McDonald’s тауық орамасын қайтарды. Бұл сатылымды арттыруы мүмкін бе?
McDonald’s АҚШ-та Snack Wrap атты тауық еті қосылған танымал тағамын мәзірге қайта енгізіп жатыр. Бұл – KFC-нің твистеріне ұқсас өнім. Компания бұл қадам арқылы табысы төмен тұтынушыларды қайта тартқысы келеді.
Егжей-тегжейі
2024 жылғы 10 шілдеден бастап АҚШ-тағы McDonald’s мейрамханаларында Snack Wrap қайта ұсынылады. Бұл тағам — бидай шелпегіне оралған тауық котлеті, салат, үгітілген ірімшік пен соустың қоспасы. Тағам 2016 жылы дайындалу қиындығына байланысты мәзірден алынып тасталған болатын. Сол кезден бері тұтынушылар бұл өнімді қайтаруды сұрап, онлайн петицияға 19 мыңнан астам қол жинаған.
McDonald’s АҚШ-тағы президенті Джо Эрлингер тұтынушыларға жолдаған бейнеүндеуде Snack Wrap қайта оралатынын, себебі оны көпшілік сұрағанын айтты.
Неліктен бұл инвесторлар үшін маңызды?
Компания соңғы уақытта тұтынушылар санының азаюы және табысы төмен адамдардың шығынын қысқартуы салдарынан түсімінің төмендеуіне тап болды. 2024 жылдың алғашқы тоқсанында АҚШ-тағы McDonald’s-тың салыстырмалы сатылымы 3,6%-ға азайды. Бұл қатарынан екінші тоқсандағы құлдырау (алдыңғы тоқсанда –1,4%).
McDonald’s бас директоры Кристофер Кемпчински геосаяси тұрақсыздық тұтынушылар сенімін әлсіретіп, инфляция мен болашаққа алаңдаушылық табысы төмен және орташа азаматтарға қатты әсер еткенін айтты.
Компания қаңтарда McValue атты жеңілдік платформасын іске қосқанымен, Yahoo Finance дерегінше, бұл айтарлықтай нәтиже берген жоқ. Соған қарамастан, McDonald’s биыл 5 $ түскі ас сияқты бұрынғы жарнамалық ұсыныстарын қайта қолданды, сондай-ақ Minecraft-тен шабыт алған ойыншықтармен бірге комбо-мәзірлерді де шығарды.
2024 жылдың желтоқсанында Snack Wrap қайта оралуы мүмкін екенін алғаш рет естігенде, Jefferies-тің сарапшысы Энди Бариш бұл өнім McDonald’s-тың сатылымдағы серпінін қайтаруға көмектесуі мүмкін екенін айтқан. Оның айтуынша, Snack Wrap 2025 жылы қайта оралу арқылы компанияға E.coli (ішек таяқшасы) індетіне дейінгі оң динамиканы қайтаруға мүмкіндік береді.
Сонымен қатар, бағаның өсуіне байланысты тауық еті фастфуд индустриясында сиыр етінен де жылдамырақ танылып келеді.
Сарапшылар не дейді?
2025 жылдың басынан бері McDonald’s акциялары 7,8%-ға өсті. Бұл — S&P 500 индексінің (1,2%) және бәсекелес Yum! Brands компаниясының (6,3%) көрсеткіштерінен жоғары. Алайда Burger King және оның иесі Restaurant Brands International компаниясының акциялары 10,5%-ға өсіп, McDonald’s-ты басып озды.
MarketWatch мәліметіне сәйкес, McDonald’s акцияларын бақылайтын 37 аналитиктің ішінде 17-сі «сатып алуға» кеңес береді, 2-еуі «артық салмақты» деп бағалаған. Қалған 18 сарапшы акцияларды ұстап тұруды (Hold) ұсынады. Уолл-стриттегі орташа баға — 334,4 $, бұл 3 маусымдағы жабылу бағасынан 7%-ға жоғары.
