S&P Global мұнай бағасының 50 доллардан төмендейтінін болжады
Биыл мұнайға деген сұраныс өсімі соңғы 24 жылдағы ең төменгі деңгейде болуы мүмкін. OПЕК+ ұйымының артық ұсынысы мен әлсіз сұраныс аясында мұнай бағасы барреліне 50 доллардан төмен түсуі мүмкін. Мұндай болжамды S&P Global Commodity Insights сараптамалық компаниясы жасады. Ал Bank of America мәліметінше, OПЕК+ өндірісті арттыру арқылы Сауд Арабиясы нарықтағы үлесін сақтау үшін ұзақ мерзімді баға соғысын бастап отыр.
Егжей-тегжейі
S&P Global Commodity Insights агенттігі 9 маусымда Brent маркалы мұнайдың биылғы орташа бағасы бойынша болжамын 72 доллардан 63 долларға дейін төмендетті деп жазады Barron’s. Сарапшылардың пікірінше, кей сәттерде баға 40–49 доллар аралығына дейін құлдырауы мүмкін. Әдетте Brent мұнайынан арзандау болатын америкалық WTI мұнайының да бағасы осы деңгейге түсуі ықтимал.
Бұл болжам жыл басынан бергі мұнай үшін ең табысты аптадан кейін жасалды: WTI және Brent бағасы 6%-ға өсіп, тиісінше 64,6 және 66,5 долларға жетті. Бағаны салыстырмалы түрде тұрақты сұраныс қолдап отыр деп жазады Barron’s. Алайда өсім жалғаса береді деп үміттенуге негіз жоқ, дейді S&P Global-дың шикі мұнай бойынша жаһандық зерттеу бөлімінің басшысы Джим Беркхард. Оның айтуынша, дәл сұраныс баяулаған уақытта OПЕК+ белсенді түрде өндірісті ұлғайтып жатыр.
Беркхардтың бағалауынша, 2025 жылдың екінші жартысында жаһандық мұнай өндірісі тәулігіне 2,2 миллион баррельге артады, ал сұраныс небәрі 390 мың баррельге өседі. Егер пандемия мен қаржылық дағдарысты есептемесек, биыл сұраныс өсімі 2001 жылдан бергі ең төменгі көрсеткіш болуы мүмкін.
«Қазіргі сәтте мұнай бағасын қорғайтын ештеңе жоқ», — дейді S&P Global жазбасында. Беркхардтың айтуынша, жазғы автокөлік маусымы уақытша бағаны қолдауы мүмкін, бірақ егер өндіріс саясаты өзгермесе, нарықты артық ұсыныс жайлап алады.
Мұның салдары қандай болмақ?
Мұнай бағасының құлдырауы АҚШ-тағы мұнайшыларды, әсіресе өзіндік құны жоғары тақтатас мұнайын өндірушілерді бұрғылау жұмыстарын баяулатуға мәжбүр етеді. S&P Global болжамынша, 2026 жылдың соңына қарай АҚШ-тағы мұнай өндірісі 2025 жылдың ортасымен салыстырғанда тәулігіне 640 мың баррельге төмендеуі мүмкін. Бұл он жыл ішіндегі алғашқы осындай төмендеу болмақ, деп жазады Barron’s. Baker Hughes компаниясының соңғы деректеріне сәйкес, АҚШ-тағы белсенді бұрғылау қондырғыларының саны соңғы төрт жылдағы ең төмен деңгейге түскен.
Bank of America-ның шикізат нарығы бойынша зерттеу бөлімінің жетекшісі Франсиско Бланштың пікірінше, бұл Сауд Арабиясына жаһандық нарықтағы үлесін қайта алуға мүмкіндік береді. Оның айтуынша, іс жүзінде Сауд Арабиясы басқаратын OПЕК+ өткен айда өндірісті үшінші рет ұлғайтып, оны тәулігіне 400 мың баррельден асырып жіберді. Осылайша альянс бірнеше жыл бойы жоғары бағаны ұстап тұрған жеткізуге шектеулерін біртіндеп алып тастап жатыр.
«Бұл қысқа мерзімді, ушыққан баға соғысы емес. Бұл – ұзаққа созылатын, біртіндеп жүретін баға соғысы», — деді Бланш Bloomberg агенттігіне берген сұхбатында.
Одан бөлек, Бланштың айтуынша, Эр-Рияд OПЕК+ ішіндегі өзге елдерден де нарық үлесін қайтарып алуға ниетті.
«Сауд Арабиясы соңғы үш жылдан астам уақыт бойы бағаны жеке өзі ұстап тұрды, бұл басқа өндірушілерге өндірісті көбейтуге мүмкіндік берді. Енді олар бұл әрекетті доғарды», — деп түйіндеді сарапшы.
