iPhone 17 таныстырылымынан кейін Apple акциясы құлады: сарапшылар қандай кеңес берді?
Инвесторлар жаңа iPhone мен Apple ұсынған басқа да өнімдерді жақсы қабылдамады — таныстырылымнан кейін котировкасы шамамен 2% төмендеді және төмендеуі келесі күні де жалғасты. Уолл-стриттегі сарапшылардың пікірі екіге бөлінді: кейбірі инвесторларға акцияны сатып алуды және мақсатты бағасын көтеруді ұсынса, енді кейбірі компанияны таныстырылымдарда ЖИ-ды (AI) дерлік қолдамағаны үшін сынады.
Уолл-стритте не айтылды?
— Goldman Sachs сарапшысы Майкл Нг Apple акциясына қатысты «сатып алу» кеңесін сақтап, мақсатты бағасын $266 деңгейінде қалдырды — бұл жабылу бағасынан 13,5% жоғары, деп хабарлайды CNBC. Оның пікірінше, Apple-дың 128 ГБ жады бар смартфон панелін мүлде алып тастау туралы күтпеген шешімі iPhone бағасын көтеруі тиіс. Сарапшының айтуынша, таныстырылымнан кейінгі Apple акциясының құлауы ең қолжетімді iPhone 17 моделі бағасының әлі де $799-дан басталуына байланысты туындаған көңілсіздіктен болуы мүмкін.
— Bank of America «сатып алу» рейтингін растады және мақсатты бағасын $10 көтеріп, $270-ға жеткізді. Инвестбанк сарапшысы Васси Мохан компания акциясының өсуіне «артқан сенімділік» білдірді. Оның айтуынша, Apple-дың өз процессорларына ставка жасауы, сондай-ақ ЖИ-ға арналған жаңа аппараттық мүмкіндіктері компанияның жасанды интеллект саласындағы позициясын нығайтады.
— Ал Gabelli Funds сарапшысы Рюта Макино Apple іс-шарасында ЖИ туралы сөз болмағанын күтілетін жағдай деп атады, деп жазады Business Insider. «Apple жасанды интеллект пен Siri туралы әңгімеден қашқақтайтын сияқты, бұл күтілген нәрсе, бірақ көңілге қонбайды, — деді ол. — Менің ойымша, Apple өз ЖИ-стратегиясына түбегейлі өзгерістер енгізуі тиіс».
— Citi компания акциясын сатып алуды ұсынады, бірақ оның мақсатты бағасы бір қағаз үшін $245 болып белгіленген — бұл соңғы жабылу бағасынан небәрі 4,5% жоғары. Сарапшы Атиф Малик жұқа әрі жеңіл iPhone Air-дың шығуын 2026 жылы күтілетін бүктемелі смартфонның жолашары ретінде бағалайды. Оның ойынша, бұл пайдаланушылар құрылғыларын ауыстырудың жаңа, заманауи циклін бастауға мүмкіндік береді. Сондай-ақ ол Apple акциясының қазіргі табысқа қатынасы (P/E — 28) тарихи көрсеткішінен шамамен 8%-ға жоғары екенін айтты, бірақ бұл орынды: компания баж салығын есептемегенде валдық маржаның өсуін көрсетіп отыр, табыстың сервис секторынан түсетін үлесін арттыруда, Apple Intelligence-ті біртіндеп енгізуде және сонымен қатар мықты балансын сақтап тұр.
— Morgan Stanley сарапшысы Эрик Вудринг Apple акциясын Overweight деп бағалап, бұл «сатып алу» кеңесіне сәйкес келетінін атап өтті, ал бағасы $240 деп белгіленді. Оның пікірінше, iPhone бағасы сәл көтерілгенімен — негізінен жады аз модельдерден бас тарту салдарынан, — трейд-ин бағдарламалары мен операторлық жеңілдіктер iPhone 17 сериясын алдыңғы жылдармен салыстырғанда сатып алушылар үшін қолжетімді ете түсті. Бұл сатылымға драйвер болуы мүмкін. Сарапшы презентацияны «орташа деңгейде позитивті тосынсый» деп сипаттап, төмен күтілімдер аясында Apple үшін жылдың соңына дейін қолайлы фон қалыптастыратынын айтты. «Біз акцияны таныстырылмнан кейінгі төмендеуде сатып алуды ұсынамыз», — деді ол.
