JPMorgan геосаяси бөлім ашты — Даймон ескерткен тәуекелдер негізінде
JPMorgan Chase геосаяси тәуекелдер жағдайында клиенттеріне қолдау көрсету үшін арнайы бөлім жасақтады. Банк басшысы Джейми Даймонның айтуынша, қазіргі геосаяси жағдай — оның мансабындағы ең ауқымды қауіптердің бірі.
Егжей-тегжейлі
АҚШ-тағы актив көлемі жағынан ең ірі банк — JPMorgan Chase клиенттерге геосаяси тәуекелдер жағдайында бағдар беру мақсатында «Геосаясат орталығы» (Center for Geopolitics, CfG) құрылып жатқанын мәлімдеді. CfG сайтында Ресей мен Украина арасындағы қақтығыс, Таяу Шығыстағы жағдай және жаһандық қарулану тақырыптарын қамтыған алғашқы сараптамалық материалдар жарияланды. Мұндай есептер тоқсан сайын шығарылады және болашақта популизм мен жасанды интеллект секілді өзекті мәселелер де қамтылады. Сонымен қатар орталық басшылығы іс-шараларға қатысып, клиенттермен жеке кездесулер өткізуді жоспарлап отыр.
«Біз жаһандық экономикалық белгісіздік жағдайында бизнес көшбасшыларының қысқа және ұзақ мерзімді стратегияларын қайта қарап, тәуекелдер мен мүмкіндіктерді бағалап жатқанын көріп отырмыз», — деп атап өтті CfG орталығының басшысы Дерек Чоллет банк таратқан хабарламада. Бұған дейін ол Пентагонда, Мемлекеттік департаментте, Ақ үйде, Конгрессте және жетекші зерттеу орталықтарында маңызды лауазымдарда қызмет атқарған.
«JPMorgan-ның әлеуетін ескере отырып, біз клиенттерге бизнес шешімдерді дәлелді түрде қабылдап, олардың коммерциялық және бәсекелік артықшылықтарын арттыруға, сонымен қатар акционерлер үшін қосымша құн құруға көмектесе алатын бірегей позициядамыз», — деді Чоллет.
Контекст
JPMorgan басшысы Джейми Даймон жаһандық тәуекелдер туралы бірнеше рет ескерткен. 19 мамырда өткен инвесторлар күні барысында ол геосаяси тәуекелдердің «өте, өте жоғары» екенін атап өтті. Даймон бұл қауіп-қатерлерге алғаш рет 2022 жылы Ресей мен Украина арасындағы қақтығыс басталғаннан кейін назар аудара бастаған, деп жазады Bloomberg. Ал 2024 жылдың төртінші тоқсанындағы есепте ол қазіргі әлемдік ахуалды Екінші дүниежүзілік соғыстан бергі ең күрделі әрі қауіпті кезең деп атады.
«Бизнес көшбасшылары жаһандық бәсекелестік жағдайында, технологиялық өзгерістердің жойқын қарқыны, ұзаққа созылған экономикалық белгісіздік пен геосаяси дағдарыстар аясында әрекет етуге мәжбүр», — делінген JPMorgan таратқан баспасөз хабарламасында Даймонның сөзіне сілтеме жасай отырып. — «CfG бұл жағдайда клиенттерімізге стратегиялық пайым, тәжірибеге негізделген кеңес және деректерге сүйенген талдау ұсыну арқылы көмектеседі».
