АҚШ-та соңғы жеті жылдан бергі алғашқы шатдаун. Бұл инвесторлар үшін нені білдіреді?
АҚШ-та мемлекеттік мекемелер қаржыландырудың жоқтығынан жұмысын тоқтатуына байланысты жеті жылдан кейінгі алғашқы шатдаун орын алды. Осыдан кейін америкалық қор индекстерінің фьючерстері төмендеді. Шатдаун елдегі ең ірі жұмыс берушілердің бірінің қызметін бұзды және негізгі экономикалық деректердің жариялануы кешігу қаупін төндіріп отыр. S&P 500 индексіне желтоқсандық келісімшарттар 0,8%-ға, Nasdaq 100-ге — 1%-ға арзандады. Доллар индексі төртінші күн қатарынан төмендеді, ал алтын унциясына $3875-тен жоғары рекордтық деңгейге жетті.
АҚШ мемлекеттік мекемелері 1 қазаннан бастап өз жұмысын тоқтатты, себебі Конгресстегі демократтар мен республикалықтар жаңа қаржы жылы басталғанға дейін қаржыландыру бойынша келісімге келе алмады. Бұл – үкімет жұмысының тарихтағы ең ұзақ тоқтауынан кейінгі алғашқы шатдаун. Ол Дональд Трамптың алғашқы президенттік мерзімі кезінде болды және 2018 жылдың желтоқсан айының соңынан 2019 жылдың қаңтарына дейін, шамамен бес аптаға созылды.
Қор нарығы әдетте бюджеттік дауларды елемеуге бейім. Truist деректеріне сүйенген Bloomberg-тің жазуынша S&P 500 индексі алдыңғы 20 шатдаун кезінде орта есеппен айтарлықтай өзгерген жоқ. Уолл-стриттегі кәсіби инвесторлар бұл жолы да портфельдерін өзгертпей сақтап отыр. Дегенмен, Конгресс көшбасшыларының қазіргі текетіресі әлдеқайда өткір көрінеді, бұл ұзаққа созылатын қақтығыс қаупін арттырып, әлемдегі ең ірі экономиканың іргесін шайқауы мүмкін. Трамп әкімшілігі тек федералды қызметкерлерді әкімшілік демалысқа жіберіп қана қоймай, оларды жұмыстан шығару ниеті барын мәлімдеді. Бұл, Bloomberg атап өткендей, еңбек нарығындағы тұрақсыз жағдайда жұмыссыздықтың өсуіне әкелуі ықтимал.
Макростатистика және пайыздық мөлшерлемелер
Шатдаунның негізгі макроэкономикалық салдары еңбек нарығына және пайыздық мөлшерлемелердің болжамды траекториясына байланысты. Мемлекеттік ведомстволардың статистикалық деректерді жариялауы тоқтайды. Осы аптада бұл жұмыссыздық бойынша жәрдемақыға өтініштер, өнеркәсіптік тапсырыстар және қыркүйек айындағы еңбек нарығы бойынша есептің шықпайтынын білдіреді. Бұл көрсеткіштер Уолл-стриттің экономикалық өсім мен ФРЖ мөлшерлемелері бойынша болжамдар жасауы үшін негізгі индикаторлар болып саналады, деп жазады Bloomberg.
«Егер біз [қажетті] деректерді, еңбек нарығы туралы есепті және одан да маңыздысы, инфляция бойынша есепті ала алмасақ, бұл, сөзсіз, үлкен қауіп болар еді, – деді Vantage Markets сарапшысы Хиби Чен Bloomberg Television эфирінде. – Және айта кету керек, нарық әзірге бұл тәуекелді бағаларға қоспаған».
Қор нарығы
Қосымша тәуекел факторы — АҚШ қор нарығындағы ұзаққа созылған ралли, соның нәтижесінде активтердің бағалауы эйфориялық кезеңдерге тән деңгейлерге жетті. Төмен құбылмалылық пен жыл соңындағы раллиге дайындық жағдайында актив бағасының аз ғана төмендеуі мәжбүрлі сатылымдарға алып келіп, құлдырауды күшейтуі мүмкін. «Кішкентай теріс жаңалық қар көшкіні сияқты толыққанды түзетуге айналуы мүмкін», — деп ескертті FBB Capital Partners компаниясының сарапшысы Майкл Бэйли, оны Bloomberg келтіреді.
