Oracle Meta-мен $20 млрдтық келіссөз жүргізуде. Бұл акцияларға қалай әсер етеді?
Бұлтты қызметтер жеткізушісі Oracle Facebook пен Instagram иесі Meta Platforms компаниясымен шамамен $20 млрд көлеміндегі келісімшарт жөнінде келіссөздер жүргізіп жатыр, деп хабарлады Bloomberg. Агенттіктің жазуынша, бұл Oracle-дың ірі инфрақұрылым жеткізушісі ретіндегі рөлінің артып келе жатқанын көрсетеді. Жұма күні компания акциялары 4%-ға қымбаттады.
Егжей-тегжейі
Bloomberg және Reuters дереккөздерінің хабарлауынша, көпжылдық келісім аясында Oracle Meta-ға жасанды интеллект үлгілерін оқыту және енгізу үшін есептеу қуатын ұсынады. Бұл Meta-ның бар жеткізушілеріне қосымша қолдау болады. Келісім сомасы шамамен $20 млрд, бірақ ол артуы мүмкін. Сондай-ақ түпкілікті құжатқа қол қойылғанға дейін шарттар өзгеруі ықтимал.
Meta бұл жағдайға түсініктеме бермеді, ал Oracle агенттіктің сауалына жауап қатпады.
Жұма күнгі саудада Oracle акциялары 3%-ға қымбаттап, Bloomberg хабарынан кейін өсімін жылдамдатты. Күнді 4,1% өсіммен $308,66 деңгейінде аяқтады. Саудадан кейінгі сессияда тағы 0,7%-ға көтерілді. Жыл басынан бері акциялар 85%-ға өсті. Ал Meta Platforms қағаздары керісінше, жұма күні 0,2%-ға төмендеп, $778,38 болды. Қаңтар айымен салыстырғанда олардың бағасы 33%-ға артқан.
Контекст
Bloomberg-тің жазуынша, бұл келісім Oracle-дың бұлтты инфрақұрылым бөлімшесі үшін жаңа жетістік болмақ. Өткен аптада компания орындалмаған тапсырыстар көлемінің күрт артқанын хабарлады: өткен тоқсан соңындағы $138 млрд-тан 2025 жылғы тамыздың соңына қарай $455 млрд-қа дейін өскен. Oracle бірнеше ірі компаниямен келісім жасады. The Wall Street Journal мәліметінше, соның бірі — OpenAI. Ол бес жылға 4,5 гигаватт қуатты жалға алған, келісім құны $300 млрд. Сонымен бірге Oracle-дың жасанды интеллект саласында тағы екі клиенті бар, бірақ олардың атауы аталмаған. TD Cowen және Melius Research сарапшылары олардың бірі Илона Масктың xAI стартапы, екіншісі Meta Platforms болуы мүмкін деп болжайды.
Инвесторлар Oracle-дың бір ғана ірі клиентке тәуелділігіне алаңдаушылық білдірді. Осы аптада Moody’s агенттігі компанияның ЖИ бизнесінің шапшаң өсуіне байланысты тәуекелдер барын ескертті. Оның ішінде $300 млрд-тық ірі келісім де бар. Бірақ рейтинг агенттігі Oracle-дың несие рейтингін өзгертпеді. Соңғы рет Moody’s шілде айында болжамды «тұрақтыдан» «теріс» деңгейге түсірген, дегенмен Baa2 рейтингін сақтап қалды.
Қарыз жүктемесі мен теріс ақша ағымына қатысты қауіпке қарамастан, ірі келісім компания акцияларының өсуіне себеп болды: 10 қыркүйекте тоқсандық есеп жарияланғаннан кейін олардың бағасы $328,3-қа дейін көтеріліп, тарихи рекорд жаңартты.
MarketWatch дерегінше, бұлтты қызметтер жеткізушісін бақылайтын 43 сарапшының 30-ы акцияларды сатып алуға кеңес береді, ал 13-і ұстауды жөн көреді. Сатуға шақыратындар жоқ. Уолл-стриттің консенсус бағасы бір акция үшін $336,5, бұл қазіргі бағадан 9%-ға жоғары.
