Қымбат ЖИ-инвестициялар Alphabet, Meta және Amazon-ға қалай соққы болады?
Alphabet, Amazon және Meta-ның жасанды интеллектке рекордтық инвестицияларының артында жаңа қаржылық тәуекелдер тұр, деп санайды Bank of America. Дата-орталықтар мен графикалық процессорлар пайдалануға берілген сайын амортизацияның жедел қарқыны ЖИ-дан түсетін табыс өсімін басып озып, компаниялардың пайда көрсеткішіне қысым түсіруі мүмкін.
Егжей-тегжейлі
Ірі технологиялық компаниялардың жасанды интеллектке салған орасан инвестициялары жасырын шығындарға ие, ал оны Уолл-стриттегі көп сарапшылар елемей жүр, деп жазады MarketWatch.
Мәселен, Alphabet, Amazon және Meta Platforms жыл соңына дейін инфрақұрылымды күшейту үшін жиынтық $274 млрд көлемінде капиталдық салым жасамақ. Ал 2026 жылы бұл сома тағы 33% өсіп, $333 млрд-қа жетеді деп болжайды Bank of America. Алайда мұндай шығындар есептілікте бірден көрсетілмейді: компаниялар оларды бірнеше жылға бөліп, активтердің амортизациясы мен тозуы арқылы таратады — мысалы, дата-орталықтар немесе графикалық процессорлар. Егер бұл шығындар ЖИ-дан түсетін табыстан жылдам өссе немесе жабдықтың қызмет ету мерзімі күткеннен қысқа болса, ол акция бағасына қысым түсіруі мүмкін, деп түсіндіреді басылым.
Bank of America ескертуі
BofA сарапшысы Джастин Посттың айтуынша, қазіргі сәтте нарық болжамдары ЖИ-ға салынған инвестициялық циклдің ауқымын толық көрсетпей отыр. «Уолл-стрит амортизациялық шығындардың өсуін есепке алуда әлі де артта қалып келеді», — деді ол 16 қыркүйектегі жазбасында, деп жазады MarketWatch. Сарапшының ескертуінше, осы шығындарды дұрыс бағаламау технологиялық алыптардың пайда көрсеткішін шындыққа қарағанда жоғары етіп көрсетеді және ЖИ айналасында «көпіршік» қалыптастыруы мүмкін.
BofA жуырда Meta компаниясының 2026 және 2027 жылдардағы амортизациялық шығындары бойынша болжамын көтерді. Посттың сөзінше, Meta, Alphabet және Amazon-да амортизация 2026 жылы жаңа инфрақұрылым нысандары іске қосылғанда жеделдейді, бұл қосымша операциялық шығынға қысым түсіреді. 2027 жылы Alphabet үшін BofA мен Уолл-стрит консенсус-болжамы арасында $7 млрд айырмашылық туындауы мүмкін, деп көрсетеді MarketWatch. Amazon мен Meta үшін бұл алшақтық сәйкесінше $5,9 млрд және $3,5 млрд болуы ықтимал.
Капиталдық салымдардың негізгі бөлігі техникалық инфрақұрылым сатып алуға, соның ішінде Nvidia графикалық процессорларына бағытталуда. Посттың пікірінше, GPU-дың қызмет ету мерзімі дәстүрлі чиптерге қарағанда қысқа болуы мүмкін, себебі жүктеме жоғары және ЖИ-инновацияларының қарқыны жабдықты тезірек ескіртіп жібереді.
Соңғы бес жылда керісінше Amazon, Meta және Alphabet серверлік және желілік жабдықтың қызмет ету мерзімін ұзартып, шығынды ұзақ уақытқа бөлуге тырысқан. Бірақ Посттың байқауынша, бұл үрдіс өзгеріп келеді. Мәселен, биылғы жылдың басында Amazon серверлер мен желілік активтердің бір бөлігінің қызмет ету мерзімін алты жылдан бес жылға қысқартты.
Акцияның жай-күйі
Alphabet пен Meta акциясы жыл басынан бері шамамен үштен бірге қымбаттады, ал Amazon котировкасы 6%-ға жетпей өсті. Үш компанияның әрқайсына Уолл-стриттегі ұсыныстардың басым бөлігі — олардың қағазын сатып алу жөнінде. Сарапшылар ең үлкен перспектива Amazon-да деп санайды: сарапшылардың 93%-ы оны сатып алуды ұсынды.
