мұндай құлдырау сәуірден бері болмаған.
Азиядағы пессимизм Еуропа нарықтарына да тарады — мұнда акциялар қатарынан төртінші күн төмендеп жатыр. STOXX 600 аймақтық индексі сауда ашылғанда 1,1% құлап, 7 қарашадан бергі ең төмен деңгейіне түсті. Еуропаның ірі қор нарықтарының индекстері — Германияның DAX және Францияның CAC 40 — да 1%-дан жоғары әлсіреді.
Жасанды интеллект секторына арналған жабдық өндірушілердің еуропалық акциялары айтарлықтай арзандады: Siemens Energy қағаздары 3% төмендеді, Schneider Electric – 2% құлдырады. ABB капитализациясы 4% қысқарды — компания табыс өсіміне қатысты болжамын көтермей, инвесторларды қынжылтты, деп жазады Reuters. Жалпы төмендеу аясында Roche акциялары 6% көтерілді — фармацевтикалық алып сүт безі қатерлі ісігінің еміне арналған дәрінің клиникалық сынақтарының соңғы кезең нәтижелерін жариялады.
Binance криптобиржасында биткоин бағасы $90 мыңнан төмендеп кетті. Кейінірек ең ірі криптовалюта шығынның бір бөлігін қалпына келтіріп, қазір $91 мыңнан жоғары саудалануда.
Сарапшылардың пікірі
«Қазіргі деңгейлерде инвесторлардың сенімі әлсірей бастағандай», — деп келтіреді Reuters Maybank Securities сингапурлық прайм-брокеридж бөлімінің басшысы Тарек Хорчанидің сөзін. Оның айтуынша мәселе нақты бір триггерде емес, қазіргі позициялардың шаршатқанында: инвесторлар акциялардың жоғары бағалануына күмәнмен қарап, раллиге аздаған үзіліс қажет екенін көбірек түсіне бастады.
Reuters жазғандай, жаһандық инвесторлар қарашада акциялар мен биржалық тауарларға салымды арттырғанымен, жаңа сатып алуларға ақша қалмады — бұл да «сату сигналына» себеп болды. Bank of America 18 қарашада жариялаған ай сайынғы басқарушы қорлар сауалнамасында рекордтық 63% респондент қазіргі уақытта акция нарығы аса жоғары бағаланған деп есептейді. Технологиялық сектордағы позициялану да тым шоғырланған күйде қалып отыр: 54% сауалнама қатысушысы «Керемет жетілік» компанияларының акцияларын сатып алуды ең жаппай жасалатын мәміле деп атаған.
