Klarna-дан кейін: финтех саласындағы IPO-ға үмітті бес кандидат
Еуропалық бөліп төлеу арқылы сатып алу сервисі Klarna биыл Нью-Йоркте ең ауқымды әрі сәтті IPO-лардың бірін өткізгеннен кейін, Уолл-стриттегі инвесторлар келесі болып қай ірі финтех-стартаптың биржаға шығатынын болжауда. CNBC телеарнасы листингке шығуы мүмкін ұзақ кандидаттар тізімінен ең перспективалы бес компанияны іріктеп алды.
Stripe
Amazon мен Google секілді клиенттері бар Stripe бизнеске арналған төлем платформасы ретінде көп жылдан бері листингке үміткер ретінде қарастырылып келеді. Компания 15 жыл бұрын құрылған және әлі күнге дейін ашық түрде акцияларын саудаламай отыр. 2023 жылы Stripe негізін қалаушылар Джон және Патрик Коллисон IPO өткізуді қарастырған болатын, бұл арқылы қызметкерлерге өз акцияларын сату арқылы табыс табуға мүмкіндік бермек еді. Алайда 2024 жылдың басында компания акцияларды тендерлік ұсыныс арқылы сатып алу нұсқасын таңдады.
Бұл Stripe компаниясының биржаға ұзақ уақыт шықпайтынын білдірмейді. CNBC атап өткендей, көптеген ірі финтех-компаниялардың басшылары Klarna-ның IPO процесін мұқият бақылап, өздерінің листингке шығу үшін қолайлы сәтін анықтауға тырысуда. Жеке стартаптардың акцияларымен мәмілелер жасалатын ең ірі алаңдардың бірі Forge Global мәліметінше 2025 жылдың басынан бастап Stripe акцияларының бағасы 45%-ға өскен. Қазіргі таңда компанияның бағалануы — $92,4 млрд, бұл 2021 жылғы $95 млрд шыңына өте жақын.
Revolut
Ұлыбританияда тіркелген цифрлық банк Revolut — листингке әлеуетті үміткер ретінде кеңінен қарастырылып жүрген компания. Жақында компания қызметкерлерге биржадан тыс нарықта акцияларын сату мүмкіндігін берді, бұл $75 млрд бағалауға негізделген. Егер Revolut IPO өткізсе, ол, ең ықтимал, Нью-Йоркте өтеді: негізін қалаушы Николай Сторонский Лондонды IPO үшін «рационалды емес» таңдау деп санайды. Forge Global мәліметінше қаңтардан бері компания акцияларының бағасы жеке мәмілелерде 272%-ға өсті.
Monzo
Британдық цифрлық банк Monzo жақында $5,9 млрд бағаланған болатын және бұл — тағы бір перспективалы IPO кандидаты. Sky News телеарнасының мәліметінше листинг 2026 жылдың алғашқы жартысында өтуі мүмкін, алайда Monzo басшысы Туммалапалли Саи Анил маусым айында компанияның басты мақсаты биржаға шығу емес, масштабтау және өсу екенін мәлімдеді. 2024 жылы компания инвесторлар тарапынан £4,5 млрд ($6,1 млрд) бағаланған.
Starling Bank
Monzo-мен бәсекелесетін британдық необанк Starling АҚШ нарығына экспансия жоспары аясында АҚШ-та IPO өткізуді ойластыруда. Starling өзге компаниялар өздерінің цифрлық банктерін іске қоса алуы үшін сататын Engine бағдарламалық платформасына сенім артады. 2022 жылғы инвестициялық раундта стартап £2,5 млрд ($3,4 млрд) бағаланған болатын. Қазіргі таңда компания £4 млрд бағалауға үміттеніп отыр, деп хабарлады өткен аптада Financial Times.
Payhawk
Корпоративтік шығындарды басқаруға маманданған болгарлық финтех-стартап Payhawk та биржаға шығуды көздеп отыр. 2022 жылы компания $1 млрд бағаланған, ал 2024 жылы табысы 85%-ға өсіп, 23,4 млн еуроға жетті. Бас директор Христо Борисов CNBC арнасына берген сұхбатында «IPO терезесі ашылуда», алайда биржаға шығу «бес жылдық көкжиекте» жүзеге асуы мүмкін екенін айтты. «Егер көптеген IPO-ларға қарасаңыз, олар негізінен жылдық қайталанатын табысы (ARR — клиенттердің тұрақты төлемдерінен түсетін жылдық табыс — Oninvest) $400 млн-нан $500 млн-ға дейін немесе одан да жоғары болатын компаниялар. Бұл — біздің мақсатымыз», — деді Борисов.
Тағы бірнеше кандидат
CNBC тағы бірнеше финтех-компанияны назар аударуға тұрарлық деп санайды — олар ұзақмерзімді болашақта IPO үшін тартымды үміткерлер ретінде көрінеді. 2024 жылы $15 млрд бағаланған блокчейн-компания Ripple барлық IPO жоспарларын тоқтатқан болатын, бірақ қазір жағдай өзгеруі мүмкін, себебі криптоиндустрияны АҚШ президенті Дональд Трамп қолдап отыр.
Неміс цифрлық банкі N26 — тағы бір ықтимал IPO үміткері. Бұл компания 2021 жылғы қаржыландыру раундында $9 млрд бағаланған. Алайда компания қиындықтарға тап болды: N26 теңнегізін қалаушы Валентин Штальф комплаенс саласындағы кемшіліктерге байланысты инвесторлардың қысымынан кейін 2025 жылғы тамызда CEO қызметінен кету туралы шешім қабылдады.
