Қытай АҚШ тауарларына 84% кедендік алым енгізді. Акциялар мен мұнай арзандады
Сәрсенбі, 9 сәуірде, АҚШ Қытайдан келетін тауарларға 104% көлеміндегі кедендік баж салығын күшіне енгізді
АҚШ президенті Дональд Трамп енгізген жаңа сауда шектеулеріне жауап ретінде Қытай америкалық тауарларға кедендік баж салығын 84%-ға дейін көтеретінін мәлімдеді. Бұл әлемдегі ең ірі екі экономиканың арасындағы сауда соғысын одан әрі ушықтыра түсті.
Толығырақ
АҚШ президенті Дональд Трамп Қытай өнімдеріне 104% кедендік алым енгізгеннен кейін бірнеше сағат ішінде Қытай да жауап берді. 10 сәуірден бастап АҚШ-тан импортталатын тауарларға баж салығы 34%-дан 84%-ға дейін өседі. Бұл туралы Қытай Мемлекеттік кеңесінің Тарифтік комиссиясы хабарлады, деп жазады CNBC. Сауда қақтығысының мұндай ауқымды ушығуы екі ел арасындағы сауданы мүлдем тоқтатуы мүмкін, деп бағалайды сарапшылар.
Қытай сонымен қатар, АҚШ-ты Дүниежүзілік сауда ұйымына (ДСҰ) беретінін мәлімдеп, алты америкалық компанияны сенімсіз ұйымдар тізіміне, ал тағы 12-сін экспорттық бақылау тізіміне енгізгенін айтты (Bloomberg дерегі).
Нарық қалай жауап беруде
Жаңалықтар шыққаннан кейін еуропалық Stoxx Europe 600 индексі 4%-дан астам төмендеді (Bloomberg).
АҚШ-тың негізгі индекстеріне арналған фьючерстер де құлдырады: Dow Jones және S&P 500 – шамамен 2%-ға, Nasdaq-100 – 1,6%-ға төмендеді.
Ең көп зардап шеккен салалардың бірі — бөлшек сауда. Себебі ол Қытайдан келетін импортқа қатты тәуелді. Target, Best Buy және Home Depot акциялары премаркетте шамамен 3% жоғалтты.
Bloomberg мәліметінше дамушы нарықтар индексі — MSCI — 1%-дан астам төмендеп, 2024 жылғы ақпан айынан бергі ең төменгі деңгейге жетті.
Мұнай бағасы да құлдырады — 2021 жылдың басындағы деңгейге түсіп, Пекиннің мәлімдемесінен кейін төмендеу одан әрі тереңдеді.
