OpenAI басшысы банкирлерді ЖИ-алаяқтықтың жаңа толқыны жайлы ескертті. Бұдан кім ұтты
OpenAI басшысы Сэм Альтман қаржы компаниялары жасанды интеллектті пайдалану арқылы жасалатын алаяқтықтың көбеюіне қаншалықты дайын екеніне алаңдайтынын мәлімдеді, деп жазады Barron's. Оның айтуынша банктер мұндай схемалардың жылдам күрделенуіне дайын емес. Сонымен бірге OpenAI қаржы секторында процестерді автоматтандыру және дәл сол қауіптерден қорғану жүйесін күшейту арқылы табыс таба бастады. Ал инвесторлар киберқауіпсіздік саласындағы ЖИ-шешімдерге қызығушылықтың артуынан пайда таба алады.
Егжей-тегжейлі
OpenAI басшысы Сэм Альтман банктердің әлі күнге дейін жеке басты растау үшін дауыс биометриясын қолданатынына таңғалғанын жеткізді. «Ірі сомада ақша аудару үшін немесе басқа да әрекет жасау үшін тексеру сөз тіркесін айтасыз — операция орындалады. Мұндай тәсілдің әлі де қолданылып жатқаны — ессіздік», — деді ол АҚШ-тың Федералды резервтік жүйесі ұйымдастырған конференцияда, Вашингтонда жиналған жетекші банкирлер алдында сөйлеген сөзінде.
Альтманның айтуынша жасанды интеллект қазіргі аутентификация әдістерінің барлығын, тек құпиясөздерден басқасын, толық айналып өте алады. «Селфи жасап, қол бұлғау немесе дауыс арқылы тану сияқты сәнді технологиялар — бәрі де мені қатты алаңдатады, өйткені олар бізді алаяқтық дағдарысына алып келуі мүмкін», — деп ескертті ол. «Қазір бұл — жай дауыс арқылы қоңырау. Жақын арада бұл FaceTime бейнеқоңырауы болады — және оны шынайы адамнан ажырату мүмкін болмайды», — деді Альтман.
АҚШ ФРЖ-ның қадағалау жөніндегі вице-төрайымы Мишель Боуман Альтманға орталық банктің дәл осындай алаяқтықпен күресте ЖИ-ді қолдану мүмкіндігін қарастырып жатқанын жеткізді. «Бәлкім, біз осындай жалған контентті немесе қасақана жасалған еліктеулерді анықтау саласында серіктестік орната алатын шығармыз», — деді ол. Альтман бұл бағытта ынтымақтаса жұмыс істеуге дайын екенін айтты.
OpenAI-ға бұл не үшін тиімді?
OpenAI өз өнімдерін банктерге қызметкерлердің жұмысын автоматтандыру, есеп дайындау және деректерді талдау үшін сата бастады. Barron's басылымының жазуынша ЖИ құралдарын қалай қолдануға болатынын компаниялар көбірек түсінген сайын, стартаптың табысы да арта түседі.
Жасанды интеллект — қаскөйлер үшін қуатты құрал болғанымен, ол киберқауіпсіздік саласының өз заңдарын қайта жазып жатыр. Бұл корпорацияларды өз деректерін және жүйелерін қорғауға жаңаша қарауға мәжбүр етеді, деп атап өтеді McKinsey & Co. консалтингтік компаниясы. Ал Grand View Research дерегі бойынша, алдағы алты жылда киберқауіпсіздік саласындағы ЖИ нарығы жыл сайын төрттен бірге (25%) өсіп отырады.
Бұдан қалай пайда табуға болады?
OpenAI акциялары биржада саудаланбайды. Дегенмен, осы аптада жеке қаржы және бизнес-болжамдар бойынша кеңес беретін америкалық Kiplinger басылымы киберқауіпсіздік саласында сатып алуға тұрарлық ең мықты алты акцияны атады. Олар: SailPoint, Qualys, SentinelOne, Tenable, Palo Alto Networks және Check Point Software Technologies.
2025 жылы осы алтаудың ішінде Check Point Software Technologies ең табысты акция болып отыр — жылдың басынан бері 19%-ға қымбаттаған. Ал Tenable, SentinelOne және SailPoint акциялары әзірге минус аймағында. FactSet деректері бойынша Уолл-стрит аналитиктері Qualys компаниясына бейтарап көзқараста. Ал қалған бес компания бойынша консенсус-рекомендациясы — сатып алу (Overweight).
