«Сабан қуыршақтар жанып кетті»: Бьюрри Nvidia-на сынға алды
2008 жылғы дағдарыс алдында ипотека нарығына қарсы бәс тігумен танылған инвестор Майкл Бьюрри Nvidia-ны қатты сынға алып, ЖИ компанияларына қарсы жасаған ставкалары туралы жаңа мәліметтерді ашты. Ол чипмейкер туралы жаңа хатында жабдықтың тез ескіруіне байланысты үлкен қауіп көретінін айтып, Nvidia ғана емес, Уолл-стрит сүйікті тағы бір ЖИ компаниясына да пут-опцион ұстап отырғанын растады.
Егжей-тегжейі
OnInvest көрген «Мүйізтұмсықтар мен тарақандар: қасиетті алдау» атты жаңа хатында Бьюрри Nvidia сынын күшейтті. Ол чипмейкердің Уолл-стрит сарапшыларына жіберген жазбасына жауап берді. Онда компания Бьюрридің акцияларды шамадан тыс сұйылту туралы айыптауларын жоққа шығарған еді. Бьюрридің айтуынша, Nvidia жауабы мазмұнсыз болған және ол айтпаған нәрселерге қарсы тұруға тырысқан. Инвестор мұндай «адал емес әрі көңіл қалдыратын» жауап әлемдегі ең қымбат жария компанияның атынан шыққанына таңданатынын жазды. Оның сөзінше, Nvidia хаты аргументтің орнына «бірінен кейін бірі сабан қуыршақтарды» қойған және «әзілге ұқсап» оқылған.
Тәжірибелі инвестор ешқашан Nvidia жабдықтың қызмет мерзімін әдейі ұзақ етіп көрсетеді деп айыптамағанын атап өтті. «Nvidia-ның амортизациясына ешкім назар салып отырған жоқ. Бірінші сабан қуыршақ жанып кетті», — деп жазды ол.
Бьюрриді алаңдататын басты мәселелердің бірі — ЖИ компаниялардың актив амортизациясын қалай есептейтіні. Оның ойынша, жабдықтың қызмет мерзімін үш жылдан бес–алты жылға дейін созу компанияларға уақытша жоғары пайда мен жақсы баланс көрсетуі мүмкін, бірақ кейін үлкен шығындарға әкеледі. «Ірі технологиялық компаниялар чиптер мен серверлердің қызмет мерзімін қағаз жүзінде созып жатыр, бірақ өздері жүздеген миллиардты тез ескіретін құрылғыларға салып отыр», — деді ол.
Бьюрри Nvidia-ның «ескі чиптер әлі кең қолданылып жатыр» деген уәжін де қабылдамады. Оның айтуынша, мәселе онда емес: ол жаңа чиптер 2026–2028 жылдары-ақ ескіруі мүмкін деп қауіптенеді. «Мен алға қараймын және инвесторлар үшін қазір маңызды қауіптерді көремін. Екінші сабан қуыршақ та жанып кетті», — деп жазды ол. Ол Microsoft басшысы Сатья Наделланың сөзін еске салды: Наделла деректер орталықтарын салуды баяулатқаны — бір буын ЖИ-чиптерге арнап инфрақұрылым құрып қойып, оның тез ескіруінен қорыққаны себеп.
Инвестор сондай-ақ Nvidia-ға қарсы қысқа позиция ашқанын айтты.
Тағы кім назарында?
Бьюрри Уолл-стриттің тағы бір сүйікті ЖИ компаниясы — Palantir тақырыбын да көтерді. Ол Palantir-ге қарсы пут-опцион ұстап отырғанын растады, бірақ бұл мәміле туралы кейінірек толығырақ жазатынын айтты. «Мен бірдеңені ұмытып тұрмін… Ә, иә, Palantir. Оған да жетемін. Бірақ қазір емес», — деп жазды ол.
3 қарашада Бьюрридің жақында жабылған хедж-фонды Scion Asset Management қыркүйек соңында оның екі компанияның да пут-опционын ұстағанын жариялаған еді. Бұл күн Palantir тоқсандық есебін шығарған уақытқа сәйкес келеді, деп еске салады Business Insider. Келесі күні Palantir басшысы Алекс Карп Бьюрридің ставкасында «ақымақтық» барын айтқан, ал инвестор X желісінде оған 13F формасын түсінбегеніне таңданбайтынын айтып жауап берді.
Бьюрри кейінірек Palantir бойынша пут-позициясын өткен айда жапқанын және қазір Substack ашуына байланысты «анағұрлым қызығырақ істермен» айналысып жүргенін айтты. Бұрынғы опциондардың шартты құны 1,1 млрд доллар болған, бірақ іс жүзінде оған шамамен әрқайсысы 10 млн доллардан түскен.
Акциялар жағдайы
26 қарашадағы саудада Nvidia акциялары 3%-ға жуық өсіп, 182,9 долларға жетті. Алайда 3 қарашадағы шегінен 14% төмендеп отыр — инвесторлар ЖИ компаниялардың тым жоғары бағасынан алаңдауда. Жыл басынан бері компания құны 34% өсті. Салыстыру үшін: сол кезеңде S&P 500 шамамен 16% көтерілді.
Бьюрридің Palantir туралы сөздерін инвесторлар елемей қойды. Оның акциялары да сәрсенбідегі саудада 3%-ға жуық қымбаттады. 2025 жылдың басынан бері компания қағаздары 120%-дан аса өсті.
