Пекин АҚШ-тың барлық тауарына баж салығын 125%-ға көтереді

Қытай 12 сәуірден бастап АҚШ-тан импортталатын тауарларға баж салығын 125%-ға дейін көтеретінін мәлімдеді. Бұл қадам АҚШ тарапынан Қытай өнімдеріне салықтардың 145%-ға жеткеніне жауап ретінде қабылданды. Бірақ Пекин бұл шара соңғы болатынын айтты.

Толығырақ

11 сәуірде Қытай қаржы министрлігі АҚШ импортындағы барлық тауарларға салықты қайта көтергенін хабарлады. Бұл жаңа мөлшерлеме 12 сәуірде күшіне енеді. Ал 9 сәуірде АҚШ Қытайдан келетін тауарларға салықты 125%-ға дейін арттырған болатын, бұл бұрынғы 20%-дық салықпен қоса жүрді.

Қытайдың қаржы министрлігінің мәліметінше қазіргі салық деңгейі АҚШ тауарларын Қытайға сату мүмкіндігін толығымен тұсап отыр, ал АҚШ жаңа салық енгізетін болса, Қытай бұл әрекеттерге одан әрі жауап бермейтінін жеткізді.

Қытайдың сауда министрлігі Вашингтонның жоғары салықтарды қайта-қайта енгізуін экономикалық тұрғыда мағынасыз деп, оны тек қорқыту мен мәжбүрлеу құралы ретінде қарастыратынын атап өтті.

Нарық қалай жауап беруде

Қытайдың мәлімдемесінен кейін S&P 500 индексіне арналған фьючерстер құлдырауын одан әрі жалғастырды. Қытай компанияларының Hang Seng China Enterprises индексіне арналған фьючерстері баяулай бастады, деп хабарлайды Bloomberg. Доллар үш жылдағы ең үлкен құлдырауынан кейін тағы да арзандады.

Дәстүрлі «қорғаныс активтері» — иена, швейцариялық франк және алтынның бағасы өсті, евро соңғы үш жылдағы ең жоғары деңгейіне көтерілді. АҚШ-тың 10 жылдық қазынашылық облигацияларының табыстылығы 4,4%-дан жоғары деңгейде сақталды, атап өтті Bloomberg.

Еуропаның қор нарықтары таңертеңгі оң өзгерістерден кейін қайтадан «қызыл аймаққа» өтті, деп жазды CNBC. Жалпы еуропалық Stoxx 600 индексі 0,7%-ға төмендеді, британдық FTSE 100 индексі 0,3%-ға, неміс DAX және француз CAC 40 индексі сәйкесінше 0,5% және 0,3%-ға төмендеді.

Тәуекелге деген сұраныстың төмендеу көрсеткіші ретінде технологиялық, қаржы, өнеркәсіп және энергетика салаларының акциялары арзандады, ал дәстүрлі «қорғаныс» салалары — коммуналдық қызметтер, денсаулық сақтау және ұзақ мерзімді тұтынушылық тауарлар өсті, деп атап өтті CNBC.

Сарапшылардың пікірі бойынша «Әлемдік сауданың негізгі ойыншысы ережелерді бұзып, жаңа бағытқа бет алуда, ондағы мақсаты не екенін түсіну қиын», — дейді Париждегі OFI Invest AM компаниясының еуропалық акциялар бөлімі жетекшісі Оливье Бадюэль. — «Біз бағдарымызды жоғалтып, әлі де белгісіздік жағдайында қалудамыз».