Трамп Украина мен Ресей арасындағы жағдайды реттеу жоспарын әзірлеп жатыр — Axios
АҚШ президенті Дональд Трамптың әкімшілігі Мәскеумен кеңесе отырып, Ресей мен Украина арасындағы қақтығысты тоқтату жөнінде жаңа жоспарды жасырын түрде әзірлеп жатыр. Бұл туралы Axios-қа америкалық және ресейлік шенеуніктердің дереккөздері хабарлаған.
Басылымның мәліметінше, бұл Израиль мен Палестина арасындағы келісімге қол жеткізудегі Трамптың жетістігінен шабыт алған, 28 пункттен тұратын жоспар туралы. Құжатты әзірлеуді Трамптың арнайы өкілі Стив Уиткофф басқарып отыр, ал Axios дерегінше, ол бұл жоспарды Ресей тарапының келіссөз жүргізушісі Кирилл Дмитриевпен талқылаған. Киев пен Украинаның еуропалық одақтастары бұл бастамаға қалай қарайтыны әзірге белгісіз, деп жазды басылым.
Axios дереккөздерінің айтуынша, жоспар төрт бағытқа негізделген: Украинада бейбітшілік орнату, оған қауіпсіздік кепілдіктерін беру, Еуропаның жалпы қауіпсіздігін қамтамасыз ету және АҚШ-тың Ресей мен Украинамен болашақ қатынастары. Алайда, жоспардың Украинаның шығысындағы территорияларды бақылау сияқты негізгі сұрақтарға қалай жауап беретіні әзірге белгісіз. Басылымның жазуынша, Ресей әскері баяу ілгерілеп жатқанымен, Кремль талап еткеннен әлдеқайда аз аумақты ұстап отыр.
The Wall Street Journal мен Politico хабарлауынша, Трамп әкімшілігі Украинаға армия министрі Дэниел Дрисколл жетекшілік ететін жоғары лауазымды делегацияны жіберген. Politico жазғандай, ол Украина президенті Владимир Зеленскиймен, украиналық шенеуніктермен, әскери басшылармен және қорғаныс өнеркәсібі өкілдерімен келіссөздер жүргізуі тиіс, содан кейін — мүмкіндік болса, ресейлік тараппен де кездесуі мүмкін. Алайда, Кремльде мұндай келісімдер жоқ екенін мәлімдеді, деп жазды Politico. WSJ дерегінше, бұл миссияның мақсаты — Трамптың атынан бейбіт келіссөздерді қайта жандандыру талпынысы.
