Жаңа iPhone инвесторларды қызықтырмады. Apple акциялары арзандады
Apple жаңа өнімдерін таныстырғаннан кейін компания акциялары 1,7%-ға төмендеді. iPhone жасаушы ультражұқа Air моделін (sim-карта слоты жоқ), кинематографиялық түсірілім форматтарын қолдайтын Pro-нұсқасын, синхронды аударма жасайтын құлаққаптарды және жүрек ырғағын бақылайтын сағаттарды ұсынды. Компания кейбір смартфон үлгілерінің бағасын да көтерді. Бірақ инвесторлар ЖИ стратегиясына қатысты ешқандай жаңа мәлімет естімеді.
Егжей-тегжейі
Apple-дің жаңа өнімдер таныстырылымынан кейін 9 қыркүйекте акциялары 1,7%-ға арзандап, 234 долларға түсті. Инвесторлар iPhone Air мен Apple Watch Series 11 қоса алғандағы соңғы анонстарға салқын қарады, деп хабарлады CNBC. Презентация тосынсый әкелмеді, ал инвесторлар жалпы көңілі толмағанын Bloomberg те растады.
Басты жаңалық — ультражұқа iPhone
Apple iPhone 17 сериясын көрсетті. Оның ішінде толығымен жаңа модель — ультражұқа iPhone Air бар. «Бұл — нағыз революция», — деді презентацияда Apple бас директоры Тим Кук.
Жаңа құрылғының қалыңдығы бар болғаны 5,6 мм. Мысалы, Samsung Galaxy S25 Edge қалыңдығы — 5,8 мм. iPhone Air тек e-sim технологиясын қолдайды, sim-картаға арналған слот жоқ. Модель 18 мегапиксельді Center Stage алдыңғы камерасымен, әрі алдыңғы және артқы камерамен бір мезгілде видео түсіру мүмкіндігімен жабдықталған. Корпусы титаннан жасалған, иілуге төзімділігі жоғары.
Қалыңдықтың азаюы Apple Silicon шешімдерін қолданудың арқасында мүмкін болды. Компания жаңа N1 сымсыз чипін таныстырды, ол Wi-Fi және Bluetooth жұмысын қамтамасыз етеді. Сондай-ақ жаңа C1X модемі орнатылған, ол iPhone 16-дағы C1 модемінен екі есе жылдам және аз энергия тұтынады.
iPhone 17 Air бағасы 999 доллардан басталады.
Apple тағы не айтты?
— iPhone 17 бағасы 799 доллар болып қалады. Экран сапасы жақсарып, камера жаңартылды. Корпус өзгерген жоқ, бірақ дисплей сәл үлкейген.
— АҚШ-та алғаш рет 2017 жылдан бері iPhone Pro бағасы көтерілді. Ол 100 долларға қымбаттап, енді 1099 доллардан басталады. Бірақ базалық үлгіде 128 ГБ орнына 256 ГБ жады ұсынылады. Сондай-ақ ол iPhone тарихындағы ең қуатты аккумулятормен жабдықталған.
— iPhone 17 Pro Max бағасы бұрынғыдай 1199 доллардан басталады. Бірақ Apple 2 ТБ жады бар жаңа топ-модель қосты.
— AirPods Pro 3 жаңа функциясымен ерекшеленді — ол шет тілдердегі әңгімелерді нақты уақыт режимінде аударады. Бағасы өзгермей, 249 доллар болып қалды.
— Apple Watch Series 11 үш жаңа модельмен шықты. Оның ішінде SE және Ultra нұсқалары бар. Бағалар өзгерген жоқ. Жаңа функция қан қысымының жоғарылау қаупін машиналық оқыту арқылы анықтайды.
— Жаңа дизайндағы iOS 26 15 қыркүйектен бастап тегін жаңарту ретінде қолжетімді болады.
ЖИ жайлы не белгілі?
iPhone Air және iPhone 17 Pro модельдеріндегі жаңа A19 Pro чипі ЖИ өнімділігін күшейтуге арналған. Компанияның мәліметінше, чиптің жаңа кэштеу архитектурасы есептеу қуатын екі есе арттырады. Сонымен бірге графикалық процессорға ЖИ тапсырмаларына арналған арнайы жылдамдатқыштар орнатылған.
Apple бұл чип үлкен тілдік модельдерді (LLM) бұлтқа қосылмай-ақ жергілікті құрылғыда іске қосуға мүмкіндік береді дейді. Жаңа iPhone өткен жылғы модельдерге қарағанда үш есе көп графикалық есептеулерді орындай алады. Apple бұл қуатты MacBook Pro деңгейіне теңестірді. Бірақ компания бұл есептеулерде нақты қандай ЖИ қолданылатынын айтпады. Сарапшылардың пікірінше, дәл осы ЖИ саласындағы артта қалу Apple акцияларына қысым түсіріп отыр.
Сарапшылар не дейді?
Futurum Group бас директоры Даниэл Ньюманның айтуынша, iPhone 17-нің шығуы Apple үшін күрделі кезеңге сәйкес келіп отыр. Себебі компанияның ЖИ саласындағы стратегиясы көп сұрақ туғызуда.
«Apple-дің басты мәселесі — бүгін көрсетілгеннің бәрі шағын ғана қадам алға ұқсайды. Иә, смартфон жұқа әрі сәнді көрінеді. Бірақ нағыз үлкен серпілісті біз төрт жылдан бері көрген жоқпыз», — деді ол CNBC эфирінде.
