«Патриоттар үшін маркетплейс» — PSQ акциялары қымбаттауда

АҚШ президенті Дональд Трамптың ұлы акционерлерінің бірі болып табылатын PSQ Holdings шағын компаниясының акциялары 27 мамырда 38%-дан астамға өсті. Компания өз резервтерін әртараптандыру мақсатында жинақтарын биткойн, стейблкоин және басқа да цифрлық активтерге салу мүмкіндігін зерттейтінін мәлімдеді. Қазір инвесторлар қандай ірі компаниялар криптовалюта сатып ала бастағанын мұқият бақылауда, деп жазды CNBC.

PSQ Holdings — маркетплейс PublicSquare, финтех-компания және EveryLife гигиеналық тауарларын өндіруші — осы компаниялардың иесі ретінде белгілі. 27 мамыр, сейсенбі күні Нью-Йорк қор биржасында PSQ акциялары 38%-дан артық өсіп, $2,75-ке жетті. Бұл — 18 наурыздан бергі ең жоғары жабылу бағасы.

Сол күні PublicSquare өз резервтерін сақтау стратегиясы ретінде цифрлық активтерге, соның ішінде табыс әкелетін стейблкоиндер мен биткойнға және басқа да активтерге инвестиция салу мүмкіндігін зерттейтінін хабарлады. Бұл резервтерді әртараптандыруға, капитал тиімділігін арттыруға және жаңа қаржылық технологияларға бейімделуге бағытталған.

Компания стейблкоиндерді өзінің финтех-бизнесіне енгізу мүмкіндігін де қарастырып жатқанын айтты. Бұл туралы компанияның негізін қалаушы әрі бас директоры Майкл Сейферт пресс-релизде мәлімдеді. Оның айтуынша, «дәстүрлі емес» төлем әдістері мен цифрлық активтер алдағы жылдары қаржы нарығында үлкен үлеске ие болады.

PublicSquare жазуынша соңғы уақытта цифрлық активтер тар шеңбердегі инвестициялардан кеңінен мойындалған қаржы құралдарына айналды. Оларды институционалдық деңгейде қабылдау артты: биткойн мен крипто-ETF-тер цифрлық активтердің дәстүрлі нарықтардағы орнын нығайтып, оларды кең аудиторияға қолжетімді етті. Резервтерді басқару стратегиясына цифрлық активтерді енгізе отырып, PSQ криптовалютаны инфляциядан хедж ретінде және өсімді қамтамасыз ететін стратегиялық актив ретінде қарайтын басқа да ойыншыларға жақындай түсуде.

— Мысалы, мамыр айында тағы бір шағын компания — дайын азиялық тағамдар өндірушісі DayDayCook (DDC) өз резервтерін биткойнмен сақтау стратегиясын жариялады. Бір аптадан кейін ол 21 биткойн сатып алғанын хабарлады. Жалпы DDC алты ай ішінде 500 биткойн, ал үш жылда 5000 биткойн жинауды жоспарлап отыр. Компания негізін қалаушы Норма Чудың 27 мамырда жарияланған хаты «Биткойн манифесі» деп аталып, онда былай делінген: «Қаржы жүйесі көп компания мойындағысы келмейтіндей әлсіз. Валюталық тәуекел. Инфляция. Активтер көбікшесі. Осындай жағдайда тек фиат валютасында ақша сақтау — тек консервативті емес, сонымен қатар қауіпті болуы мүмкін».

— 2024 жылдың қарашасында антибиотиктер әзірлейтін шағын компания Acurx Pharmaceuticals-тің директорлар кеңесі резервтік актив ретінде $1 млн-ға дейін биткойн сатып алуға келісті. Компанияның бас директоры Дэвид П. Люсидің айтуынша, биткойн инфляцияға төзімді және 12–18 ай ішінде қажет болмайтын ақшаны сақтау үшін өте қолайлы.

Алайда биткойнды резерв ретінде алғаш болып 2020 жылы сатып алған компания — бағдарламалық жасақтама әзірлеуші MicroStrategy (қазір Strategy деп аталады). CNBC жазуынша бұл компания бүгінде ең ірі корпоративтік биткойн ұстаушы болып саналады: bitbo.io порталының 26 мамырдағы дерегіне сәйкес, компанияда 580 мың токен бар. 2021 жылы Илон Масктың Tesla компаниясы да MicroStrategy үлгісін қайталады. CNBC мәлімдегендей, биткойнның корпоративтік қазыналық активке айналуы криптовалюта үшін маңызды катализатор болып саналады және инвесторлар қай компания биткойн сатып ала бастағанын жіті бақылайды.

Қазір PSQ Holdings акциялары жарты жыл бұрынғы бағадан үш есе арзан. 2024 жылдың 3 желтоқсанында акциялар бір күнде 270%-ға өсіп, $7,77-ге жеткен болатын. Ол кезде компания акционерлерінің бірі, АҚШ-тың жаңадан сайланған президенті Дональд Трамптың ұлы Дональд Трамп-кіші директорлар кеңесіне кіргені жарияланған еді.

MarketWatch мәліметінше PSQ акцияларына бар болғаны екі сараптамалық рейтинг берілген, екеуі де — «сатып алуға кеңес береді» (Buy). Орташа мақсатты баға — $6, бұл қазіргі бағамен салыстырғанда екі еседен астам өсімді білдіреді.