OpenAI мен AMD мәмілесі чипмейкер акциясын жылдық максимумға жеткізді: не өзгереді?
Чип өндіруші Advanced Micro Devices (AMD) акциясы шамамен 30% шарықтау арқылы жылдық максимумға жетіп, рекордтық деңгейге жақындады. Ралли ChatGPT әзірлеушісі OpenAI-мен жасалған келісім туралы хабардан кейін басталды. Келісімге сәйкес, AMD ондаған миллиард доллар көлемінде ЖИ-процессорларын жеткізеді, ал OpenAI компанияның 10%-ға дейінгі үлесін иелене алады. Мәміле Nvidia үстемдік ететін салада AMD үшін маңызды орын алуға мүмкіндік береді.
Егжей-тегжейлі
CNBC дерегінше, AMD компаниясының нарықтық құны 6 қазандағы саудада 29% өсіп, бір жылдан астам уақыт ішінде алғаш рет 2024 жылдың наурызындағы рекордтық деңгейге жақындады. Barron’s есебіне сәйкес, бұл — AMD тарихындағы ең ірі бір күндік өсім.
Жасанды интеллект инфрақұрылымын құруға арналған микросхемалардың екінші негізгі жеткізушісі болуға мүмкіндік беретін ұзақ мерзімді мәміле туралы OpenAI мен AMD хабарлағаннан кейін серпіліс болды, дейді Barron’s. ChatGPT әзірлеушісі AMD-дан жалпы қуаты 6 гигаватт болатын графикалық процессорларды миллиардтаған долларға сатып алады, деп жазады Financial Times. Мәміленің нақты сомасы жария етілмеген, бірақ 1 гигаватт қуаттың іске қосылуы шамамен $50 млрд тұрады, оның үштен екі бөлігі чиптер мен инфрақұрылымға тиесілі, деп келтіреді FT OpenAI бағасын.
Бұдан бөлек, келісім ChatGPT әзірлеушісіне AMD компаниясының 10%-ға дейінгі үлесін иелену құқығын береді. AMD OpenAI-ға 160 млн акцияны әрқайсысын $0,01 бағамен сатып алу варрантын ұсынған. Бұл мүмкіндік AMD акциясының бағасы өсіп, OpenAI оның чиптерін іске қосқан сайын кезең-кезеңімен жүзеге асырылады. Мұндай пакет компания капиталының шамамен 10%-ына тең, дейді FT.
ЖИ-чиптері нарығы үшін нені білдіреді?
AMD әлі де ЖИ-үдеткіш (accelerator chips) нарығында Nvidia-дан едәуір артта қалғанымен, компания OpenAI-мен серіктестікті кірістің маңызды көзі ретінде қарастырады — алғашқы айтарлықтай нәтижелер келесі жылдан бастап, ал нақты серпіліс 2027 жылы күтіледі, деп түсіндіреді Bloomberg.
AMD басшылығының айтуынша, OpenAI-мен серіктестік чипмейкерге алдағы жылдары жылдық табысын ондаған миллиард долларға жеткізуге және жалпы сатылым көлемінен $100 млрд-тан астам табыс алуға мүмкіндік береді. Reuters-тің LSEG деректеріне сүйенсек, биыл сарапшылар компанияның табысын орта есеппен $32,78 млрд деңгейінде болжайды.
Компания өкілдері бұл келісім өнімді кең ауқымды жол ашып, болашақта табысты одан әрі арттырады деп үміттенеді. Маңыздысы — бұл мәміле AMD технологияларын нарықтағы негізгі шешімдер қатарына енгізіп, компанияға ЖИ инфрақұрылымын кеңейтуге миллиардтаған доллар құйып жатқан OpenAI және өзге ірі дата-орталық иелерімен қатар болуға мүмкіндік береді, деп жазады Bloomberg. Сонымен қатар, FT-нің мәліметінше, AMD технологиялық артта қалушылығын қысқартуға ұмтылып, қазірдің өзінде Microsoft пен Meta сияқты ірі клиенттермен келісіп алған.
Bloomberg-тің мәліметінше, OpenAI AMD-пен серіктес болуы — Nvidia-ға тәуелділікті азайтып, тұрақтырақ балама құру әрекеті болуы мүмкін. Nvidia жуырда қаржы ЖИ дата-орталықтарының инфрақұрылымын құру үшін ChatGPT әзірлеушісіне $100 млрд инвестиция салатынын хабарлады. Қыркүйекте OpenAI Oracle компаниясынан бес жыл ішінде $300 млрд көлемінде есептеу қуатын сатып алу туралы келісім жасады және Oracle, SoftBank және өзге серіктестермен бірге АҚШ-та қосымша 7 ГВт энергия тұтынатын дата-орталықтар салуды жоспарлап отыр. Бұдан бөлек, The Wall Street Journal хабарлауынша, компания Broadcom-пен өз ЖИ-чиптерін жасау бағытында жұмыс істеп жатыр.
AMD мен OpenAI арасындағы келісім — жасанды интеллектке арналған графикалық процессорларды жеткізу бойынша ең ірі мәмілелердің бірі, деп жазады CNBC. Бірақ, келісім капитал, үлес және есептеу қуаты бір топ ірі компанияның ішінде ғана айналатын жабық экожүйені күшейтіп отыр. Компаниялар технологияны өздері жасап та, өздері қолдап та отыр. Nvidia өз чиптерін сатып алуға капитал бөледі, Oracle дата-орталықтарын салады, AMD мен Broadcom жеткізуші қызметін атқарады, ал OpenAI сұранысты қамтамасыз етеді. Сарапшылардың айтуынша, егер осы тізбектегі бір буын әлсіресе, бүкіл жүйе айтарлықтай қиындыққа ұшырауы мүмкін.
Нарық қалай қабылдады?
AMD мен OpenAI арасындағы келісім “бұқа” нарығын қолдап, чип өндіруші компаниялардың акцияларының раллиін тудырып, қор индекстері тарихи максимумдарға жетті, дейді Bloomberg. S&P 500 индексі қатарынан жетінші күн өсіп, мамырдан бергі ең ұзақ өсім сериясын көрсетті, деп есептейді агенттік. Жартылай өткізгіштер секторының индексі 4% көтерілді, ал Nvidia акциясы 1,4% арзандағанымен, кейін көп бөлігін қайтарып алды.
«AMD-ның OpenAI-мен “ондаған миллиард долларлық” серіктестікке кірісетіні туралы хабар — сектор үшін шешуші катализатор болды, — деді Bloomberg-ке Miller Tabak компаниясының өкілі Мэтт Мэйли. — ЖИ феноменіне байланысты инвестициялық қызығушылық жаңа импульс алды».
