Peloton акциясы мықты болжамнан кейін күрт өсті. Сарапшылар компанияға сене ме?
Спорттық жаттығу құрылғыларын сатумен айналысатын Peloton акциясы мықты болжамнан кейін өсті. Пандемия кезіндегі жоғары сұраныстан кейін сатылымы төмендеген компания қазір жаңа басшылықтың жетекшілігімен өсімді қалпына келтіруге тырысып жатыр. Бірнеше жыл қатарынан табысы азайғаннан кейін Peloton өнім желісін жаңартып, бағаларды көтеріп және пайдалылығын арттырды. Алайда, сарапшылар компанияның перспективасын сақ оптимизммен бағалап отыр.
Егжей-тегжейлі
Peloton жаттығу құрылғыларын өндіруші компаниясының акциясы 7 қарашадағы сауда ашылған сәтте 7,5% күрт өсті, себебі компания ағымдағы тоқсанға күткеннен жақсырақ болжам ұсынды. Кейін котировка 5%-дан астам плюсте қалып, сәл түзетілді.
Компания мәліметінше, табысы $665 млн мен $685 млн аралығында болады деп күтілуде, ал Уолл-стрит сарапшылары $661 млн болжап отырған еді, деп хабарлады Bloomberg. Peloton жаңартылған өнім желісін сәтті іске қосып, жабдықтар мен жазылымдарға бағаны көтеру арқылы қолдау тапты, деп түсіндірді Reuters. Бұл нәтижелер инвесторлардың компанияның ұзаққа созылған дағдарыстан кейін қайта бұрылатынына деген сенімін нығайтты, деп санайды агенттік.
Компания есепте тағы не көрсетті?
30 қыркүйекте аяқталған тоқсанда Peloton табысы $551 млн құрады — бұл өткен жылмен салыстырғанда 6% аз, бірақ Уолл-стрит сарапшыларының бағалауынан жақсырақ нәтиже. Бір акцияға шаққандағы пайда (EPS) да күткеннен жоғары болды: $0,03 қарсы $0,02. Таза пайда $13,9 млн болды, ал бір жыл бұрын компания $900 мың залал тіркеген еді.
2026 қаржы жылына арналған жалпы табыстың болжамы бұрынғыдай $2,4–2,5 млрд диапазонында сақталуда. Ағымдағы тоқсанда Peloton құрылғыларына ақылы жазылым санының жылдық мәнде шамамен 8% төмендеуін күтеді (бұрын 6% төмендеген болатын). Платформа пайдаланушыларының жалпы саны да 6% азайып, 5,9 млн-ға жетті.
Есепті тоқсанда еркін ақша ағыны $57 млн-ға өсіп, $67 млн-ға жетті.
Сарапшылар пікірі
JPMorgan сарапшыларының айтуынша, «біз Peloton компаниясының пайдалылықты арттыру, еркін ақша ағынын көбейту және қарыз жүктемесін азайту бағытындағы жетістіктерін позитивті бағалаймыз. Алайда компанияның өнімдік және маркетингтік бастамалары тұрақты табыс өсімін қамтамасыз етуге жеткілікті ме, оны айтуға әлі ерте».
Уолл-стриттің Peloton акциясына деген көзқарасы әзірге сақтықпен оптимистік күйде қалып отыр. MarketWatch дерегінше, қағазды сатып алуға — 10, ұстауға — 10 сарапшы кеңес берді. Ал сатуға — 1 сарапшы кеңес берді.
Компания ахуалы
6 қарашада Peloton есеппен қатар ертеректегі Bike+ үлгісіндегі шамамен 833 мың жаттығу құрылғысын қайтарып алатынын хабарлады. АҚШ-тағы салалық реттеушінің мәліметінше, осы құрылғылардың бір бөлшегі қолдану кезінде сынып, ажырап кетуі мүмкін. CNBC еске салғандай, дәл осындай мәселе 2023 жылы Bike базалық моделінің де қайтарып алынуына себеп болған еді. Ол компанияға тоқсан ішінде $13,5 млн шығын келтіріп, валдық маржаны 0,3 пайыздық пунктке төмендетті. Bloomberg атап өткендей, бұл жағдай сатылымы төмендегеннен кейін қалпына келуге тырысып жатқан Peloton үшін тағы бір соққы болды.
Өткен айда көпжылдық құлдыраудан шығу стратегиясы аясында Peloton жаңа басшылықтың жетекшілігімен өнім желісін ұзақ уақыттан кейін алғаш рет кең көлемде жаңартты. Сонымен қатар, компания Peloton IQ атты жасанды интеллектке негізделген платформаны іске қосты. Ол пайдаланушыларға жеке ұсыныстар, талдау және жаттығу жоспарларын ұсынады. Компанияның үмітінше, ЖИ технологиясына салынған инвестициялар пайдаланушыларды жаттығуларға көбірек уақыт бөлуге және сабақ күндерінің санын арттыруға ынталандырады.
Қазанда Peloton барлық құрылғылардың бағасын орта есеппен 11%, ал жазылым құнын шамамен 19% көтерді. Ал тамыз айында компания қызметкерлерінің шамамен 6%-ын қысқартты, деп жазды Bloomberg.
