Мұнай мен металдар АҚШ-тағы шатдаунның аяқталуына деген үміт аясында қымбаттады
Алюминий бағасы мыс және басқа да өнеркәсіптік металдармен бірге өсті. Бұған АҚШ-та үкіметтің рекордтық ұзақ үзілісінің (шатдаун) аяқталуына қатысты үміттің күшеюі себеп болды, деп хабарлайды Bloomberg. Жалпы нарықтағы жандану аясында мұнай бағасы да көтерілді.
Егжей-тегжейлі
Алюминийге арналған фьючерстер — жаһандық өнеркәсіптік белсенділіктің негізгі көрсеткіштерінің бірі — 10 қараша таңында 1%-ға өсті. Ал әлемдік экономиканың «денсаулық көрсеткіші» саналатын мыс жеткізуге арналған келісімшарттар 1,6%-ға қымбаттады. Инвесторлардың тәуекелге деген тәбеті АҚШ Сенаты үкіметті қаржыландыру туралы заң жобасын қолдағаны жөніндегі жаңалықтардан кейін арта түсті. Бұл заң жобасы ел тарихындағы ең ұзақ шатдаунды аяқтауға бағытталған, деп жазады Bloomberg.
Жалпы инвесторлардың көңіл күйінің жақсаруы шикізат нарықтарына да әсер етті. Brent эталондық маркалы мұнай бағасы екі апталық төмендеуден кейін барреліне $64 деңгейінен жоғары көтерілді, ал солтүстік америкалық WTI сорты $60 межесінен асты.
«АҚШ үкіметінің жұмысы жақын арада қайта басталуы тәуекелге деген нарықтық көзқарасты жақсартады», — дейді IG компаниясының сарапшысы Тони Сикамор Reuters агенттігіне. Оның болжамынша WTI бағасы барреліне $62-ға дейін өсуі мүмкін.
Шатдаун жақында аяқтала ма?
Reuters агенттігінің хабарлауынша 10 қарашаға қараған түні АҚШ Сенаты 60 дауыспен 40-қа қарсы шешім шығарып, алты аптаға созылған шатдаунды аяқтауға мүмкіндік беретін резолюцияны қабылдады. Қажетті дауыс санын бірнеше демократ-сенаторлардың республикалық көпшілікке қосылуы қамтамасыз етті.
Бұл дауыс беруге дейін екі партия арасында келісім жасалды. Республикандықтар демократтардың талабымен Obamacare бағдарламасы бойынша медициналық сақтандыруға арналған салықтық жеңілдіктерді ұзартуға қолдау көрсетуге келісті. Сондай-ақ келісімге сәйкес шатдаун кезінде жұмыстан босатылған федералды қызметкерлер қайта жұмысқа алынып, жалақы бойынша берешегі өтеледі, деп жазады Bloomberg.
Енді АҚШ Сенаты заң жобасы бойынша соңғы дауыс беруді өткізуі керек. Осыдан кейін ол Өкілдер палатасында мақұлданып, президент Дональд Трамптың қол қоюына жіберіледі. Reuters атап өткендей, егер Сенатта толық келісім болмаса, шатдаун тағы бір аптаға созылуы мүмкін, өйткені тіпті бір сенатордың қарсылығы да процесті баяулатуға қауқарлы.
