Novo Nordisk пен Pfizer арықтататын дәрі әзірлеушіні сатып алу бәсекесін күшейтті
Wegovy және Ozempic сияқты семіздікке қарсы дәрі-дәрмек өндірушісі Novo Nordisk пен америкалық Pfizer фармкомпаниясы салмақ тастауға арналған препараттармен айналысатын америкалық Metsera стартапын сатып алу ұсыныстарын жақсартты. Алайда компанияның өзі, Financial Times жазуынша, Novo ұсынысын «неғұрлым тиімді» деп санап отыр.
Novo ұсынысы
Жаңартылған ұсынысқа сәйкес, Даниялық Novo Nordisk Metsera бағасын бұрынғы $9 млрд емес, $10 млрд деп бағалап отыр. Novo келісімге қол қойылғаннан кейін бірден Metsera акциясына $62,2 көлемінде аванс төлеуге дайын. Бұл сома арқылы Novo компанияның дауыс беру құқығы жоқ 50% акциясын алады, ал мәміле толық жабылған соң олар бақылау пакеті ретінде қайта есептеледі. Бұдан бөлек, егер клиникалық сынақтарда маңызды кезеңдерден өтсе Metsera әрбір акция үшін тағы $24 ала алады.
Metsera бұл ұсыныс 19 қыркүйектегі биржалық сауда жабылған кездегі бағамен салыстырғанда 159% артық екенін атап өтті. Бұл күн — Pfizer компаниясы Metsera-ны сатып алғысы келетінін алғаш хабарлаған күн.
Pfizer ұсынысы
Pfizer де өз ұсынысын жақсартып, Metsera-ны $8,1 млрд деп бағалады (бұған дейін $7,3 млрд). Financial Times жазуынша, тараптардың келіссөз жүргізуге тағы екі жұмыс күні бар.
Metsera үшін күрес
Financial Times бұл жағдайды соңғы жылдардағы ең қызу және жария түрде өтіп жатқан биотехнологиялық «соғыстардың» бірі деп атады. Екі компания да салмақ түсіру дәрі-дәрмек нарығында сәтсіздіктерге тап болған: Novo Nordisk америкалық Eli Lilly компаниясына нарықтағы көшбасшылықты беріп қойса, Pfizer-дің өз препараты сынақ кезінде жанама әсерлер көрсетіп, сәтсіз аяқталған.
Metsera компаниясын жоғалту пандемиядан кейінгі орнын қайта алғысы келетін Pfizer үшін ауыр соққы болуы мүмкін, деп жазды Bloomberg.
Novo тиімді қарсы ұсыныс жасағаннан кейін Pfizer компаниясы дат компаниясы мен Metsera-ны бәсекені басып-жаншымақ болды деп айыптап, мәмілені бұғаттау үшін сотқа шағым түсірді.
Bloomberg жазуынша, кейбір сарапшылар Pfizer мен Novo үш-ақ жыл бұрын құрылған және әзірлеу сатысындағы бірнеше препараты ғана бар стартапқа тым жоғары баға ұсынып жатыр деп алаңдауда. Metsera акциялары 4 қарашадағы саудада 20%-ға жуық өсті. Mizuho Securities сарапшысы Джаред Хольцтің пікірінше, бұл жағдай нарықтың бұл бәсекеде баға әлі де өсуі мүмкін екенін болжап отырғанын көрсетеді.
