Jefferies: Apple акциялары 17 пайызға төмендеуі мүмкін
Jefferies компаниясының сарапшысы Apple акциялары шамамен 17 пайызға арзандауы мүмкін деп болжайды. Оның айтуынша, Дональд Трамп әкімшілігінің сауда саясаты мен iPhone 17 смартфондарына деген сұраныстың баяулауы компания үшін негізгі қауіпке айналуда. Сарапшы Apple акцияларының қазіргі бағасын тым жоғары әрі тартымсыз деп бағалайды. Себебі компания өндіріс шектеулері мен маржаға қысым сияқты қиындықтарға тап болып отыр.
Егжей-тегжейі
Jefferies сарапшысы Эдисон Ли Apple акцияларының мақсатты бағасын 205,2 доллардан 203,1 долларға дейін төмендетіп, рейтингін «нарықтан төмен» (Underperform) деңгейінде қалдырды, деп хабарлады CNBC. Оның есебінше, акциялар 10 қазандағы жабылу бағасынан шамамен 17 пайызға төмендеуі мүмкін. Сарапшының пікірінше, қазіргі жағдайда Apple қағаздарына жоғары баға берілген, ал алда «өсуден гөрі құлдырау ықтималдығы басым».
Лидің айтуынша, Apple үшін басты қауіп – Трамп әкімшілігінің сауда саясаты. Jefferies болжамынша, Трамп Қытайдан әкелінетін смартфондарға арналған баж салығынан босату шешімін қайта қарауы мүмкін. «Трамп Қытай импортына қосымша 100 пайыздық салық енгізетінін мәлімдегеннен кейін, смартфондарға берілген жеңілдіктер сақтала ма, белгісіз болып қалды», – дейді Ли CNBC келтірген есебінде.
Сондай-ақ сарапшы iPhone 17 сатылымының баяулауы да нарық үшін жағымсыз белгі екенін айтты. Бұған дейін Ли жаңа үлгілерге байланысты күтілімдердің тым жоғары екенін атап, компания рейтингін төмендеткен еді. Оның пікірінше, Қытайдағы өндіріс көлемін Үндістан есебінен толықтыру мүмкін емес, бұл жеткізу тізбегіне қауіп төндіреді. Сонымен қатар, АҚШ билігі өндірістің бір бөлігін ел ішінде орналастыруды талап етуі мүмкін, әсіресе Қытаймен сауда шиеленісі ушығып жатса. Сарапшының айтуынша, жаңа iPhone 17 құрылғыларының пайда маржасы да қысымға ұшырауы ықтимал, себебі компоненттердің бағасы қымбаттап, сату құрылымы өзгерген.
Акциялар жағдайы
13 қазандағы сауда кезінде Apple акциялары 2 пайызға дейін өсіп, 249,7 долларға жетті. Бұл өсім Трамптың Қытайға қарсы 100 пайыздық салық енгізу туралы мәлімдемесін жұмсартуы мүмкін деген үмітпен байланысты.
2025 жылдың басынан бері Apple компаниясының нарықтық құны аздап төмендеді. Ал АҚШ-тың негізгі S&P 500 индексі сол кезеңде шамамен 13 пайызға өскен.
Басқа сарапшылар пікірі
8 қазанда UBS сарапшысы Дэвид Вогт Apple акциялары бойынша бейтарап рейтингті (Neutral) растады және мақсатты бағаны 220 доллар деңгейінде қалдырды. Бұл ағымдағы бағадан шамамен 10 пайыз төмен. UBS есебінше, жаңа iPhone 17 сериясы былтырғы тенденцияны қайталауы мүмкін. Егер Apple қосымша жеңілдіктер мен акциялар ұсынбаса сұраныс күткен деңгейде болмай, жеткізу мерзімдері тұрақтанады немесе қысқарады.
MarketWatch дерегіне сәйкес, соңғы үш айда Apple акциялары бойынша «сатып алу» ұсынымдары екіге азайып, бейтарап бағалар үшеуге артқан. Қазіргі кезде сарапшылардың шамамен 60 пайызы акцияларды сатып алуға кеңес береді (Buy және Overweight), 35 пайызы бейтарап позиция ұстанады (Hold), ал қалғандары сатуға шақырады. Уолл-стриттің орташа мақсатты бағасы — бір акцияға 251 доллар, бұл қазіргі нарықтық бағаға жуық.
