«Қауіп-қатер әлі де жоғары»: АҚШ-тың бес ірі банкінің үшеуі есеп берді
АҚШ-тың ірі банктері екінші тоқсанға арналған қаржылық есептерін жариялай бастады. Бұл кезең нарықтағы тұрақсыздықпен ерекшеленді — сауда шиеленістері мен саяси жағдайдың ушығуы инвесторлар сеніміне әсер етті. Ірі бес банктің үшеуі, яғни JPMorgan, Wells Fargo және Citigroup сарапшылардың табыс пен пайда жөніндегі болжамдарынан асып түсті. Алайда пайыздық табыстар бойынша мәліметтер әртүрлі бағаланып, инвесторлардың алаңдаушылығын туғызды. JPMorgan басшысы АҚШ экономикасының тұрақтылығына қауіп төндіретін факторлар әлі де бар екенін ескертті.
Егжей-тегжейі
JPMorgan. Елдегі ең ірі банк екінші тоқсанда Уолл-стриттің болжамдарынан жоғары нәтиже көрсетті: акцияға шаққандағы пайда — $5,24 (болжам — $4,48). Алайда таза пайда жылдық есеппен 17%-ға қысқарып, $15 млрд болды. Банк бұл төмендеуді $774 млн салықтық жеңілдікпен байланыстырды. Ол акция үшін қосымша $0,28 табыс әкелді.Тоқсандық түсім — $44,9 млрд, бұл FactSet болжаған көрсеткіштен 2,5% жоғары, бірақ өткен жылдың сәйкес кезеңімен салыстырғанда 11%-ға төмен.Таза пайыздық табыс — банктің несие секілді өнімдерінен түсетін және өзі төлейтін пайыз арасындағы айырмашылық — 2%-ға өсіп, $23,3 млрд болды. Банк 2025 жылға арналған таза пайыздық табыс болжамын да көтерді.Бас директор Джейми Даймон АҚШ экономикасы тоқсан бойы «тұрақты» болғанын айтты. Алайда ол сауда белгісіздігі, геосаяси шиеленістер, бюджет тапшылығы және активтер бағасының шамадан тыс өсуі сияқты тәуекелдердің сақталып отырғанын атап өтті. «Біз жақсылыққа үміттенеміз, бірақ кез келген сценарийге дайынбыз», — деді ол.
Wells Fargo. Банк те табыс пен түсім бойынша сарапшылар болжамынан жоғары нәтиже көрсетті: акцияға шаққандағы пайда — $1,6 (болжам — $1,41), түсім — $20,8 млрд (болжам — $20,7 млрд). Қосымша $253 млн пайда бірлескен бизнестегі үлесті қайтарып алудан түсті.Алайда таза пайыздық табыс 2%-ға азайып, $11,7 млрд болды (күтілген — $11,8 млрд). Бұған пайыздық мөлшерлемелердің өзгеруі мен депозит құрылымындағы ауысым әсер етті. Осыған байланысты банк жылдық болжамын төмендетті.Бас директор Чарли Шарф бизнес белсенділігі мен несие портфелінің сапасы «тұрақты деңгейде» екенін айтты. Ол ФРЖ шектеуін алып тастағаннан кейін банк клиенттермен және қоғаммен жұмысын күшейтетінін мәлімдеді.
Citigroup. Citigroup те табыс пен түсім бойынша Уолл-стриттің күткенінен жоғары нәтиже көрсетті. Акцияға шаққандағы пайда — $1,96 (күтілген — $1,61), түсім — $21,7 млрд (жылдық өсім — 8%).Таза пайда — $4 млрд, бұл өткен жылмен салыстырғанда 25%-ға артық. Таза пайыздық табыс 12%-ға өсті.Бас директор Джейн Фрейзер корпоративтік қызмет көрсету бағытының табыстылығы жоғары екенін және акциялар нарығындағы нәтиже рекордтық деңгейге жеткенін атап өтті.
BlackRock. Әлемдегі ең ірі инвестициялық компания BlackRock аралас нәтиже көрсетті. Табыс — $10,19 (күтілген — $10,06), түзетілген EPS — $12,05 (болжам — $10,78).Алайда түсім $5,42 млрд болып, болжамнан төмен қалды. Активтер көлемі 18%-ға артып, $12,5 трлн-ға жетті. Екінші тоқсанда $68 млрд жаңа қаржы тартылды, бірақ бір ірі клиенттің $52 млрд-ты алып кетуіне байланысты бұл көрсеткіш күткеннен төмен болды.
Bank of New York Mellon. BNY Mellon-ның екінші тоқсандағы пайдасы — $1,93 (болжам — $1,75), түсімі — $5 млрд (болжам — $4,78 млрд). Таза пайыздық табыс 17%-ға өсіп, $1,2 млрд болды. Банк басқаруындағы активтер 13%-ға артып, $55,8 трлн болды — бұл оны әлемдегі ең ірі кастодиан етеді.
Нарық қалай қабылдады?
JPMorgan акциялары 1% төмендеді, бірақ жыл басынан бері 20% өскен.Wells Fargo құнды қағаздары 5% төмендеді. Бұл үш аптадағы ең төменгі көрсеткіш, бірақ жыл басынан бері 12% жоғары.BlackRock акциялары 7% төмендеп, маусым соңынан бергі ең төменгі деңгейге жетті.BNY Mellon акциялары өзгеріссіз қалды, жыл басынан бері 24%-ға өсті.Citigroup есептен кейін 3,6%-ға қымбаттап, 2008 жылдан бергі ең жоғары деңгейге жетті. Жылдық өсім — 27%.
