Кэти Вуд: Трамптың саясаты бизнесті және инвесторларды қолдайды
Басқалар кедендік баж салығынан қауіптеніп жатқанда, ARK Invest қорларының негізін қалаушы Кэти Вуд өсімнің басталғанын көріп отыр. Ол жасанды интеллектке, медицинаға және негізгі индекстерге кірмейтін компанияларға сенім артады.
Кэти Вуд АҚШ экономикасының болашағына оң көзқараспен қарап отыр, тіпті Дональд Трамп енгізген сауда шектеулеріне қарамастан. Bloomberg Television арнасына берген сұхбатында ол бұл саясаттың нәтижесі экономикаға соққы емес, керісінше, бизнес үшін салықтық жеңілдіктер болады деп есептейді. Оның айтуынша, тарихтағы ең ірі технологиялық цикл денсаулық сақтау саласындағы жасанды интеллектпен, мемлекеттік шығындарды реформалаумен және Big Tech-тен тыс инновацияларды қайта бағалаумен енді ғана басталды. Инвесторларға S&P 500 индексінен тыс жерлерге назар аударуға кеңес береді — нақты өсім нүктелері дәл сонда дейді Вуд.
АҚШ экономикасы: рецессия емес, қайта іске қосу
Көпшілік Трамп әкімшілігінің сауда саясатын тұрақсыздық әкелетін қадам деп бағаласа, Кэти Вуд бұл қатқыл риторика ұзақ келіссөздерге жол ашып, кедергілерді азайтып, америкалық экспорттың шетелдік нарықтарға жолын кеңейтті деп есептейді. Нәтижесінде экономика күтпеген қолдауға ие болуы мүмкін. «Компаниялардың шығындары төмендегенде қосымша ресурстар пайда болады. Бұл салықтық жеңілдік сияқты әсер етеді: инвестиция мен кеңеюді ынталандырады», — дейді ол.
Кэти Вудтың айтуынша, бұл ынталандырулар тек сыртқы саудамен шектелмей, салық жүйесіне де әсер етті. Бұрынғы 35 пайыздық корпоративтік салық мөлшерлемесі америкалық компанияларды бәсекеге қабілетсіз етіп, олардың шетелге кетуіне себеп болған. Ал Трамптың алғашқы президенттік мерзімінде (2017 жылы) салық мөлшерлемесі 21 пайызға дейін төмендеген. «Компаниялар шетелге кетіп жатқан еді, енді бизнес қайта оралып жатыр, ал кіріс көлемі 200 миллиард доллардан 500 миллиард долларға дейін өсті», — деді Вуд.
Big Tech-тен тыс инновациялар
Кэти Вудтың айтуынша, шығындарды төмендетудің әсері әсіресе жасанды интеллекттің дамуында айқын байқалады: «ЖИ модельдерін оқыту жыл сайын 75 пайызға арзандап жатыр, ал оларды ендіру — 85–95 пайызға дейін».
Дегенмен, инвесторлардың негізгі назары тым тар бағытта қалып отыр. «2019–2024 жылдар аралығында «Керемет алтылықтың» (Apple, Microsoft, Amazon, Alphabet, Meta және Nvidia) нарықтық капитализациясы бес есе өсті. Ал қалған технологиялық инновациялар нарығы бар болғаны 30 пайызға ғана өсті». Вудтың айтуынша, мәселе бұл алпауыттардың артық бағаланғанында емес, керісінше, көптеген перспективалы компаниялар назардан тыс қалып отыр.
«АҚШ нарығы кеңейеді. Бұрын артта қалған компаниялар енді мойындала бастайды», — дейді ол.
ARK Invest портфеліндегі компаниялар бағасының өзгеруі бұл үрдісті көрсетіп отыр. «Бұрын бұл акциялар S&P 500 индексінен 275 пайызға жоғары бағаланды, қазір бұл айырмашылық небәрі 10 пайыз. Бұл инновациялық сегменттің бағаланбай отырғанын білдіреді», — дейді Вуд. Оның пікірінше, дәл осындай теңгерімсіздіктер өсімнің жаңа кезеңінің бастаушысы болуы мүмкін.
