Oreo печеньесін өндіруші жоғары какао бағасына байланысты болжамдарын төмендетті
Oreo печеньесі мен Milka шоколадының өндірушісі Mondelez International жылдық кіріс пен пайда бойынша болжамын нашарлатты. Бұған какао бағасының жоғары болуы себеп болды, деп жазады Bloomberg. Mondelez акциялары кеңейтілген саудада құлдырады.
Егжей-тегжейлі
Mondelez 2025 жылы органикалық табыстың өсімі (қосып алынған компаниялардың әсерін есептемегендегі дербес өсім) кемінде 4% болады деп күтеді, бұған дейін бұл көрсеткіш шамамен 5% болады деп болжанған еді. Бір акцияға шаққандағы түзетілген пайда (EPS) болжамы да қайта қаралды: ол 15%-ға қысқарады, ал бұған дейін Mondelez 10%-ға төмендеуді күткен болатын.
Өзгертілген болжамдар какао бағасының жоғары болуы бизнесті қысымда ұстауды жалғастырып отырғанын көрсетеді, деп жазады Bloomberg. Өсіп жатқан экономикалық ауыртпалық жағдайында бағаны ұстап тұру және тұтынушыларды үркітіп алмау үшін Mondelez өнім көлемін азайтып отыр (бұл құбылыс shrinkflation – «қысқарту арқылы инфляция» деп аталады): бұл кейбір брендтердің бағасын бір қаптамасы үшін 3–4 доллардан төмен деңгейде сақтауға мүмкіндік береді, деп жазады агенттік.
Mondelez-дің бас директоры Дирк Ван де Пут компания нәтижелеріне «какао құнының рекордтық инфляциясы» әсер еткенін мойындады. «Біз кейбір нарықтарда қиын жағдайдың жалғасуын күтсек те, соңғы уақытта какао бағасының төмендеуі және биылғы күзде жақсы өнім алуға қатысты үмітті белгілер бізді жігерлендіреді», – деді Ван де Пут. Оның айтуынша үшінші тоқсан биылғы жылы шығындардың шарықтау шегі болды.
Mondelez есептілігі
Үшінші тоқсанда Mondelez табысы өткен жылмен салыстырғанда 6%-ға өсіп, 9,74 млрд долларды құрады. Органикалық сатылым өсімі 3%-ға жетті. Алайда бір акцияға шаққандағы түзетілген пайда 24%-ға төмендеп, 0,73 доллар болды. Компанияның айтуынша пайдаға ең көп әсер еткен – какао қоса есептелген шикізат құнының өсуі.
Какаоға арналған фьючерстер қазан айында соңғы 11 айдағы ең төменгі деңгейге түсті: олар 2024 жылдың желтоқсанында тіркелген рекордпен салыстырғанда 50%-ға арзандады, деп жазады Bloomberg. Дүниежүзілік какао дәніне сұраныс 2025 жылдың соңында және 2026 жылдың басында төмен күйде қала береді деп күтілуде, деп толықтырды агенттік.
Акциялардың жағдайы
Үшінші тоқсан бойынша есеп пен жылдық болжам жарияланғаннан кейін Mondelez акциялары 28 қазанда кеңейтілген саудада шамамен 6%-ға құлдырады. Ал негізгі биржалық сессия 2,35%-дық төмендеумен 56,9 доллар деңгейінде аяқталды.
Сейсенбі күнгі сауда жабылған сәтте Mondelez қағаздарының бағасы 2025 жылдың басымен салыстырғанда небәрі 0,8%-ға ғана жоғары болды. Алайда акцияларды бақылап отырған аналитиктердің басым бөлігі оларды сатып алуға кеңес береді: MarketWatch-тың деректері бойынша 14 «Buy» және бес «Overweight» («нарықтан жоғары») рейтингі бар, ал «Hold» (ұстап тұру) бойынша 10 баға берілген. Сатуға қатысты ұсыныстар жоқ. 71,96 доллар деңгейіндегі орташа мақсатты баға 28 қазандағы сауда жабылуынан тағы шамамен 20% өсімді болжайды.
