Мұнай бағасы құлдырады: ОПЕК+ қарашада өндірісті арттыруды жоспарлап отыр
Дүйсенбіде мұнай бағасы 3%-ға төмендеді. Бұған қарашада ОПЕК+ өндірісті арттыруды жалғастырмақ деген жоспарлар және Ирак Курдистанынан Түркияға мұнай экспортының қайта жандану жаңалығы себеп болды, деп жазады Reuters.
Фьючерстер: Brent маркалы мұнай 3,5%-ға түсіп, барреліне $67,7-дан төмендеді. West Texas Intermediate (WTI) маркалы америкалық мұнай бағасы маусымнан бергі ең үлкен құлдырауды көрсетіп, 3,5%-ға арзандап, $63,5 болды.
Өткен аптада Украина дрондарының Ресейдің энергетикалық нысандарына соққысынан кейін Brent бағасы тамыздан бері алғаш рет $70-дан асып, екі айлық максимумға жеткен еді.
Неге мұнай арзандап жатыр?
Басты себептердің бірі — ОПЕК+ қарашада өндірісті тағы арттыруды талқылап жатыр. 5 қазандағы онлайн-жиында тәулігіне кемінде 137 мың баррель қосу мәселесі қаралады, деп хабарлады Reuters дереккөздері. «ОПЕК+ нарықтағы үлесті сақтауға көбірек мән бере бастағандықтан, мұнайдың іргелі көрсеткіштері әлсіреп тұр. Нарықта ұсыныс артық болады деген қауіп басым», — деді Rystad Energy бас экономисі Клаудио Галимберти.
Сәуірден бері ОПЕК+ тәулігіне 2,5 млн баррельден астам қосып үлгерді, бұл әлемдік тұтынудың шамамен 2,4%-ына тең. Бірақ сарапшылардың айтуынша, нақты өсім жоспардан қалып отыр: көп елдер техникалық мүмкіндіктерінің шегіне жеткен.
RBC Capital Markets жазбасында: «Сауд Арабиясынан басқа өндірушілер шамадан тыс жүктемеде жұмыс істеп жатыр. Сондықтан болашақтағы өсім ресми жарияланған көрсеткіштерден әлдеқайда төмен болады», — деп көрсетілген.
Бағаның құлдырауына екінші себеп — Ирактың екі жылдан астам үзілістен кейін курд мұнайын Түркия арқылы қайта экспорттай бастауы. Бұл арна халықаралық нарыққа тәулігіне 230 мың баррельге дейін шикі мұнай қайтаруы мүмкін.
Контекст
ОПЕК және оның одақтастары әлемдік нарықтағы үлесін қайтаруға ұмтылып отыр. Алайда Халықаралық энергетикалық агенттік 2026 жылы ұсыныс рекордтық артықшылыққа жетеді деп болжайды.
29 қыркүйекте TotalEnergies жаңартылған стратегиясында келер жылдың бірінші тоқсанында айтарлықтай профицит күтіп отырғанын мәлімдеді. Бірақ 2027 жылдан бастап мұнай бағасының құлдырауына байланысты инвестициялар азайып, артық өндіріс қуаты қысқара бастайды. 2028–2030 жылдары ОПЕК+-ке кірмейтін елдердің ұсынысы төмендеп, сұраныс өсе береді деп болжанады.