Жасанды интеллект — мемлекеттік сектор мен денсаулық сақтауда
Кэти Вудтың бағалауынша, өсімнің негізгі бағыттарының бірі — мемлекеттік секторды цифрландыру. «Илон Маск мемлекеттік басқарудағы технологиялардың қаншалықты ескіргеніне таң қалған. Біз әлі де көптеген процестерді қолмен істейміз. Кейбір жүйелер 50–60 жылдан бері жаңартылмаған», — дейді ол.
Ол Palantir компаниясын мысалға келтіреді — бастапқыда АҚШ Қорғаныс министрлігімен жұмыс істей бастаған бұл компания қазір басқа федералдық мекемелерге де шешімдер ұсынып, жұмыстың тиімділігін едәуір арттырып жатыр.
Алайда Вудтың пікірінше, басты серпіліс денсаулық сақтау саласында болады: «ЖИ-дың ең терең және маңызды қолданбалары осы салада жүзеге асады. Адам ағзасында 37 триллион жасуша бар, ал қазір біз оларды егжей-тегжейлі зерттей аламыз».
Ол CRISPR Therapeutics компаниясын мысалға келтірді — бұл компания орақ тәрізді жасушалық анемия мен бета-талассемияны емдеумен айналысады. Қазіргі уақытта ол қандағы холестеринді төмендететін статиндердің орнына бір реттік әрі жанама әсері аз дәрі жасап жатыр.
Кэти Вудтың идеяларын қалай қолдануға болады
Кэти Вуд тұрақсыз макроэкономикалық жағдайда және капиталдың шектеулі компанияларға шоғырлануы кезінде инвестициялық көзқарасты қайта қарауға шақырады. Оның сұхбатына сүйене отырып, мынадай үш идеяны бөліп көрсетуге болады:
1. Соңғы жылдары нарықтағы негізгі өсім бірнеше ірі компаниямен ғана шектелді. Алайда Вудтың ойынша, келесі қайта бағалау толқыны әлдеқайда кең инновациялық бизнес секторын қамтуы мүмкін.
2. Бүгінде нарық ең алдымен инфрақұрылым мен қуат көздерін ұсынатын компанияларды бағалайды. Яғни нейрожелілер мен дата-орталықтарды қамтамасыз ететіндерге ерекше көңіл бөлінеді. Алайда ұзақ мерзімді перспективада нақты мәселелерді шешу үшін технологияны қолданатын компаниялар (медицина, логистика, басқару, білім беру салаларында) көбірек пайда әкеледі.
3. Денсаулық сақтау — ЖИ енгізу циклінің ең бағаланбаған бөлігі. Соған қарамастан нарық әлі де дәстүрлі фармкомпанияларға сеніп, жаңа ойыншыларды елемей отыр.
Кэти Вуд туралы не белгілі?
Кэти Вудтың әдісі — Уоррен Баффеттің құндық инвестициялау тәсіліне мүлде қарама-қайшы. Егер Баффет бағаланбаған компанияларды іздесе, ARK Invest негізін қалаушы болашағы зор, бірақ қазіргі кезде шығынға жұмыс істеп жатқан компанияларға инвестиция салуға дайын. Соңғы 12 айда оның флагмандық ARK Innovation ETF қоры шамамен 28 пайызға өсті, бірақ 2025 жылдың басынан бері аздаған минусқа кеткен.
MarketWatch дерегінше, наурыз айының соңындағы жағдай бойынша, қордың портфеліндегі ең ірі бес позиция: Tesla, Roku, Roblox, Coinbase және Palantir. Бұл бес компанияның ішінде ARK тек Coinbase-тегі үлесін арттырған, қалған акцияларды сатты. Өткен аптада Вуд TSMC-ке де ірі ставка жасағаны белгілі болды.