— JPMorgan да Overweight рейтингін сақтап, мақсатты бағасын $255 деңгейінде қалдырды. Сарапшы Самик Чаттерджидің айтуынша, негізгі күтілімдер «тарихтағы ең жұқа iPhone» төңірегінде шоғырланғанымен, құрылғыларды жаппай жаңарту драйверіне қатысты болжамдар асыра бағаланған болуы мүмкін. Дегенмен ол Pro модельдеріне деген қызығушылықтың артуын, қосымша жаңартулар алуын және бағалардың өткен жылғы деңгейде қалуын позитивті фактор ретінде атады. Оның сөзінше, iPhone 17 сериясында бағалардың iPhone 16-мен салыстырғанда сақталуы — болашаққа берілген жақсы сигнал.
— Evercore ISI де Outperform рейтингін растады, ал мақсатты бағасын $250-ден $260-қа көтерді. «Көптен күткен iPhone Air — жаңа дизайн форматы, ол Apple қолданушыларының базасына жаңа тыныс беріп, iPhone желісін дамытудың көпжылдық жоспарының бастамасы болды», — деді Амит Дарьяни CNBC келтірген жазбасында.
— Melius Research сарапшысы Бен Ритцес «сатып алу» рейтингін сақтап, Apple акциясының мақсатты бағасын $260-тан $290-ға көтерді. Жаңа мақсат 9 қыркүйектегі жабылу бағасынан шамамен төрттен бір бөлікке жоғары. Оның оптимизмінің басты себептері — iPhone бағасының өсуі, Google-дан әдепкі іздеу жүйесі үшін төлемдердің сақталуы және болашақ ЖИ-жақсартуларға деген үміт, деп жазады Barron’s. «Негізгі фактор — $999 бағасы. Бұл сұранысты $799-дан басталатын арзанырақ модельдерге қарай ығыстырып, сатылым құрылымын жақсартады», — деді Ритцес жазбасында. Оның айтуынша, жаңа стильді дизайн Apple-ға Қытай мен басқа өңірлерде нарық үлесін арттыруға көмектесіп, АҚШ-тағы скептиктерден гөрі көбірек қызығушылық тудыруы мүмкін. Сарапшы Siri дауыс көмекшісіне уәде етілген ЖИ-жақсартулар кешіккенімен, Apple оны ақыры жүзеге асыратынына сенімді. «Siri-дегі жағдайдың тітіркендіретінін түсінеміз, бірақ Apple нарық үлесін арттыруға жұмыс істеп жатыр. Шыдамдылық ақталады», — деді ол.
— UBS сарапшысы Дэвид Вогт сақтық танытып, Apple акциясына нейтрал рейтинг («ұстап тұру») берді, ал оның мақсатты бағасы $220 — бұл сейсенбідегі жабылу бағасынан 6,5% минуста. Оның айтуынша, Apple жаңа өнімдері «күткендегідей орташа деңгейде шықты», бірақ ресми тұсаукесерде күтуден артық ештеңе болған жоқ. «Apple Google-пен ЖИ серіктестігін жариялаған жоқ, ал біздің мәліметімізше, шағын топ оны күткен еді. Сондай-ақ Siri үшін Apple Intelligence функциялары да әлі шыққан жоқ — оларды келесі жылы, шамамен көктемде күтіп отырмыз. Дегенмен компания AirPods Pro 3 құлаққаптарына арналған Live Translation функциясын таныстырды. Ол Apple Intelligence негізінде жұмыс істеп, жедел синхронды аударма жасай алады. Бұл қызықты сценарий болғанымен, біз ЖИ-қосымшалардың Apple-дың аппараттық өнімдері үшін 3–4 тоқсанда маңызды драйвер болатынын күтпейміз», — деді ол.
— Needham сарапшысы Лора Мартин де Apple акциясына нейтрал рейтингін сақтады, деп жазады Business Insider. «iPhone сатылым болжамын арттыруға итермелейтін ештеңе жоқ», — деді ол. Оның пікірінше, Apple бір өнімді компания болып қала береді, онда iPhone негізгі тірек болып тұр. «Сондықтан Apple акциясы iPhone ауыстыру циклі басталмайынша жұмыс істемейді», — деп қосты Мартин.
10 қыркүйектегі саудада Apple акциясы шамамен 3% құлап, $227,5-қа түсті. Жыл басынан бері компанияның нарықтық құны 9% минуста. Салыстыру үшін, АҚШ-тың басты қор индексі S&P 500 осы кезеңде шамамен 11% өсті.
Уолл-стриттің орташа мақсатты бағасы $241,2 — бұл 9 қыркүйектегі жабылу бағасына қарағанда небәрі 3% өсім білдіреді. Алайда сарапшылардың басым бөлігі — 48-дің 30-ы инвесторларға акцияны сатып алуды ұсынады. Тағы 15-і нейтрал ұстанымда, ал үшеуі ғана сатуға кеңес береді (төмендетілген салмақ немесе «сату»).
