Nike акциялары өсті: Тим Кук шамамен $3 млн-ға акция сатып алды

Спорттық киім өндіруші Nike компаниясының акциялары 24 желтоқсанда премаркетте 2,2%-ға қымбаттады. Бұған Apple бас директоры Тим Куктың Nike акцияларын шамамен $3 млн-ға сатып алуы себеп болды, деп жазады Reuters.

АҚШ-тың Бағалы қағаздар және биржалар жөніндегі комиссиясына (SEC) 23 желтоқсанда берілген есепке сәйкес, Тим Кук 50 мың Nike акциясын бір данасын $58,97 бағамен сатып алған.

24 желтоқсандағы премаркетте Nike акциялары $58,63 деңгейінде саудаланды.

Тим Кук 2005 жылдан бері Nike директорлар кеңесінің мүшесі және компанияның жетекші тәуелсіз директоры саналады. Құжаттарға сәйкес, 22 желтоқсандағы жағдай бойынша оның иелігінде шамамен 105 мың Nike акциясы болған.

Контекст

Бұл мәміле Nike компаниясы 2026 қаржы жылының екінші тоқсаны бойынша әлсіз есеп жариялағаннан кейін бірнеше күн өткен соң жасалды. 30 қарашада аяқталған тоқсанда: жалпы маржа 3 пайыздық тармаққа қысқарды, қорлар азайды (негізінен жоғары импорттық баж салығына байланысты), Қытайдағы сатылымдар әлсіз болды.

18 желтоқсанда есеп шыққаннан бері Nike акциялары шамамен 13%-ға арзандады. Соған қарамастан, Jefferies сарапшылары желтоқсанның соңында Nike-ты 2026 жылға арналған спорттық киім секторындағы ең үздік таңдау деп атады. Олар әсіресе Солтүстік Америкадағы көрсеткіштерге назар аударды — компания бұл аймақта алдағы тоқсанда орташа өсім күтеді.

MarketWatch деректеріне сүйенсек, Nike акцияларын бақылап отырған 38 аналитиктің басым бөлігі оларды сатып алуға кеңес береді: 25 сарапшы — Buy немесе Overweight, 11 сарапшы — ұстау, тек 2 сарапшы — сату ұсынысын берген.