Meta ЖИ көмегімен жарнаманы автоматтандырғысы келеді
Meta Platforms (Facebook пен Instagram әлеуметтік желілерінің иесі) жарнама жасау мен таргет процесін толықтай жасанды интеллект арқылы автоматтандыруды жоспарлап отыр, деп хабарлайды The Wall Street Journal. Жарнама — компанияның негізгі табыс көзі, осының арқасында ол өз платформаларына түрлі ЖИ әзірлемелерін қаржыландырып, енгізуді жалғастырып келеді. Бұл жаңалықтан кейін жарнама компанияларының акциялары күрт құлдырады, ал Meta котировкалары керісінше үш айдағы максимумға дейін өсті.
Егжей-тегжейлі
Келесі жылдың соңына дейін Meta жарнама жасау және таргет процесін толықтай жасанды интеллект көмегімен автоматтандыруды жоспарлап отыр, деп жазады WSJ дереккөздерге сілтеме жасап. Meta брендтерге жарнамалық кампанияларды нөлден жасауға мүмкіндік беретін құрал әзірлемек: өнімнің суретін жүктеп, бюджет көрсетсе жеткілікті — қалған мәтін, визуал және видеоны ЖИ өзі дайындайды, деп хабарлайды WSJ дереккөздері. Кейін жүйе жарнаманы кімге көрсету керек екенін өзі анықтап, оны көрерменнің контекстіне қарай нақты уақыт режимінде бейімдейді. Мысалы, қарлы өңір тұрғынына таулы жолмен келе жатқан көлік көрсетілсе, қала тұрғыны сол көлікті мегаполис көшелерінің аясында көруі мүмкін.
ЖИ-жарнама — Meta бас директоры Марк Цукербергтің компанияны трансформациялау жөніндегі ауқымды жоспарының негізгісі, деп атады WSJ. Қазірдің өзінде платформа ЖИ-құралдарын ұсынады — олар қолданыстағы жарнамаларға бірнеше нұсқа жасап, іске қоспас бұрын ұсақ түзетулер енгізе алады. Жарнама Meta-ның негізгі табыс көзі болып қала береді: 2024 жылы ол компания табысының 97%-дан астамын қамтамасыз етіп, ЖИ-чиптерге, деректер орталықтарына және нейрожелілерді оқытуға бағытталған миллиардтаған инвестицияны қаржыландырып отыр.
Сонымен қатар, нарыққа жаңа ойыншылар белсенді кіріп жатыр. Көбірек брендтер Midjourney және OpenAI-дың DALL-E секілді генеративті сервистерін пайдаланып, Meta-дағы жарнамаға арналған контент жасай бастады. Цукерберг компаниясы бұл құралдарды да өз жарнама экожүйесіне біріктіруді жоққа шығармайды, деп атап өтті WSJ дереккөздері.
Инвесторға неліктен маңызды?
Meta-ға тиесілі әлеуметтік желілер бүгінде әлем бойынша 3,4 млрд белсенді бірегей қолданушыны қамтиды. Сондықтан осы платформалардағы жарнаманы толық автоматтандыру ірі жарнама компаниялары үшін жағымды болмауы мүмкін, деп жазады Investor's Business Daily. WSJ жариялаған Meta-ның ЖИ-ға қатысты амбициялары туралы хабарламадан кейін жарнама компанияларының акциялары құлдырады. Мысалы, Interpublic Group акциялары шамамен 4% төмендеді — екі ай ішіндегі минимум. Omnicom Group бағалы қағаздары да дерлік 5% (екі ай ішіндегі минимум), ал француздық Publicis Groupe SA акциялары 3,8% күрт құлдырады. GroupM, Ogilvy және VM агенттіктеріне иелік ететін WPP жарнама холдингінің қағаздары 2%-дан астамға арзандады.
Ал Meta акциялары керісінше, шамамен 4% күрт өсті — бұл үш ай ішіндегі максимум. Жыл басынан Meta-ның нарықтық құны шамамен 15% өсті — бұл «Керемет жетілікке» кіретін компаниялардың арасында ең жақсы көрсеткіш, әрі АҚШ-тың негізгі қор индексі S&P 500-ден де озық. Соңғысы бұл кезеңде 1%-ға да жетпей өсім көрсетті.
Meta жоспарының мәселесі неде?
ЖИ көмегімен жарнаманы нөлден жасау шағын және орта бизнес үшін нағыз құтқару болмақ — өйткені Meta клиенттерінің басым бөлігін осы сегмент құрайды және олардың жарнама бюджеті көбіне шектеулі болады, деп көрсетеді WSJ. Алайда ірі брендтер, керісінше, өздерінің жарнамалық кампанияларына Meta тарапынан бақылаудың артуына алаңдаулы. Олар ЖИ арқылы жасалған жарнама сапасыз әрі адам үшін тым «жасанды» болып көрінуі мүмкін деп қауіптенеді. Кейбір компаниялар қазіргі ЖИ құралдары жиі бұрмаланған немесе жарамсыз визуалдар жасайтынын, ал оларды түзету көп ресурсты қажет ететінін алға тартады. Бұдан бөлек, Meta-ның жаңа ЖИ құралдары үлкен есептеу қуатын және әр брендке арналған жеке модельдер жасауды қажет етеді, дейді WSJ.
