OpenAI бағасы $750 млрд-қа жетуі мүмкін. Бұдан кім ұтады?
OpenAI жаңа қаржыландыру раунды бойынша инвесторлармен алдын ала келіссөздер жүргізіп жатыр. Егер мәміле іске асса, компанияның бағалануы күрт өсуі мүмкін. Стартап әлі биржаға шықпағанымен, оның бағасының қайта қаралуы Microsoft бастаған ірі технологиялық компаниялардың акцияларына оң әсер етуі ықтимал.
Егжей-тегжейлі
The Information дереккөздерінің айтуынша OpenAI бизнесін шамамен $750 млрд деңгейінде бағалап, жаңа инвестиция тартуға дайындалып жатыр. Бұл 2025 жылдың күзінде өткен ішкі мәміледегі бағадан 1,5 есе жоғары. Ол кезде ChatGPT әзірлеушісінің кейбір қызметкерлері акцияларын институционал инвесторларға сатқан еді.
Жаңа раундта OpenAI $100 млрд-қа дейін қаржы тартуды көздеп отыр.
OpenAI бағасының өсуінен кімдер ұтады?
Barron’s-тың мәліметінше OpenAI-дің қымбаттауы онымен инвестициялық және инфрақұрылымдық байланысы бар кемінде сегіз технологиялық компанияның акцияларын қолдайды.
Негізгі бенефициар — Microsoft. Стартаптың қайта құрылымынан кейін корпорация OpenAI-дің коммерциялық бөлімінің шамамен 30% үлесіне ие болады. OpenAI-дің қаржылық тұрақтылығы серіктестер алдындағы міндеттемелердің орындалуына кепіл болады. Атап айтқанда, Oracle-пен бес жылдық бұлтты келісім, CoreWeave және Broadcom-пен контрактілер, сондай-ақ Nvidia қолдайтын инвестициялық жоспарлар. Сонымен қатар OpenAI-ге инвестиция салуды Amazon мен The Walt Disney Company де қарастырып отыр.
Екінші топтағы ұтушылар — деректерді сақтау және өңдеу жабдықтарын өндірушілер. 2025 жылы Western Digital мен Seagate Technology акциялары цифрлық сақтау сыйымдылығына сұраныс артқан соң үш еседен астам өсті.
Потенциалды бенефициарлардың қатарында Micron Technology да бар. OpenAI Stargate дата-орталықтары жобасына басқа серіктестерді тартқанымен, саладағы қуат тапшылығы жад чиптерін шығаратын барлық ірі өндірушілерге жаңа тапсырыстар әкеледі, деп жазады Barron’s.
Контекст
Forge Global сауда платформасының дерегінше соңғы бір жылда OpenAI акциялары биржадан тыс нарықта 2,5 есе қымбаттап, бір акция үшін $286-дан $723-ке дейін өсті. Бұл стартаптың шамамен $500 млрд бағалануына сәйкес келеді.
Reuters бұған дейін OpenAI тарихтағы ең ірі IPO-лардың біріне дайындалып жатқанын хабарлаған. Компанияның ықтимал бағасы $1 трлн-ға дейін жетуі мүмкін. Алдын ала талқылаулар барысында OpenAI кемінде $60 млрд тарту мүмкіндігін қарастырған. Дереккөздердің айтуынша компания биржаға шығу үшін құжаттарды 2026 жылдың екінші жартысында тапсыруы мүмкін.
Алайда OpenAI-дің өзі жақын уақытта IPO өткізу күн тәртібінде жоқ екенін мәлімдеді.
