Мұнай Трамптың Израиль мен ХАМАС туралы мәлімдемесінен кейін арзандады
АҚШ президенті Дональд Трамп Израиль мен ХАМАС Газа соғысын тоқтату жөніндегі америкалық жоспардың алғашқы кезеңіне келіскенін жариялағаннан кейін мұнай бағасы уақытша төмендеді. Ұзаққа созылған соғыстың тоқтау ықтималдығы артқан соң Таяу Шығыстағы геосаяси шиеленіс бәсеңдеді. Бұған қоса, доллардың нығаюы да шикізат нарығына қосымша қысым түсірді. Алайда сарапшылар асығыс үміт артпай отыр — бұған дейін де «көптеген жалған бастамалар» болғанын еске салады.
Егжей-тегжейлі
9 қазанда Brent эталондық маркалы мұнайының желтоқсан айындағы фьючерстері 0,5%-ға арзандап, барреліне $66-дан төмендеді. Солтүстік америкалық WTI мұнайының бағасы шамамен 0,6%-ға төмендеп, барреліне $62 шамасында болды. Дегенмен кейін Brent бағасы төмендеуді өтеп, шамалы өсім көрсетті — шамамен 0,1%, деп хабарлайды Халықаралық биржа деректері.
АҚШ президенті Дональд Трамп 8 қазан кешінде Израиль мен ХАМАС Ақ үй ұсынған екі жылға созылған қақтығысты тоқтату жоспарының алғашқы кезеңіне келіскенін мәлімдеді. Бұл жоспар тұтқындарды босатуды және израиль әскерінің келісілген шептерге шегінуін қарастырады.
Reuters агенттігінің түсіндіруінше Газа соғысы мұнай бағасын жоғары деңгейде ұстап тұрған, өйткені нарық Израиль мен ХАМАС арасындағы әскери қақтығыстың аймақтық дағдарысқа ұласуы жаһандық мұнай ұсынысына қауіп төндіреді деп бағалаған.
Сарапшылар не дейді
«WTI бағасы бүгін геосаяси тәуекелдік сыйақысының төмендеуінен әлсіреп тұр, себебі Израиль мен ХАМАС арасындағы бейбіт келісім тәуекел факторын азайтты», — деді OANDA талдаушысы Келвин Вонг Reuters агенттігіне.
«Әдеттегідей, мәселенің бәрі егжей-тегжейінде. Сондықтан мен әзірге Газадағы бейбіт жоспардың мұнай бағасына әсері туралы қорытынды жасауға асықпас едім, өйткені бұрын да бірнеше рет осындай жалған үміттер болған», — деп жазды Rystad Energy компаниясының аға экономисі Клаудио Галимберти Reuters келтірген жазбасында.
Австралия мен Жаңа Зеландиядағы Moomoo инвестициялық платформасының басшысы Майкл Маккартидің айтуынша, Газадағы уақытша бітім Таяу Шығыстан мұнай жеткізілімдеріне айтарлықтай әсер етпейді, себебі ОПЕК+ елдері өндірісті арттыру бойынша жариялаған мақсаттарына әлі жете қойған жоқ. Маккарти сонымен қатар доллардың иена мен еуроға қатысты нығаюы шикізат нарығына қысым жасағанын атап өтті — себебі долларға байланған мұнай басқа валютамен сауда жасайтын инвесторлар үшін қымбаттады, деп жазады Reuters.
Агенттік деректеріне сүйенсек, бұл апта АҚШ валютасы үшін жыл басынан бергі ең табысты апта болуы мүмкін.
Контекст
АҚШ Энергетикалық ақпарат басқармасының (EIA) мәліметінше 2026 жылға қарай жаһандық мұнай қоры артады, бұл мұнай бағасына төмендетуі мүмкін, деп жазады Oil & Gas Journal. Энергетика саласына арналған қазан айындағы шолуда (STEO) ведомство Brent маркалы мұнай бағасы 2025 жылдың төртінші тоқсанында орта есеппен барреліне $62-ға, ал 2026 жылы $52-ға дейін төмендейді деп болжады.
