Jefferies мұнай бағасының арзандауынан ұтатын үш бенефициарды атады
Jefferies банкінің сарапшылары мұнай бағасының төмендеуі бірқатар технологиялық және тұтынушылық сектордағы компаниялардың акцияларына айтарлықтай көмектесуі мүмкін деп есептейді. Бағаның төмендеуі энергетика секторындағы ойыншыларға соққы болса, кейбір басқа секторлардың өкілдері едәуір ұтуы көруі мүмкін, деп жазды банк сарапшылары.
Егжей-тегжейлі
Jefferies сарапшылары мұнайдың арзандауынан пайда көретін компаниялардың қатарында графикалық процессор өндірушісі Advanced Micro Devices компаниясын атады. Олар AMD акцияларының мақсатты бағасын $100-ден $160-қа дейін көтерді, ал компания акциялары жыл басынан бері 30% қымбаттады. 10 шілдеде HSBC де өз бағалауына түзету енгізіп, таргетті бірден $200-ге дейін көтерді және чипмейкерге берілген рейтингті «ұстау» деңгейінен «сатып алуға» дейін жақсартты. HSBC сарапшысы Фрэнк Ли компания бағасының салыстырмалы түрде төмен екенін және MI400 сериялы чиптердің 2026 қаржы жылында іске қосылуы мен жасанды интеллект сегментіндегі сұраныстың артуы есебінен пайда өсетінін атап өтті.
Jefferies пікірінше, мұнай бағасының одан әрі төмендеуі жағдайында бұлтты қызметтер ұсынатын Datadog компаниясының акциялары да тартымды болып қала береді. Жыл басынан бері құны небәрі 1% артқанымен, сарапшылар оның динамикасы алдағы уақытта жеделдеуі мүмкін деп болжайды. Wolfe Research сарапшылары Нью-Йоркте Datadog басшылығымен өткен кездесуден кейін оның рейтингін «бейтарап» деңгейден «нарықтан жоғары» деңгейге көтеріп, жасанды интеллектке қатысты кең ауқымды бастамаларды ерекше атап өтті. Олардың пікірінше, Datadog — бұл жай ғана қайта жанданған ойыншы емес, технологиялық молшылығындағы толыққанды қатысушы. Олар акциялардың мақсатты бағасын $150 деп бағалады.
Jefferies назарына іліккен тағы бір компания — киберқауіпсіздік шешімдерімен танымал Zscaler. 2025 жылы оның акциялары 60% қымбаттады, ал Wells Fargo маусымда рейтингті «бейтараптан» «нарықтан жоғарыға» өзгертіп, таргетті $260-тан $385-ке дейін көтерді. Бұл — ағымдағы котировкалармен салыстырғанда шамамен үштен бірге өсім әлеуеті бар деген сөз. Сарапшылар негізгі драйвер ретінде жаңа өнімдер бойынша сатылымдардың күшті динамикасын, сондай-ақ 2026 қаржы жылында жазылымдардың 20%-дан астам өсетінін атап отыр.
Мұнай бағасының әсері қандай?
Тарихқа көз жүгіртсек, мұнай бағасының айтарлықтай түзетулерге ұшыраған кезеңдері көбінесе технологиялық сектор мен бірінші қажеттіліктегі емес тұтыну тауарлары сияқты бастапқыда айқын емес салаларда пайда мен котировкалардың жақсы динамикасымен тұспа-тұс келген. «Егер кеңірек нарықтық контекстті алсақ, мұнай бағасының қысқа мерзімді әлсіздігі және ағымдағы деңгейде тұрақтануы америкалық акциялар үшін қолайлы жел бола алады», — деп атап өтті Jefferies сарапшылары.
Еуропа орталық банкінің (ЕОБ) зерттеуіне сәйкес, мұнай бағасының жоғары болуы қор нарықтарына тежеуші әсер етеді, ал бағаның төмендеуі керісінше өсімге ықпал етеді. Бір жағынан, қымбат отын экономикалық өсімге деген болжамдарды төмендетіп, инфляциялық күтулерді арттырады, бұл өз кезегінде компаниялардың күтілетін пайдасының қысқаруына әкеледі, өйткені шығындар маржаға қысым жасайды. Екінші жағынан, бағадағы жоғары құбылмалылық акциялар үшін тәуекелге қатысты премияны ұлғайтады, ал нақты ұзақ мерзімді пайыздық мөлшерлемелердің төмендеуі белгілі бір қолдау әсеріне ие болғанымен, аталған факторларды толығымен өтей алмайды. Зерттеу мәліметіне сай, жоғары мұнай бағасы кезінде кірістіліктің ең көп төмендеуі тұтыну тауарлары, технология және телекоммуникация секторларында байқалады, бұл аталған салалардың мұнай бағасына деген жоғары сезімталдығын көрсетеді.
Қазір мұнай қанша тұрады?
Жыл басынан бері WTI маркалы мұнай фьючерстері барреліне шамамен $80-дан $66-ға дейін төмендеді. Бұл төмендеуге жаһандық сауда соғысының ушығуы мен Дональд Трамп әкімшілігінің жаңа баж салығын енгізуі, сондай-ақ ОПЕК+ елдерінің мұнай өндіруге қойылған шектеулердің бір бөлігін алып тастау туралы шешімі себеп болды. Jefferies сарапшыларының пікірінше, бұл факторлар алдағы уақытта да өзектілігін жоғалтпайды, сондықтан мұнай бағасы төмен деңгейде қала беруі мүмкін.