— Қорғаныс секторы. RTX, L3Harris Technologies және басқа америкалық қорғаныс компаниялары оқ-дәріге, дрондарға және зымыранға қарсы жобаларға мемлекеттік шығындардың арқасында сенімді өсім көрсетті. Дегенмен, шатдаун Boeing пен Lockheed Martin акцияларына қатысты инвесторлардың оптимизмін суытуы мүмкін. «Біз шатдаунның қорғаныс компанияларына айтарлықтай іргелі әсерін күтпейміз, бірақ көңіл-күй нашарлауы ықтимал», — дейді TD Cowen сарапшысы Гаутам Кханна.
— Мемлекеттік мердігерлер. Үкіметке консалтингтік және IT-қызмет көрсететін Booz Allen Hamilton, Leidos және CACI International сияқты компаниялар зардап шегуі мүмкін. Truist деректеріне сәйкес олардың кірісі бұрын үкімет жұмысы тоқтаған кезде аздап төмендеген. Дегенмен, ұзаққа созылған тоқтап қалу табысқа соққы беруі ықтимал, деп жазады Bloomberg.
— Әуе тасымалы. АҚШ-та мемлекеттік тапсырыстардан түсетін табыстың 2%-ға дейінін алатын әуе компаниялары да осал. Бұл кіріс ағынының ұзақ уақытқа тоқтауы сала тартымдылығына теріс әсер етеді. Бұған қоса, жалақысыз қалған мыңдаған федералды қызметкер туризмге шығындарын қысқартуы мүмкін, дейді Jefferies сарапшысы Шейла Кахьяоглу. 30 қыркүйекте S&P 1500 Airlines индексі 1,9%-ға төмендеп, наурыздан бергі ең нашар айды жапты.
— Циклдік акциялар. Мұнда негізгі фактор — шатдаунның экономикаға әсері. Егер ол экономикалық өсімді едәуір баяулатып, жұмыссыздықты арттыратындай ұзаққа созылса, бұл өнеркәсіптік кәсіпорындар мен қаржы компаниялары — банктерден бастап инвестициялық қорларға дейін — акцияларына инвесторлардың көңіл-күйін әлсіретеді, дейді BCA Research компаниясының бас геосаяси стратегы Мэтт Герткен. Шатдаунның циклдік акцияларға теріс әсерінен қауіптенген инвесторлар қорғаныс секторларына — денсаулық сақтау және коммуналдық қызметтерге көшуі мүмкін, деп толықтырды экономист.
IPO нарығы
АҚШ-та IPO немесе басқа бағалы қағаздарды орналастыруды жоспарлап отырған компаниялар үкімет жұмысының тоқтауы кезінде белгісіз жағдайда қалуы ықтимал. Cooley заң фирмасы, егер ойыншыларға SEC (АҚШ-тың Бағалы қағаздар және биржалар жөніндегі комиссиясы) тарапынан өтінімдері бойынша мақұлдау немесе реттеушілік түсініктеме қажет болса, оларды «үлкен логистикалық мәселе» күтіп тұрғанын ескертті. Бұл тек тоқтап тұрған уақытқа ғана емес, шатдауннан кейінгі кезеңге де қатысты, себебі жиналған өтінімдерді қарау қажет болады, деп атап өтті Cooley.
Алтын және валюталар
Егер АҚШ Конгресіндегі текетірес ұзаққа созылса, алтынның $4000/унция шамасындағы рекордтық деңгейге өскеніне қарамастан, оның «қорғаныш актив» ретіндегі тартымдылығы сақталады, деп жазады Bloomberg. Бұл раллидің бір бөлігі доллардың әлсіреуінен туындаған, ал шатдаундар кезінде оның бағамы әдетте төмендейді. Америкалық валютаның одан әрі әлсіреуі жапон иенасына және, мүмкін, еуроға да пайдасын тигізуі мүмкін, деп болжайды ING.
