Pinterest құнының бестен бірі жоғалды. Аудитория өсімі неге нарықты қуантпады?
Pinterest котировкасы үшінші тоқсан есебінен кейін 21%-дан астам құлдырап, жыл басынан бергі барлық өсімін жоғалтты. Компанияның бір акцияға шаққандағы пайдасы сарапшылар күткеннен төмен болды — оған АҚШ импорттық баждарының қысымы әсер етті. Сонымен қатар, ағымдағы тоқсанға арналған болжам да инвесторларды көңіл көншітпеді. Уолл-стрит сарапшылары әзірге Pinterest бойынша өз ұсынымдарын өзгертпегенімен, бірқатар инвестициялық компаниялар мақсатты бағаларды қайта қарады.
Егжей-тегжейлі
Суреттер мен идеялар алмасуға арналған Pinterest платформасының акциясы үшінші тоқсан есебі жарияланғаннан кейін 21% құлдырады. Осылайша, котировка 2025 жылғы барлық өсімді жоғалтып, қазір қаңтар басымен салыстырғанда 10% төмен саудаланып жатыр, деп хабарлады CNBC.
Компанияның мәліметінше, түзетілген бір акцияға шаққандағы пайда 38 центті құрады, ал LSEG сарапшылары 42 цент күтті. Таза пайда өткен жылдың осы кезеңімен салыстырғанда үш есеге өсіп, $92,11 млн болды. Табыс 17% артып, $1,05 млрд-қа жетті — бұл нарық болжамымен толық сәйкес келді. Алайда АҚШ пен Канададағы сатылымдар күткеннен төмен болды, деп атап өтті CNBC.
Төртінші тоқсанға компания $1,31–1,34 млрд аралығында табыс күтеді, ал Уолл-стрит бағалауы осы диапазонның жоғарғы шегі — $1,34 млрд болған.
Pinterest күткеннен көп қолданушы тартты: айлық белсенді аудитория 600 млн адамға жетті (болжам — 590 млн). Екінші тоқсанда бұл көрсеткіш 578 млн болған.
Жарнамалық кірістің ахуалы
Компанияның табысының барлығы жарнамадан түседі, сондықтан Pinterest өзін «визуалды іздеу жүйесі» ретінде дамытып, пайдаланушыларға мода, үйді абаттандыру және басқа да идеялар бойынша шабыт табуға көмектесіп жатыр. Өткен аптада компания онлайн-шопингке арналған алғашқы визуалды ЖИ-көмекшісі — «Pinterest Assistant»-ті іске қосты. Пайдаланушылар бұл көмекшімен нақты сатып алу тәжірибесіне ұқсас форматта әрекеттесе алады, деп жазды Bloomberg.
«Біздің ЖИ мен өнімдік инновацияларға салған инвестицияларымыз нәтижесін беріп жатыр. Біз визуалды іздеу саласында көшбасшыға айналдық және платформаны 600 млн пайдаланушы үшін шопингке арналған ЖИ-көмекшіге айналдырдық», — деді Pinterest бас директоры Билл Реди.
Сонымен бірге, қаржы директоры Джулия Доннелли үшінші тоқсанда платформада АҚШ пен Канадада жарнама шығындарының жергілікті төмендеуі байқалғанын мойындады. Ол мұны ірі америкалық ритейлерлердің маржаға қысым тудырған кедендік баждардың әсеріне тап болуымен түсіндірді. Доннелли бұл үрдіс сақталады деп күтеді.
Уолл-стритте не айтылды?
RBC Capital сарапшысы Брэд Эриксонның пікірінше, төртінші тоқсанға болжанған табыс өсімі 14–16% диапазонында болуы — Уолл-стриттің күткенінен төмен, бұл инвесторларды көңілсіз қалдырды, деп жазды ол Investor’s Business Daily басылымына берген жазбасында. Сарапшы компанияның бұл көрсеткіші алдағы 3–5 жылға арналған жылдық табыс мақсаттарының төменгі шегінде екенін атап өтті.
Jefferies сарапшысы Джеймс Хини де назар аударды: АҚШ пен Канададағы Pinterest сатылымының жылдық мәнде 9% өсуі — 2023 жылдың төртінші тоқсанынан бергі минимум. Ол компания акциясы бойынша бейтарап ұсынымын сақтады және: «Біз инвесторлар Pinterest-тің өсімге бағытталған бастамаларының бірі нақты нәтиже бергенге дейін күту позициясын ұстанады деп ойлаймыз», — деп болжады.
RBC сарапшылары атап өткендей, кедендік баждарға байланысты қысым алғаш рет цифрлық жарнама нарығына әсер етіп, Pinterest клиенттік базасының жеткілікті түрде әртараптандырылмағанын және макроэкономикалық факторларға жоғары сезімтал екенін көрсетіп отыр.
Жалпы алғанда, Уолл-стрит Pinterest-тің аралас нәтижелеріне сабырмен қарады: RBC Capital, Bank of America, UBS, Wedbush және Oppenheimer компания акцияларын сатып алу ұсынымын сақтағанымен, мақсатты бағаларын төмендетті, деп хабарлады MarketScreener. Ең төмен таргет енді Wedbush-та — ол бағасын $44-дан $34-ға дейін түсіріп, агенттік ЖИ технологияларына тұтынушылардың артып келе жатқан қызығушылығы тәуекел тудыруы мүмкін екенін ескертті.
Rosenblatt сарапшысы Pinterest акциясын сатып алу ұсынымынан бас тартып, бейтарап позицияны таңдады, деп хабарлады CNBC. Ол компанияның жылдам дамып жатқан чатботтармен бәсекеге түсе алу қабілетіне күмән келтіреді.
MarketWatch дерегінше, Pinterest акциясын қамтитын 42 сарапшының 35-і — сатып алуды, алтауы — ұстап тұруды, тек біреуі — сатуды ұсынады. Орташа консенсус-баға $40-тан сәл жоғары, бұл 5 қарашадағы құлдырауды есепке алмағанда да шамамен 25% өсу әлеуетін білдіреді.
Barron’s атап өткендей, Pinterest акциясы есеп жарияланғаннан кейін жиі жоғары құбылмалылық танытады, тіпті сатылым өссе де. Сонымен бірге басылымның пікірінше, компанияның ағымдағы бағасы инвесторлар үшін қағаздардың салыстырмалы түрде «көзге түспейтінін» көрсетеді. Акциялар P/E мультипликаторы 16,6 деңгейінде саудалануда, яғни акция бағасы бір жылдық күтілетін пайдадан 16,6 есе жоғары, ал S&P 500 индексінің орташа көрсеткіші — 23,1. Pinterest мультипликаторының деңгейі келесі жылға болжанған пайда өсіміне шамалас, сондықтан бұл акцияларды салыстырмалы түрде арзан деп санауға болады, деп жазды Barron’s.
