Неліктен 99% сарапшы Microsoft акцияларын сатып алуға кеңес береді?
Guggenheim инвестбанкі Microsoft технологиялық алыбының акцияларына деген бағасын «бейтарап» деңгейден «сатып алуға» дейін көтерді. Олар компанияның Azure бұлтты платформасы мен Office экожүйесіндегі жасанды интеллектті (AI) монетизациялау әлеуетін ерекше атап өтті. Бұған дейін Уолл-стриттегі соңғы скептиктердің бірі болған Guggenheim енді Microsoft-ты қолдаушылар қатарына қосылды. Қазір сарапшылардың 99%-ы осы компания акцияларын сатып алуға кеңес береді, ал консенсус-божам бағалардың қазіргі деңгейден шамамен 20%-ға өсуін болжайды.
Егжей-тегжейі
Guggenheim сарапшысы Джон ДиФуччи Microsoft акцияларына деген бағасын Neutral (бейтарап) деңгейінен Buy (сатып алу) деңгейіне көтеріп, мақсатты бағаны $586 деңгейінде қалдырды. Бұл соңғы саудадағы жабылу бағасынан 12%-ға жоғары, деп хабарлайды CNBC. Bloomberg мәліметінше, Уолл-стриттегі 73 сарапшының ішінде тек Hedgeye Risk Management қана бейтарап бағаны сақтап отыр. MarketWatch деректеріне сәйкес, Уолл-стриттің ортақ мақсатты бағасы — $629,2. Бұл компанияның нарықтық құны қазіргі деңгейден тағы 20%-ға өседі дегенді білдіреді.
Guggenheim нені байқады?
ДиФуччи өз бағасын Microsoft-тың жасанды интеллект саласындағы жетістіктерді тиімді пайдалану қабілетіне деген сенімімен түсіндірді. «Инвесторлар жасанды интеллект кімге пайда әкеледі, кімге әкелмейді — соны анықтауға тырысқан кезде, біз үшін Microsoft бұл технологияның нақты пайдасын көретін ойыншылардың бірі екені айқын», — деп жазды ол Bloomberg келтірген жазбасында.
Сарапшының айтуынша, Microsoft-тың өсуіне екі негізгі фактор әсер етеді: Azure бұлтты платформасы және Microsoft 365 (Office) экожүйесі. Azure жасанды интеллекттің тікелей интеграциясынан пайда көрсе, Office жасырын, бірақ маңызды монетизациялау көзіне айналуы мүмкін. «Microsoft — өнімдерінің құнын арттыра отырып, жасанды интеллект арқылы тікелей табыс таба алатын бірегей қосымша жеткізуші. Бұл Office-тің нарықтағы үстемдігімен байланысты», — дейді ДиФуччи CNBC-ге берген түсіндірмесінде.
Ол Microsoft акцияларының қымбат екенін және жақын арада арзандауы екіталай екенін мойындайды. Бірақ бұл баға компания бизнесінің ауқымы мен тұрақтылығына сай келеді дейді. Microsoft акциялары сенімді деп есептеледі. Себебі компанияны мықты менеджмент басқарып отыр және екі негізгі бағытта монополиялық артықшылыққа ие.
Guggenheim пікірінше, Microsoft-тың жоғары маржалы бағыттары Windows пен Microsoft 365 инвестициялық циклдегі ауытқуларды теңестіруге көмектеседі. ДиФуччи Windows-тың табыстылығы жиі бағаланбайтынын, алайда ол Azure-дың төмен маржалы өсімін өтейтінін айтады. «Windows-тың тыныштығы — шын мәнінде керемет нәрсе», — деп атап өтті ол.
Акциялар нарығындағы жағдай
27 қазандағы саудада Microsoft акциялары 2%-ға өсіп, $534,5 деңгейіне жетті. Бұл — 2025 жылғы 5 тамыздан бергі ең жоғары баға. Жыл басынан бері компанияның нарықтық құны 27%-ға артты. Салыстыру үшін: АҚШ-тың негізгі нарық индексі S&P 500 осы аралықта шамамен 17%-ға ғана өсті.
Microsoft 29 қазанда 2026 қаржы жылының бірінші тоқсаны бойынша есебін жариялайды. Bloomberg атап өткендей, инвесторлар компанияның жасанды интеллект бағытындағы өсу қарқыны мен инвестициялық жоспарларына ерекше назар аударады.
