Күміс бағасы жаңа рекорд орнатты. Ұзаққа созылған тапшылық себептердің бірі ғана
Күміс бағасы тарихи максимумға жетті. 28 қарашада оның спот бағасы 5,5%-ға өсіп, бір унциясы үшін шамамен 56,3 долларға дейін көтерілді. Бұл — қазан айында тіркелген алдыңғы шыңнан да жоғары. Бұл өсім Лондонда — құйма саудасының басты жаһандық орталығында металдың күрт тапшылығы аясында болды. Сонымен қатар, 2026 жылғы наурыз айына арналған фьючерстер бағасы 57 доллардан асты.
Bloomberg-тің жазуынша, бағаның күрт өсуіне бірнеше фактор әсер етті: АҚШ Федералдық резерв жүйесі желтоқсанда пайыздық мөлшерлемені төмендетеді деген үміт, бағалы металдармен қамтамасыз етілген биржалық қорларға капитал құйылуы, физикалық күміске деген тапшылықтың сақталуы.
Сол күні Comex биржасында (CME-ге тиесілі) бірнеше сағатқа созылған техникалық үзіліс салдарынан нарықта қатты құбылмалылық пен өтімділіктің төмендігі байқалды. Нью-Йорк уақытымен таңертеңгі сағаттарда сауда қайта қалпына келді.
Тағы не әсер етіп жатыр?
Кейбір трейдерлер АҚШ-та күміске баж салығы енгізілуі мүмкін деген қауіпке назар аударуда. Себебі қарашада бұл металл АҚШ Геологиялық қызметі жасаған стратегиялық маңызды ресурстар тізіміне енгізілді.
Қазан айының басынан бері Comex қоймаларынан шамамен 75 млн унция күміс шығарылған. Бірақ АҚШ күмісіне сұраныс артса, қосымша үстемақы (премия) пайда болуы мүмкін деген қауіп экспортқа қатысты сақтықты күшейтіп отыр.
Контекст
Бұл рекорд Лондондағы күміс жеткізу дағдарысынан кейін бір ай өткенде орнап отыр. Сол кезде бағалар Шанхай мен Нью-Йорк биржаларындағы деңгейден асып кеткен еді. Лондонға шамамен 54 млн троя унция күміс жеткізіліп, нарықтағы қысымды сәл бәсеңдетті. Алайда жағдай әлі де күрделі: бір айлық күміс қарызға алу бағасы әдеттегі деңгейден әлдеқайда жоғары.
Лондондағы жеткізілімнің артуы басқа өңірлерде тапшылық туғызды, әсіресе Қытайда. Шанхай фьючерстік биржасына байланысты қоймалардағы қорлар 2015 жылдан бергі ең төменгі деңгейге түсті. Ал Шанхай алтын биржасындағы сауда көлемі соңғы тоғыз жылдан астам уақыт ішіндегі ең төменгі көрсеткішке жетті.
