PepsiCo табысы артты. Компания дұрыс тамақтану трендіне қалай бейімделуде?
Lay’s, Doritos және Mountain Dew сияқты танымал брендтердің иесі PepsiCo екінші тоқсанда табыс пен кірістің өскенін мәлімдеді. Бұл көрсеткіштер Уолл-стритті таңғалдырды. Негізгі өсім халықаралық нарықтар мен салауатты тамақтану үрдісіне бейімделудің нәтижесінде байқалды. АҚШ-тағы әлсіз сұраныс пен кедендік тарифтерге қарамастан, компания акциялары бір күнде 7%-ға жуық қымбаттады.
Егжей-тегжейі
PepsiCo-ның екінші тоқсандағы кірісі шамамен 1%-ға өсіп, 22,73 миллиард долларға жетті. Бұл көрсеткіш Уолл-стрит сарапшылары күткен 0,99% төмендеуге қарама-қайшы болды (Reuters). Органикалық сатылым өсімі 2,1%-ды құрап, Bloomberg келтірген сарапшылар болжамынан асып түсті.
Акцияға шаққандағы таза табыс 2,12 $ болды. Бұл 2,03 $ деген консенсус-болжамнан жоғары (Reuters).
Дегенмен, PepsiCo әлі де өнімдеріне сұраныстың төмендеуімен бетпе-бет келіп отыр. CNBC дерегінше, жаһандық деңгейде азық-түлік санатында сатылым көлемі 1,5%-ға азайған, ал сусындар бойынша өзгеріс болмаған. Солтүстік Америкада да төмендеу байқалды, бірақ компания басшылығы жағдай жақсарып келеді дейді.
PepsiCo бас директоры Рамон Лагуартаның айтуынша, «халықаралық бизнестегі оң серпін жалғасып жатыр, ал Солтүстік Америкадағы бөлімшелер негізгі санаттарда бәсекеге қабілеттілікті арттырып, жұмыс сапасын жақсартқан».
Компания 2025 жылға арналған болжамын растады: органикалық сатылымның аздап өсуі (low-single-digit) және акцияға шаққандағы түзетілген табыстың былтырғы деңгейде сақталуы күтіледі. Сонымен қатар, PepsiCo тарифтерге байланысты екінші жартыжылдықта жеткізу тізбектеріндегі қосымша шығындарды болжайтынын және оларды азайту стратегиясын жалғастыратынын хабарлады.
Есеп жарияланғаннан кейін Нью-Йорк биржасында компания акциялары 7%-ға жуық қымбаттап, бұл 2020 жылғы наурыздан бергі ең үлкен күндік өсімге айналуы мүмкін. Алайда 2025 жылы PepsiCo акциялары 5,6%-ға арзандаған, ал осы аралықта S&P 500 индексі 6,5%-ға өскен.
PepsiCo салауатты тамақтану трендіне қалай жауап береді?
Кейінгі бірнеше тоқсанда PepsiCo инфляцияның қысымы мен тұтынушылар талғамының өзгеруінен қиындық көрді. Quartz жазғандай, сатып алушылар салауатты әрі салмақты бақылауға арналған өнімдерге көше бастады. Таңғы ас өнімдері, шырындар, тұзды тіскебасарлар мен газдалған сусындарды қамтитын кең ауқымды ассортименті бар компания тұтынушылардың аз өңделген тағамдарға қызығушылығына бейімделуге тырысуда (Bloomberg).
Reuters еске салғандай, компания жақында пребиотикалық Poppi сусыны брендін сатып алып, өнім ауқымын кеңейтті. Сонымен қатар, жаңа оқу жылы басталғанға дейін АҚШ мектептеріне жеткізілетін өнімдерден синтетикалық бояғыштарды алып тастауды, Cheetos пен Doritos-тың табиғи ингредиенттерден тұратын жаңа нұсқаларын шығаруды, сондай-ақ кейбір брендтерінде авокадо мен зәйтүн майын көбірек қолдануды уәде етті. Порция көлемін кішірейту де жоспарда бар.
Тағы бір бағыт — жоғары ақуызды өнімдер. «Тұтынушылар соңғы жылдары ақуызды көбірек тұтынатын болды. Біз бұл сұранысқа кең ауқымды нарыққа бейімделген қолжетімді өнімдермен жауап бере аламыз», — деді Лагуарта (Quartz). Компания өз өнімдеріне ақуыз, талшық және дәнді дақылдарды қосу арқылы пайдалы брендтерге басымдық беріп жатыр.
Солтүстік Америкадағы сусындар сатылымын жандандыру үшін PepsiCo «қантсыз өнімдерге, пайдалы гидратация мен спорттық тағамға» басымдық бермек (Quartz).
PepsiCo компаниясының басшысы қаржы есебі жарияланғаннан кейін инвесторлармен өткен онлайн-конференция кезінде АҚШ президенті Дональд Трамптың жақындағы мәлімдемесіне пікір білдірді. Трамп өзінің жазбасында Coca-Cola компаниясымен бірге АҚШ-та сатылатын сусындарда арзандау жүгері шәрбатынан бас тартып, орнына қант құрағынан алынған табиғи қантқа көшу мәселесін талқылағанын айтқан еді.
Осыған жауап ретінде PepsiCo басшысы Рамон Лагуарта былай деді:
«Егер тұтынушы бізден құрамында қант пен табиғи ингредиенттер бар өнімдерді қаласа, біз дәл сондай өнімдерді ұсынатын боламыз».
Қандай қауіптер бар?
Президент Трамптың тарифтік соғысты күшейтуі инфляцияны арттырып, тұтынушыларды шығындарын бақылауға мәжбүр етуде. Сонымен қатар, АҚШ денсаулық сақтау министрі Роберт Ф. Кеннеди-кіші бастаған тағамдық қоспаларға қарсы кампания да PepsiCo-ның жағдайын қиындата түсуде (Quartz).
Тағы бір ықтимал соққы — Трамптың 2026 жылдан бастап кеңсе тіскебасарларына берілетін салықтық жеңілдіктерді алып тастайтын жаңа заңы. Бұл компанияның корпоративтік сатылымдарына кері әсер етуі мүмкін.
Сарапшылар не дейді?
«Күтулер тым төмен болды. Нәтижелер әсерлі емес, бірақ болжамнан жоғары шықты», — деді RBC Capital Markets-тің сарапшысы Ник Моди (Reuters).
Уолл-стрит PepsiCo-ның жоспарына сақтықпен қарап отыр. Инвесторлар компанияның тұрақты қалпына келуіне нақты дәлел күтуде. 24 сарапшының 16-сы акцияны ұстауға кеңес береді (Hold), жетеуі — сатып алуға (Buy немесе Overweight), тек біреуі ғана сатуға шақырады (Sell). Орташа мақсатты баға қазіргі деңгейге жақын.
