Polymarket ставка платформасының негізін қалаушы ең жас self-made миллиардер атанды
Нақты оқиғалар нәтижесіне ставка жасауға арналған Polymarket криптоплатформасының негізін қалаған 27 жастағы Шейн Коплан әлемдегі ең жас self-made миллиардер атанды — Bloomberg Billionaires Index индексінің дерегінше. Коплан тізімге Нью-Йорк қор биржасының иесі Intercontinental Exchange (ICE) корпорациясымен жасалған келісімнің арқасында енді. ICE компаниясы Polymarket жобасына $2 млрд-қа дейін инвестиция салады.
ICE компаниясымен жасалған мәміле нәтижесінде Polymarket шамамен $8 млрд-қа бағаланды. Бұған дейін стартап кемінде $255 млн инвестиция тартқан. Инвесторлар қатарында Питер Тиль мен оның Founders Fund қоры, әлемдегі екінші ірі криптовалюта — Ethereum негізін қалаушы Виталик Бутерин, сондай-ақ Blockchain Capital қоры бар, деп хабарлайды Bloomberg PitchBook дерегіне сілтеме жасап. Тағы бір ірі инвестор — Дональд Трамптың ұлына тиесілі венчурлық фирма 1789 Capital. Ол Polymarket-ке алғаш рет 2024 жылғы сайлау алдындағы кезеңде, ал екінші рет биыл инвестиция салған. Президенттің ұлы сонымен қатар компанияның директорлар кеңесіне енді.
Polymarket өкілі Bloomberg-ке түсініктеме беруден бас тартты.
Шейн Коплан коронавирустық пандемия кезінде Polymarket платформасын құрды. Нью-Йорк университетін тастап, криптоиндустрияда мансап құру үшін бірнеше жыл арнағаннан кейін, Копланның ақшасы таусылып, тіпті пәтерақыны төлеу үшін өз заттарын сатуға дейін барды, деп жазады Bloomberg. Криптонарықтағы хаос пен алаяқтықтардан түңілген ол 2019 жылы экономист Робин Хэнсонның болжам нарығы туралы идеяларына қызығып, оларды іс жүзінде жүзеге асыруды ұйғарды. Алайда, жетістікке жету жолы оңай болған жоқ: «алдымен әрекет ет, кейін рұқсат сұра» ұстанымы Polymarket-ті реттеушілермен конфликтке әкелді. Салдарынан компания АҚШ-тағы қолданушылар үшін платформаға шектеу қоюға мәжбүр болды. Ал 2024 жылғы сайлаудан кейін, Polymarket арқылы $2 млрд-тан астам ставка жасалған соң, Копланның үйіне FBI тінту жүргізді. Дегенмен, Трамп әкімшілігі келсімен Polymarket пен билік арасындағы арақатынас жақсарып, тергеу тоқтатылды. Компания лицензияланған шағын биржа мен клирингтік палатаны сатып алып, АҚШ нарығына қайта оралды.
