Криптовалюталның капитализациясы $1 трлн-нан астам төмендеді. «Криптоқыс» келгені ме?
Криптонарықтың капитализациясы соңғы апталарда $1 трлн-нан астам қысқарды, ал биржалардағы жаппай жойылулар мен биткоиннің жеті айлық минимумға құлдырауы нарыққа қысымды күшейтті. Иықты позициялардың жедел жабылуы, маржин-коллдардың өсуі және жаңа инвесторлар ағынының төмендеуі сатылымды жеделдетті. Аналитиктер құлдыраудың басталуын АҚШ тарапынан жаңа баж салықтары қаупінен бастап, инвесторлардың тәуекелді активтерден жаппай кетуіне дейінгі теріс факторлардың күшеюімен байланыстырады. Солай болғанымен, сарапшылар нарықтың фундаменталды негіздері тұрақты екенін және биткоин барған сайын өтімділікке және тәуекел тәбетіне сезімтал макроактивке айналып келе жатқанын атап өтеді.
Егжей-тегжейлі
Криптонарықтың жиынтық капитализациясы соңғы апталарда $1 трлн-нан астам қысқарды. Қазір ол шамамен $3,2 трлн, ал қазан айының басында $4,3 трлн деңгейінде болған. Құлдыраудың айтарлықтай бөлігі «қағаз жүзіндегі шығындарға» тиесілі: криптовалюталар бағамдарының төмендеуі активтердің бағасын түсірді, бірақ нақты қаражаттың әкетілуі әлдеқайда аз болды, себебі көптеген инвесторлар сатылым арқылы шығындарын бекіткен жоқ, деп жазады Bloomberg.
19 қарашада басталған жаңа сатылым толқыны биткоиннің жергілікті минимумдарға қайта түсуімен күшейді. Кей сәтте ең ірі криптовалюта $88 522 дейін құлдырады, ал қысымға «сатып алуға» тырысқан бөлшек инвесторлардан бастап, цифрлық активтерді басқаратын және акцияларына деген премиумды жоғалтқан компанияларға дейін барлық топтар тап болды, деп нақтылайды Bloomberg.
19 қараша кешінде Nvidia-ның мықты табыс болжамы аясында бағамдар біршама қалпына келді, бұл жасанды интеллектке жаһандық инвестициялар бумының әлсіреуіне қатысты қорқынышты сәл жұмсартты. Материал жарияланған сәтте биткоин шамамен $92 000 деңгейінде саудаланып, 0,4% қосып тұр.
Bloomberg-тің деректері бойынша биткоиннің келесі психологиялық қолдау деңгейлері $85 000 және $80 000 маңында орналасқан. Бұдан кейін нарық назары 2025 жылғы минимумға — тарифтік құбылмалылық аясында сәуірде тіркелген $77 424 деңгейіне ауысады.
Құлдырауға не себеп болды
10 қазанда биржалар $19 млрд астам сомадағы иықты позицияларды жапқан мәжбүрлі жойылулардан кейін криптонарықтың осалдығы айқын көрінді. Бағаның құлауы тізбекті реакция тудырды: маржин-коллдардың іске қосылуы, биржалық өнімдерден қаражаттың әкетілуі және жаңа инвесторлар сұранысының күрт төмендеуі, деп жазады Bloomberg.
21Shares зерттеу бөлімінің басшысы Элиэзер Ндинга сатылымның басталуын АҚШ президенті Дональд Трамптың Қытайдан әкелінетін сирекжер металдарына 100% баж енгізу туралы қазан айындағы мәлімдемесімен байланыстырады, деп жазады Morningstar. Себебі түсініктеме 10 қазанда америкалық биржалар жабылғаннан кейін берілгендіктен, Ндинга криптовалюталар инвесторлар тәуекелді хеджирлеу үшін дереу сата алатын жалғыз жоғары өтімді актив болғанын айтады. Оның пікірінше, нарықтың фундаменталды жағдайлары мықты, ал болған оқиға уақытша эпизод ретінде қарастырылуы керек.
«Инвесторлар қазір дерлік көзі жұмулы әрекет етіп жатыр: макроэкономика бойынша айқын сигналдар жоқ, сондықтан барлығы блокчейндегі ірі иеленушілердің әрекетіне ғана қарайды — бұл үлкен алаңдаушылық тудырады», — дейді CoinShares зерттеу бөлімінің жетекшісі Джеймс Баттерфилл.
Криптонарықтың болашағы
Morningstar аналитиктері атап өткендей, нарық шамамен екі жыл бойы жаңа бағалық рекордтар, крипто-ETF-терге ірі ағындар және институционалдық сұраныстың нығаюы жағдайында өмір сүрді. Жыл басында биткоин $126 000 деңгейінен сәл жоғары болды. Өсім екі негізгі факторға сүйенді: ФРЖ ставкасын бірнеше рет төмендетеді деген күту және институционалдық инвесторлар сұранысының артуы. Қазір екі драйвер де әлсіреп, импульспен ойнаған спекулятивтік сатып алушылар нарықтан кетіп қалды. Құлау әсіресе цифрлық активтерді басқаратын компанияларға ауыр тиюде: олардың бағалауы алдыңғы раллиге негізделген еді, деп қосады Bloomberg.
Нарық жаңа «криптоқысқа» кіріп жатыр ма, әлде кернеулі жылнан кейін уақытша салқындап тұр ма — бұл сұрақ ашық күйінде қалды. Дегенмен Morningstar сілтеме жасаған сарапшылар биткоин барған сайын нақты табыстылыққа, өтімділік ағындарына және тәуекел аппетитіне реакция беретін макроактивке айналып барады — яғни жаһандық қаржы жүйесінің толыққанды элементіне айналуда деген ортақ пікірде.
Осы уақытта эфир қайтадан $3000 төмен түсті. Өсімнің алғашқы кезеңінде биткоиннен артта қалғанымен, ол тамызда $5000 жақын көтеріліп, тіпті 2021 жылғы тарихи максимумды өткінші түрде жаңартқан еді, бірақ кейін сол өсімнің бәрін жоғалтты.
«Менің ойымша, біз қазір сатылымның басынан гөрі соңына жақынырақпыз. Бірақ нарық жүйкелі, және криптоактивтердің бұрылысқа берік негіз қалыптасқанға дейін әлі де төмендеу мүмкіндігі бар», — деді Bitwise Asset Management инвестициялық директоры Мэттью Хоугэн.
