Raiffeisen Bank Ресейден шыға алмаған соң бас директорын ауыстырады
Австриялық Raiffeisen Bank International 2026 жылғы маусымда бас директорын ауыстыратынын хабарлады. Банкті бұрынғы қаржы директоры Михаэль Хёллерер басқарады. RBI — Ресейде қызметін жалғастырып отырған батыстық банктердің санаулысының бірі. Нарықтан шығу ниетін бірнеше рет мәлімдегеніне қарамастан, банк Ресей мен Батысты бірдей қанағаттандыратын сатып алушыны әлі таба алмады. Сонымен қатар, банк елден өтемақысыз кетуге ниетті емес.
Егжей-тегжейлі
Михаэль Хёллерер 2026 жылғы 1 шілдеден бастап RBI бас директоры болады, деп хабарлады компания. Алайда тағайындау әлі де билік органдарының келісімін қажет етеді. Тиісті ақпарат 17 желтоқсанда жарияланды.
Хёллерер бұл қызметте 66 жастағы Йоханн Штробльді алмастырады. Соңғысы 2027 жылғы ақпанда аяқталатын келісімшартын ұзартуға ұмтылмау туралы шешім қабылдағаны хабарламада айтылған.
Bloomberg дерегінше, Хёллерер 2020–2022 жылдары RBI-дың қаржы директоры болған, ал кейін Raiffeisenlandesbank Niederösterreich Wien банкін басқарды. Бұл — RBI-дың ең ірі акционері әрі Австриядағы ең ықпалды кредиторлардың бірі.
Бұл не білдіреді?
Raiffeisen Bank International бірнеше жыл бойы Ресейдегі еншілес бөлімшесін сату әрекеттері сәтсіз аяқталғаннан кейін басшылығын ауыстырып отыр, деп жазды Bloomberg. Банк Ресейде €5 млрд-тан астам пайда жинағанымен, валюталық және қаржылық шектеулерге байланысты бұл қаражатты елден шығара алмай келеді. Агенттіктің мәліметінше, RBI әзірге Ресей билігі де, батыс елдерінің басшылығы да мақұлдайтын сатып алушы таба алған жоқ. Сонымен қатар, банк Украинадағы еншілес құрылымын қоса алғанда, Шығыс Еуропадағы өзге «еншілес» банктерінен түсетін кіріс үлесін арттыруға тырысып жатыр.
Михаэль Хёллерердің негізгі міндеті — осы көп жылдан бергі түйткілді шешу болмақ, деп санайды Bloomberg. Ал бұрынғы бас директор Йоханн Штробль 2024 жылғы қазанда Raiffeisen Bank International-дың Ресей нарығынан өтемақысыз кетуге дайын емес екенін айтқан. «Біз әзірге ешқандай өтемақысыз шыға алатын жағдайда емеспіз», — деген ол Reuters-ке берген сұхбатында. Шамамен бір жыл өткен соң Штробль Ресейден шығу мәселесі толықтай RBI-дың өз қолында емес екенін де мойындады. «Біз Ресейдегі бизнесімізді деконсолидациялау бағытында жұмыс істеуге болатынын түсіндік, бірақ бұл тек бізге байланысты емес. Бұл процеске шешім қабылдайтын тым көп тарап тартылған», — деген ол Bloomberg-ке берген сұхбатында.
Financial Times дереккөздерінің айтуынша, RBI-дан Ресейден кетуді реттеушілер мен шетелдік үкіметтер талап етіп отыр. Алайда, ресейлік билік банкке кетуге мүмкіндік бергісі келмейді, себебі ол әлемдік банкаралық SWIFT төлем жүйесіне қол жеткізуді қамтамасыз ететін санаулы арналардың бірі болып қалып отыр.
Акция ахуалы
RBI акциясы 17 желтоқсанда Вена биржасындағы саудада 1,43% арзандады, алайда 2025 жылдың басымен салыстырғанда бағасы 88% жоғары. Банк акциясына қатысты сарапшылар пікірі әртүрлі: қағазды «сатып алуға» — 8, «ұстауға» — 4, ал «сатуға» — 2 сарапшы кеңес берді, деп жазды The Wall Street Journal. Орташа мақсатты баға — €34,55, бұл ағымдағы деңгейден 7% төмен.
