Киев Трамппен жаңа бейбіт жоспар бойынша келіссөз жүргізуге келісті
Украина президенті Владимир Зеленский АҚШ әкімшілігімен бейбіт реттеу жоспары бойынша жұмыс істеуге дайын екенін мәлімдеді. Бұл жоспардың егжей-тегжейін бірнеше БАҚ дереккөздерге сілтеме жасап кеше жариялаған болатын. Bloomberg-тің хабарлауынша, Зеленский алдағы күндері бұл ұсыныстарды Дональд Трамппен талқылауға ниетті.
Бейсенбі күні Зеленский Киевте АҚШ армия министрі Дэн Дрисколлмен кездесті. Бұл туралы Украина президенті кеңсесінің Telegram-каналында хабарланды. Онда «шын бейбітшілікке қол жеткізу жолдары» және «дипломатияға жаңа серпін беру» мәселелері сөз болған. «Украина мен АҚШ командалары соғысты аяқтауға арналған жоспар тармақтары бойынша бірлесіп жұмыс істейді», — делінген хабарламада.
Axios-тың жазуынша, аты-жөні аталмаған америкалық шенеуніктің айтуынша, Зеленский мен Дрисколл бейбіт жоспарды қысқа мерзімде келісуге келіскен. Politico дерегіне сәйкес, бұл құжат апта соңына дейін мақұлдануы мүмкін.
Жоспарда не бар?
Украина парламентінің депутаты Алексей Гончаренко жариялаған құжатқа сәйкес, бейбіт жоспар 28 тармақтан тұрады. Онда мынандай ұсыныстар бар: Қырым, Донецк және Луганск облыстары де-факто Ресейге тиесілі ретінде мойындалады; Херсон мен Запорожье аймақтары «тоқтатылған мәртебе» алады және шеп бойындағы шекарада бекітіледі; Ресей бақылауында болатын демилитаризацияланған буферлік аймақ құрылады; Екі тарап та күш қолдану арқылы шекараларды өзгертпеуге міндеттеледі; Украинаға АҚШ тарапынан қауіпсіздік кепілдігі беріледі; Елдің бейтарап мәртебесі заң жүзінде бекітіледі; НАТО күштерінің Украина аумағына орналасуына тыйым салынады; Украина армиясының саны шектеледі; Ресейге салынған санкциялар кезең-кезеңмен жойылады; Ресейдің мұздатылған активтерінен $100 млрд Украина қалпына келтіруге бағытталады.
АҚШ не дейді?
Бейсенбі күні АҚШ Ақ үйі бұл келісімді біржақты аумақтық жеңілдіктер ретінде түсіндіру дұрыс емес деп мәлімдеді. Ресми өкіл Кэролайн Левиттің айтуынша, Вашингтон «екі тараппен де келіссөз жүргізіп, олардың қандай міндеттемелер алуға дайын екенін бағалаған».
