Ocugen стартапы жаңа мәміле жасасты: Сарапшылар өсім 670% болатынын болжады
Гендік терапиямен айналысатын шағын капиталды биотехнологиялық стартап Ocugen фиброз бен қатерлі ісікке қарсы жаңа терапия түрлерін әзірлейтін шағын Carisma Therapeutics компаниясымен бірлескен кәсіпорын құру туралы келісімге келді. Бұл мәміле аясында Ocugen өзінің регенеративті медицина бөлімшесін жаңа компанияға аударады және оның басқару құқығына ие болады. Noble сарапшылары бұл стартап акцияларының 670 пайыздан астам өсетінін болжап отыр.
Толығырақ
Nasdaq-тағы капитализациясы 302 миллион доллар болатын Ocugen Carisma Therapeutics компаниясымен бірлескен кәсіпорын құруға келісті. Бұл құрылымға Ocugen өзінің OrthoCellix деп аталатын регенеративті жасушалық медицина бөлімшесін және NeoCart технологиясын өткізеді. NeoCart — тін инженериясы арқылы шеміршек импланттарын жасау әдісі. Мұндай имплант тізе буынындағы шеміршек ақауларын қалпына келтіре алады деп күтілуде.
Капитализациясы 17,9 миллион доллар болатын Carisma бірлескен кәсіпорынға өзінің барлық қызметін қосады. Сонымен қатар, Ocugen және өзге жеке инвесторлардан шамамен 25 миллион доллар тарту жоспарланып отыр. Бұл қаражат NeoCart-тың клиникалық сынақтарын аяқтауға мүмкіндік береді делінген ресми хабарламада.
Мәміле 2025 жылдың соңына дейін аяқталады деп жоспарланып отыр. Нәтижесінде Ocugen акционерлері мен қаржыландыруға қатысатын басқа да жеке инвесторлар біріктірілген компанияның шамамен 90 пайызына ие болады, ал Carisma акцияларын иеленушілерге 10 пайыз шамасында үлес тиеді.
Қосылудан кейін Carisma атауын өзгертіп, OrthoCellix деп аталатын болады және Nasdaq-та жаңа OCLX тикерімен тіркеледі. Екі компанияның директорлар кеңесі де бұл қайта құруды мақұлдады.
Инвесторлар қалай қабылдады?
Аралас реакция болды: 24 маусымда мәміле жарияланғаннан кейін Ocugen акциялары 5,5 пайызға өсіп, 1,03 долларға жетті, ал Carisma акциялары шамамен 5,2 пайызға арзандап, 0,43 доллар болды.
25 маусымдағы сауда басында Carisma акциялары тағы 2 пайыздан астам арзандады, ал Ocugen қағаздары дәл сонша өсті.
Сарапшылар не дейді?
Noble Capital Markets брокерлік-дилерлік компаниясының 24 маусымда жарияланған есебіне сүйенсек, бұл мәміле Ocugen үшін тиімді болмақ. Себебі регенеративті медицина — Ocugen-нің басты бағыты емес. Компания негізінен гендік терапия мен вакцина әзірлеуге басымдық береді. Сондықтан NeoCart жобасын бұл бағытқа маманданған компанияның дамытуы әлдеқайда тиімді болады деп есептейді сарапшылар.
Осы күні сарапшылар Ocugen акцияларына Outperform рейтингін (яғни, сатып алуға кеңес) және 8 доллар көлемінде мақсатты баға берді. Бұл көрсеткіш ағымдағы бағадан 670 пайыздан астам жоғары.
Сол күні HC Wainwright және Chardan Capital сарапшылары да өздерінің «сатып алу» рейтингін және 7 доллар көлеміндегі мақсатты бағасын растады. Бұл деректер Yahoo Finance порталында жарияланды.
MarketWatch мәліметінше, Уолл-стриттегі төрт сарапшының барлығы да Ocugen акцияларын сатып алуға кеңес беріп отыр. Акциялардың орташа мақсатты бағасы — 6,5 доллар. Бұл 24 маусымдағы жабылу бағасынан 531 пайыз жоғары өсім потенциалын білдіреді.
