Мамырдағы IPO-дан кейін eToro акциясы 27 % құлады. Deutsche неге сатып алуға берді?
Deutsche Bank акция және криптовалюта саудасымен айналысатын eToro компаниясының рейтингін «ұстау» (Hold) деңгейінен «сатып алу» (Buy) деңгейіне көтерді, өйткені банк сарапшылары үшінші тоқсан есебінен кейін компанияның жақсы перспективаларын көріп отыр, деп жазды CNBC. Банк сарапшысы Брайан Беделл сондай-ақ мақсатты бағаны $44-дан $45-ға көтеріп, бұл алдыңғы саудадағы жабылумен салыстырғанда 19 %-дық өсу әлеуетін білдіретінін атап өтті.
Мамырда Nasdaq-та дебют жасаған eToro акциясы IPO-дан бері 27 % құлаған. Ал 11 қарашадағы саудада қағаз 6,3 % қымбаттады.
Ол өсу әлеуетін неден көрді?
Deutsche Bank рейтингті eToro компаниясы үшінші тоқсанда сарапшылар күткенінен жоғары нәтиже көрсеткеннен кейін көтерді. eToro 30 қыркүйекте аяқталған үш айда бір акцияға шаққанда $0,6 түзетілген пайда туралы хабарлады, ал LSEG дерегінше, сарапшылардың орташа болжамы $0,56 болған, деп жазды Reuters. Компанияның табыстан криптоактивтермен және маржалық операциялар бойынша пайыздық шығындармен байланысты шығындарды шегергеннен кейінгі таза кірісі (net contribution) өткен жылмен салыстырғанда 28 % өсіп, $215 млн құрады. Ал финтех-компанияның басқарудағы активтер көлемі жылдық мәнде 76 % артып, $20,8 млрд-қа жетті.
Брайан Беделлдің айтуынша, компанияның іргелі көрсеткіштерінің мықтылығы мен акция бағасының биылғы төмендеуі eToro қағазын инвесторлар үшін тартымдырақ етіп отыр.
«Компанияның пайдасы құбылмалы болуы мүмкін, өйткені өсу бағыттарының біразы әлі даму кезеңінде. Дегенмен, егер eToro АҚШ нарығындағы кеңею стратегиясын және басқа да өсу бастамаларын сәтті жүзеге асыра алса, біздің болжамдарымыз тым сақ болып қалуы ықтимал,» — деп жазды ол.
Сарапшылардың айтуынша, eToro-ның жаңа бастамалары мен бизнесінің оң динамикасын ескере отырып, ол енді клиенттер санының екі таңбалы өсім қарқынына сенімдірек қарайды. Оның болжамынша, компанияның саудадан түсетін табысы арта береді, ал тұрақтылық саудадан тыс бағыттарда — яғни жазылымдардан түсетін кіріс, ақша аударымдары және пайыздық табыс сияқты сегменттерде де сақталады.
Брайан Беделл сондай-ақ жуырда eToro АҚШ-та автоматты бақылау функциясын іске қосқанын атап өтті — ол пайдаланушыларға тәжірибелі инвесторлардың мәмілелері мен портфельдерін автоматты түрде көшіруге мүмкіндік береді. Еуропадағы берік позициясына қарамастан, сарапшы компанияның АҚШ пен Азия нарықтарындағы ауқымын кеңейтуге бағытталған қадамдарын жоғары бағалады.
Басқа да сарапшылар пікірі
Қазан айының ортасында Compass Point eToro-ны қамтып, «сатып алу» рейтингімен және мақсатты бағаны $66 деңгейінде белгіледі. Бұл акция бағасының 74 % өсу әлеуетін білдіреді.
Қазіргі таңда компания қағазын 16 сарапшы қадағалайды, оң көзқараспен сатып алуға — 9, ал ұстауға — 7 сарапшы кеңес берді.
Орташа мақсатты баға eToro акциясының ағымдағы деңгейден шамамен 62% өсуін білдіреді.
