Oracle акциялары 25 жылдағы ең нашар тоқсанға жақындап қалды. Инвесторлар алаңдаулы

Бұлтты сервис пен ЖИ үшін дата-орталықтарға иелік ететін Oracle акциялары тоқсан басталғалы шамамен 30% арзандады. Жұма, 26 желтоқсандағы саудада олар 0,7% өсті. Дегенмен жыл соңына дейін бар болғаны үш сауда сессиясы қалғанын ескерсек, бұл тоқсан компания үшін 2001 жылдан бергі ең нашар нәтиже болуы мүмкін. Ол жылдары дотком дағдарысы болған, деп жазады CNBC. Телеарнаның түсіндіруінше, инвесторлар Oracle-дың OpenAI үшін қосымша инфрақұрылымды тез арада іске қоса алуына барған сайын күмәндана бастады. OpenAI қыркүйекте бұл инфрақұрылымға 300 млрд доллардан аса қаржы жұмсауға міндеттеме алған.

Oracle-мен не болып жатыр?

Компанияның қарызы көбейеді деген алаңдаушылыққа желтоқсанда шыққан тоқсандық есеп те әсер етті. Есепте түсім мен еркін ақша ағымы күткеннен әлсіз болғаны айтылды.

Инвесторлармен қоңырауда Oracle-дың жаңа қаржы директоры Даг Керинг 2026 қаржы жылындағы капиталдық шығындар 50 млрд доллар болады деді. Бұл қыркүйекте жоспарланғаннан 43% көп. Сонымен қатар бір жыл бұрынғы деңгейден екі есе жоғары.

Осы уақытта Oracle бұлт инфрақұрылымының қуатын арттыру үшін 248 млрд долларға лизинг келісімдерін жасауды көздеп отыр. Бұған қоса компания өз дата-орталықтарын да салып жатыр.

Мұндай қарқын қарызды тағы да көбірек тартуды талап етеді. Қыркүйекте Oracle технология секторындағы тарихтағы ең ірі облигация орналастыруларының бірін өткізіп, 18 млрд доллар қарыз алған.

Соған қарамастан Керинг компанияның инвестициялық кредиттік рейтингін сақтаймыз деп уәде берді. Бірақ нарықтағы кейбір қатысушылар бұған күмәнмен қарайды. Олар қарыз алушы дефолт жасаса сақтандыру ретінде кредиттік дефолт своптарын (CDS) сатып ала бастады.

«Oracle инвестициялық рейтингті әрең ұстап отыр. Біз компания OpenAI-мен келісімшартты қайта қарамай, барлық міндеттемесін орындай алады деп сенбей отырмыз», деп жазды D.A. Davidson талдаушылары 12 желтоқсандағы шолуда. Оны CNBC келтіреді.

Сол күні Oracle Bloomberg-тің бір хабарын жоққа шығаруға мәжбүр болды. Ол хабарда Oracle OpenAI үшін дата-орталықтар құрылысын 2027 емес, 2028 жылы аяқтайды делінген.

Кейінірек тағы бір ақпарат шықты. Онда компанияның көптен бергі инвесторы Blue Owl жаңа дата-орталықтардың құрылысын қаржыландыруды жоспарламайтыны айтылды. Себебі ол бұл инвестицияны жеткілікті табысты деп санамайды. Oracle бұл деректі растады.

Suncoast Equity Management басқарушы директоры Эрик Линчтің айтуынша, OpenAI-мен келісім Oracle үшін көп ақша жұмсатқызады. Сонымен бірге компанияны ChatGPT әзірлеушісіне тым тәуелді етеді. «OpenAI жеткілікті сұраныс әкеле ала ма?» дейді ол.

Қазанда Oracle жедел өсім стратегиясын таныстырды. Компания 2025 қаржы жылындағы 57 млрд доллар түсімді 2030 жылға қарай 225 млрд долларға жеткізуді мақсат етеді.

Негізгі қозғаушы күш ретінде Oracle Nvidia графикалық процессорларына негізделген ЖИ инфрақұрылымын атап отыр. Алайда CNBC сөйлескен талдаушылардың айтуынша, бұлт бизнесіндегі «аса жылдам өсім» табыстылыққа кері әсер етуі мүмкін. Өйткені Oracle-дың негізгі бағдарламалық бизнесі әлдеқайда жоғары маржамен жұмыс істейді.

Талдаушылар акция бойынша не ұсынады?

Wells Fargo талдаушысы Майкл Террин желтоқсанда Oracle акциясын бақылауға алып, оған «сатып алу» рейтингін берді. Ол мақсатты бағаны 280 доллар деп қойды. Бұл қазіргі деңгейден 41% жоғары.

Терриннің ойынша, егер компания OpenAI-мен келісімшартты толық орындаса, 2029 жылға қарай ол Oracle түсімінің үштен бірінен астамын бере алады. «Oracle біртіндеп “құнға” бағытталған модельден алыстап, өсімге ставка жасап отыр», деді Террин. CNBC оның жазбасын жариялады.

Дегенмен компанияның басты мәселелерінің бірі — бұлт инфрақұрылымы нарығындағы үлесінің өте аз болуы. Бұл нарықта Amazon, Microsoft және Google көш бастап тұр. Ал Oracle клиенттері қатарында Meta, Uber және Илон Масктің xAI компаниясы бар.

Талдаушының айтуынша, Oracle-дың табысы ЖИ инфрақұрылымын іске асыруына байланысты болады. «Клиенттер компания ЖИ модельдерін үйретуге арналған ең ірі кластерлердің бірін құрып, шынымен де міндетті атқара алатынын көрген кезде, деректерді Oracle инфрақұрылымына көшіруді ойлай бастайды», дейді ол.

Уолл-стритте Oracle акциясына жалпы көзқарас әлі де оң. MarketWatch дерегіне сүйенсек, 46 талдаушының 33-і бұл қағазды сатып алуға кеңес береді. Тек біреуі ғана сатуды ұсынады. Үш ай бұрын «сатып алу» рейтингі үшеуге аз болған.

Сонымен қатар тоқсандық есеп жарияланғаннан бері ортақ мақсатты баға 12,6% төмендеді. Қазір ол шамамен 294 доллар. Бұл қазіргі бағадан 46% жоғары.