JPMorgan адам тәрізді роботтарға инвестиция салудан пайда көретін компаняларды атады
JPMorgan Chase адам тәріздес роботтар өндірушілерінің акцияларын атады, оларды сатып алу керек деп санайды, өйткені Илон Маск осы технологияға үлкен сенім артып, оны Tesla компаниясының болашақ дамуымен байланыстыруда. Уолл-стриттегі ең ірі банк Қытайдағы бірнеше компанияларға назар аударды, олар осы трендтің негізгі бенефициарлары бола алады.
Егжей-тегжейлі
JPMorgan төрт қытайлық компанияны ерекшелеп, олардың акцияларына «нарықтан жоғары» (overweight) рейтингісін берді: UBTech Robotics, Zhejiang Sanhua Intelligent Controls, Leader Harmonious Drive Systems және Jiangsu Hengli Hydraulic. CNBC-дің хабарлауынша осы компаниялардың акциялары «сала трансформациясынан және алдыңғы қатарлы робототехника шешімдеріне сұраныстың өсуінен пайда көруге толық мүмкіндігі бар», деп жазылған инвестбанктың 4 қыркүйектегі аналитикалық есебінде.
«2025 жыл адам тәрізді роботтар индустриясы үшін маңызды кезең болды: тапсырыстар көлемі мен келісімшарттардың құны күрт өсті, нарықтың назарын тек ғылыми-зерттеу және тәжірибелік-конструкторлық жұмыстардан нақты жеткізілімдер мен қолданбалы мүмкіндіктерге аударды», — деп атап өтті JPMorgan аналитиктері. Олардың пікірінше адам тәрізді роботтар индустриясының болашағы енді тек зертханалық әзірлемелерге ғана емес, сондай-ақ әзірлеушілердің клиенттер үшін бәсекеге түсуі мен өнімдерін нарыққа шығаруының тиімділігіне де байланысты. Биыл наурызда CNBC хабарлағандай, қытайлық компаниялар, әсіресе коммерцияландыру және баға белгілеу мәселелерінде, америкалық бәсекелестерінен озып кетті.
Контекст
Tesla басшысы Илон Маск осы аптада Optimus роботтары ақыр соңында оның компаниясының нарықтық құнының шамамен 80%-ын қамтамасыз ететінін мәлімдеді. Бұл батыл болжам UBTech компаниясының әлемдегі ең ірі бір реттік адам тәрізді роботтар жөнелту тапсырысын — 35 миллион долларды алуымен тұспа-тұс келді.
Tesla-ның жаңа бас жоспары (Master Plan IV) электромобиль өндірушінің жасанды интеллект пен робототехникаға стратегиялық бетбұрыс жасағанын көрсетеді, ал жаңа автокөліктерді әзірлеу туралы жобада дерлік айтылмайды, деп жазады Benzinga. Дегенмен, Масктың робототехникаға көңіл бөлуі Tesla-ның негізгі бизнесіндегі күрделі мәселелермен қатар келіп отыр. Шілдеде компанияның Еуропадағы электромобиль жеткізілімдері 40%-ға төмендеген болса, қытайлық BYD компаниясында ол 225%-ға өсті. Осыған жауап ретінде Tesla Қытайдағы Model 3 Long Range бағаларын төмендетті және АҚШ-та алғашқы төлемсіз екінші қол автокөліктерін лизингке беру бағдарламасын іске қосты.
Gerber Kawasaki инвестициялық компаниясының өкілі Росс Гербер Масктың стратегиясына күмән келтірді. «Егер адамдар оның автокөліктерін сатып алмаса, неге олар үйіне үлкен роботты сатып алуы керек? Немесе оның таксиін неге пайдалануы керек? Әсіресе басқа жақсы және баламалы нұсқалар бар кезде», — деп жазды ол X әлеуметтік желісінде.
Акцияларға не болды
UBTech акциялары Гонконг қор биржасында саудаланады. Sanhua Intelligent, Leader Drive және Hengli Hydraulic акциялары Қытайдың материктік бөлігіндегі – Шанхай және Шэньчжэнь биржаларында тіркелген, бұл шетелдік инвесторлар үшін олардың сатып алуын қиындатады (ҚХР-да шетелдік бөлшек инвесторлардың юаньмен саудаланатын материктік акцияларға тікелей қолжетімдігі шектеулі).
2025 жылдың басынан бері UBTech акцияларының бағасы шамамен екі есе өсті. Sanhua Intelligent, Leader Drive және Hengli Hydraulic бағамдары сәйкесінше 31%, 36% және 67%-ға қымбаттады. FactSet деректеріне сәйкес, аналитиктердің басым көпшілігі — 24-тен 22-сі — Sanhua Intelligent акцияларын сатып алу жөнінде кеңес береді (Buy және Overweight рейтингтері). UBTech, Leader Drive және Hengli Hydraulic акциялары бойынша инвестициялық рейтингтер сервис тарапынан қадағаланбайды.
Tesla акциялары биыл 16%-ға арзандады. Соңғы айларда аналитиктер оларды орташа есеппен тартымды инвестиция деп отырған жоқ, бірақ сату туралы кеңес бермейді (Hold консенсус-рейтинг). FactSet-тің есептеуінше, акцияның орташа мақсаттық бағасы 313,9 доллар шамасында, бұл келесі 12 айда Tesla бағамдарының шамамен 7%-ға төмендеуін болжап отыр.
