Louis Vuitton иесі Еуропадағы ең қымбат 5 компания қатарынан шығып қалды
LVMH акциялары биыл 24%-ға арзандаса да, әзірге Уолл-стрит сарапшыларының ешбірі бұл қағаздарды сатуға кеңес бермей отыр.
Louis Vuitton мен Christian Dior брендтеріне иелік ететін сән-салтанат тауарлары нарығындағы LVMH холдингі 22 мамыр күнгі сауда барысында уақытша Еуропадағы ең қымбат бес компания қатарынан шығып қалды. Жыл басынан бері бұл сән үйінің акциялары шамамен 25%-ға арзандап, 2008 жылғы дағдарыстан бергі ең нашар көрсеткішке жетті. Бұған Қытайдағы сұраныстың төмендеуі мен сауда соғысы қаупі себеп болды. Дегенмен, Уолл-стрит талдаушылары LVMH акцияларын сатуға әлі күнге дейін бірде-бір ұсыныс бермеген.
Егжей-тегжейі
Бейсенбі күнгі саудада LVMH акцияларының құны 3%-дан астамға төмендеп, компанияның нарықтық капитализациясы 239 миллиард еуроға дейін түсті. Bloomberg агенттігінің жазуынша, бұл көрсеткіш швейцариялық Nestle компаниясынан төмен болды. Соның салдарынан LVMH Еуропадағы ең қымбат бес жария компания тізімінен түсіп қалды. Дегенмен, кейінірек акциялар біршама өсіп, күн соңында 485,1 еуроға дейін жетті. Бұл — кейінгі екі аптадағы ең төмен жабылу бағасы.
2025 жылдың басынан бері компания акциялары шамамен 24%-ға арзандады. Бұл — 2008 жылғы жаһандық қаржы дағдарысынан бергі ең әлсіз нәтиже. Салыстыра кетсек: Hermès акциялары жыл басынан бері 5%-ға қымбаттаған, Cartier брендіне иелік ететін Richemont 16% өсім көрсеткен, ал Gucci брендіне иелік ететін Kering акциялары LVMH сияқты 26%-ға арзандаған.
Bloomberg-тің дерегінше, 2023 жылы LVMH әлемдегі ең қымбат он компанияның қатарына кіріп, капитализация бойынша Meta Platforms (Facebook пен Instagram иесі) компаниясымен бәсекелес болған.
Инвестор үшін маңызды мәліметтер
Сән-салтанат сегментіндегі өзге брендтер секілді, LVMH те Қытайдағы сұраныстың төмендеуі мен Дональд Трамптың сауда саясаты АҚШ-тағы тұтынушылық шығындарға кері әсер етеді деген қауіптің әсерін сезініп отыр. Компанияның 2025 жылғы бірінші тоқсандағы есебі нарық үмітін ақтамады: сарапшылар 2% өсім күтсе, нақты түсім 3%-ға азайған. Оның ішінде, Louis Vuitton мен Dior-ды қамтитын сән және былғары бұйымдар сегменті, яғни LVMH сатылымының жартысын және операциялық табыстың 75%-ын қамтамасыз ететін негізгі бөлім — 5%-ға төмендеді.
2024 жылы Қытайды қамтитын аймақтағы түсім 11%-ға азайған, ал 2025 жылдың бірінші тоқсанында да сол үрдіс сақталған. Бұл аймақ компания табысының 30%-ын құраса, АҚШ үлесі — 24%.
Bloomberg агенттігінің аноним дереккөздеріне сүйенсек, компания екінші тоқсанда да сұраныс әлсіз болатынын ескерткен. Әсіресе Қытайда қалпына келу байқалмай отыр. Алдын ала болжам бойынша, Азия-Тынық мұхиты аймағында (Жапониядан басқа) сатылым 6,4%-ға, сән және былғары бұйымдары сегментінің табысы 3,7%-ға төмендеуі мүмкін.
Сарапшылар не дейді?
Bloomberg жазуынша, инвесторлар компанияның қалпына келуі екіталай деп қауіптенеді. Morningstar сарапшысы Елена Соколованың айтуынша: «LVMH акцияларын қайта қымбаттату үшін не бүкіл саланың қайта өсуі, не LVMH-тің бәсекелестерден басып озуы керек. Бұл сценарийлер орта мерзімде мүмкін болғанымен, биыл орындалуы екіталай».
Дегенмен, Bernstein сарапшысы Лука Солка 21 мамырда LVMH акциялары үшін «сатып алуға кеңес береміз» деген рейтингті сақтап, мақсатты бағасын 600 € деп қалдырды. Бұл қазіргі бағадан 21,5% өсімді білдіреді.
Ал Barclays сарапшысы Кароль Маджо 2 мамыр күні акциялар рейтингін бейтарап (Equal Weight) деңгейге түсіріп, мақсатты бағасын 755 еуродан бірден 500-ге дейін төмендетті. Ол да биыл сән және былғары өнімдер сегментінің өсімі қалпына келмейді деп санайды: «АҚШ-тағы қиындықтарды ескерсек, бүкіл саланың табысы қалпына келуі кейінге шегерілуі мүмкін», — деп жазды Маджо.
Сонда да, қазіргі уақытта LVMH акцияларын сатуға кеңес берген ешбір сарапшы жоқ. FactSet мәліметінше, бұл акциялар бойынша 12 «сатып ал», 4 «нарықтан жоғары» (Overweight) және 16 «ұста» (Hold) деген баға бар. Бұл — үш ай бұрынғыдан алты сарапшыға артық.
