Қытай акциялары Трамптың 145%-дық баж салығына төтеп бере алды

АҚШ-тың Қытай тауарларына салған баж салығы 145%-ға жетті, бірақ Қытайдың қор нарығы жаңалыққа сабырмен жауап берді. Бұған Пекиннің жаңа ынталандыру шараларын енгізер деген үміт пен екі ірі экономиканың көшбасшылары арасында келіссөздер ойдағыдай өтеді деген сенім әсер етуде.

Толығырақ

Гонконгтағы Hang Seng China Enterprises индексі 11 сәуірде сауданың ашылуында 0,9%-ға төмендегенімен, түскі уақытқа қарай 1%-ға өсті. Континенттік Қытайдағы CSI 300 индексі 0,1%-ға төмендегенде, Shanghai Composite индексі дәл сондай деңгейде өсті. Қытайлық индекстер жалпы Азия нарығынан тұрақтырақ болды, өйткені ол бастапқы саудада 2,1%-ға төмендеді.

Қытайдың қор нарығындағы бұл құбылмалылық Ақ үйдің түсініктемесіне байланысты болды. 2025 жылдың басында енгізілген 20%-дық ставкамен бірге, Қытай тауарларына салынған жалпы баж салығы 145%-ға жетті. Бұл көрсеткіш көптеген экономистердің пікірінше АҚШ пен Қытай арасындағы сауданы құлдыратуға әкелуі мүмкін.

Инвесторлардың cабырлы реакциясы «жұмсақтық танытар» деген үмітті білдірсе керек — Дональд Трамп сауда шектеулерін кейбір компаниялар мен елдерге қатысты жеңілдетуге дайын екенін айтты. Қытай билігі «соңына дейін күресуге» уәде берсе де, келіссөздерге дайын екендіктерін білдірді. Осының аясында Қытай мемлекеттік қорлары жергілікті акциялар мен ETF-терді сатып алып, нарықты қолдады.

11 сәуірде жапондық акциялар алдыңғы сессияда қалыпқа келгеннен кейін қайтадан теріс мәнге ие болды. Экспортқа бағытталған Nikkei 225 индексі 5%-ға төмендеді, себебі инвесторлар экономикалық болашаққа қатысты белгісіздікке байланысты пайданы қоса бастады. Bloomberg деректері бойынша индекс қысымына иенаның нығаюы да әсер етті, өйткені ол доллармен салыстырғанда бір түнде 2%-дан астам өсті.

Сарапшылардың пікірі

Қытайдың ішкі нарығындағы сауда көлемі артып келеді, «ұлттық команда» белсенді жұмыс істеуде, деп жазады Bloomberg Morgan Stanley зерттеуіне сілтеме жасап. Бірақ банк экономистері: Қытай компанияларының пайдасының төмендеу тәуекелдері сақталуда, жағдай екінші тоқсанда айтарлықтай нашарлауы мүмкін, деп ескертеді.

BCA Research компаниясының басты жаһандық стратегі Питер Березиннің айтуынша егер сауда соғысының эскалациясы тез бәсеңдемесе, алдағы бірнеше айда АҚШ пен әлемнің көп бөлігі рецессияға түседі. Ол инвесторларға әлі де қорғаныс стратегиясын ұстануға кеңес береді.

SPI Asset Management директоры Стивен Иннес Қытай мен АҚШ арасындағы экономикалық байланыс толық тоқтауы мүмкін екенін айтты. «Ешкім әзірше тежегішті баспай отыр», — дейді ол.

Контекст

10 сәуірде Уолл-стритте АҚШ-тың барлық елдерге салынған жоғары импорттық салықтарды тоқтату туралы хабарлардан кейінгі эйфория жаңа сату толқынына ұласты, себебі Ақ үй Қытайға қарсы баж салығын 145%-ға көтергенін мәлімдеді. S&P 500 индексі 3,5%-ға төмендеді, ал доллар 2022 жылдан бергі ең нашар күнге тап болды.