Ozempic өндірушісіне белсенді инвестор қызығушылық танытып отыр
Белсенді хедж-қор Parvus Asset Management Ozempic өндірушісі — даниялық Novo Nordisk компаниясындағы үлесін арттырып жатыр және фармацевтикалық компанияның жаңа бас директорын таңдау процесіне ықпал етуді көздейді. Компания акциялары бір жыл ішінде жарты бағасын жоғалтқан болатын. Ал Parvus қорының қызығушылығы туралы жаңалықтан кейін артық салмаққа қарсы дәрі-дәрмек өндіруші компанияның котировкалары 6% күрт өсті. Енді инвесторлар үшін маңызды сұрақ туындайды: Parvus қандай қор және оның қадамдары нені білдіруі мүмкін?
Егжей-тегжейлі
Белсенді хедж-қор Parvus Asset Management даниялық Novo Nordisk-тегі үлесін арттырып жатыр, деп жазады FT дереккөздерге сілтеме жасап. Parvus Дания заңнамасына сәйкес Ozempic өндірушісіндегі үлес көлемін ашып көрсетпеген, ол компанияның 5%-дан аз акциясына ие болса, бұл туралы жария етуге міндетті емес. FT-пен сөйлескендердің айтуынша, хедж-қор Novo Nordisk-тің жаңа басшысын таңдау процесіне ықпал еткісі келеді. Parvus, Novo Nordisk және фармкомпанияның ірі акционері болып саналатын Novo Nordisk Foundation бұл мәселеге қатысты пікір білдіруден бас тартқан.
Bloomberg дерегінше, Novo Nordisk Foundation компанияны екі деңгейлі акция құрылымы арқылы бақылайды: бұл оған компания капиталының небәрі 28%-ына ие бола тұра, дауыс беруші акциялардың 77%-ын басқаруға мүмкіндік береді. Тарихтан белгілі, мұндай құрылым компанияны жұтылудан қорғап келген және белсенді инвестор үшін өзгерістер енгізуді қиындатуы мүмкін, деп атап өтеді агенттік.
Novo Nordisk-тің жай-күйі
Novo Nordisk акциялары соңғы бір жыл ішінде шамамен 50% құлдырады. Бұған артық салмаққа қарсы жаңа дәрі бойынша сынақ нәтижелерінің көңілден шықпауы және күткеннен төмен сатылым себеп болды. Сонымен қатар, компания салмақ тастауға арналған дәрі-дәрмек нарығында америкалық фармацевтикалық алып — Eli Lilly-мен қатаң бәсекеге тап болды. Бұдан бөлек, АҚШ-та түпнұсқа дәрі-дәрмек жетіспеген кезде рұқсат етілген арзан балама көшірмелердің тез таралуы да қысым тудырды.
Мамырда Novo Nordisk жылдық табыс пен пайда өсімі бойынша болжамын төмендетті. Бірнеше күннен кейін компания бас директоры Ларс Фруэргаарда Йоргенсеннің мерзімінен бұрын отставкаға кететіні хабарланды. Бұл шешім күтпеген жағдай болды, 100 жылдық тарихында Novo Nordisk небәрі бес басшы ауыстырған, деп жазады Bloomberg. Қазіргі уақытта компания жаңа бас директор іздеуде, ал Йоргенсен әзірге қызметін жалғастыруда.
Ол 1991 жылдан фармкомпанияда жұмыс жасап келе жатыр, ал 2017 жылдан бастап оны басқарды. Оның басшылығымен Novo Nordisk диабет пен артық салмаққа қарсы дәрілер нарығында пионерге айналды. Wegovy мен Ozempic өнімдерінің сатылымы айтарлықтай өсіп, компанияның нарықтық капитализациясы үш есеге артты. 2023 жылы Novo Nordisk тіпті сәнді брендтердің иесі — француздық LVMH компаниясынан озып, біраз уақытқа Еуропадағы ең қымбат компания атанған болатын. Қазір оның нарықтық құны $334 млрд-қа жетіп, компания Еуропада төртінші орынға жайғасты.
Parvus белсенді қоры несімен танымал?
Лондондық Parvus Asset Management хедж-қоры Merrill Lynch-тің бұрынғы басқарушысы Эдоардо Меркаданте негізін қалаған. Бұған дейін бұл қор Ryanair Holdings бюджеттік әуе компаниясы мен италиялық UniCredit банкi секілді компанияларға назар аударған. Bloomberg жинаған деректерге сәйкес, қазір қордың жария түрде ашылған акциялар пакеттерінің жалпы құны $7,5 млрд-ты құрайды.
Меркаданде британдық букмекерлік компания William Hill-дің канадалық бәсекелес Amaya ойын тобымен бірігуіне және британдық G4S қауіпсіздік компаниясының даталық ISS нысандарды басқару компаниясын 5,2 млрд фунт стерлингке жұтып алу ұсынысына қарсы сәтті тұрған, деп бұрын FT жазған еді.
Акциялардың жай-күйі
Белсенді хедж-қордың қызығушылығы туралы жаңалықтан кейін Novo Nordisk компаниясының акциялары Нью-Йорк қор биржасындағы саудада 6,5% өсіп, соңғы 2,5 айдағы ең жоғары деңгейіне жетті. Алайда, соған қарамастан, қазіргі баға жыл басымен салыстырғанда 12%, ал бір жыл бұрынғы деңгеймен салыстырғанда 47% арзан.
Құлдырауға қарамастан, Novo Nordisk акцияларын бақылап отырған сарапшылардың басым бөлігі — 31-дің ішінен 19-ы бұл қағаздарды сатып алуға кеңес береді (Buy және Overweight рейтингтері), деп хабарлайды MarketWatch деректері. Ал сатуға кеңес берген — небәрі 3 сарапшы (Underweight және Sell рейтингтері). Уолл-стриттің ортақ болжамы бойынша, мақсатты баға бір акция үшін $98 шамасында, бұл ағымдағы бағадан 30% жоғары.
